បើយោងតាមរបាយការណ៍ របស់រដ្ឋបាលខេត្តបាត់ដំបង បានបង្ហាញនៅល្ងាចថ្ងៃទី១៣ ខែមករា ឆ្នាំ២០២១នេះ បុរស២នាក់ពាក់ព័ន្ធករណីផ្ទុះឆ្លងជំងឺផ្ដាសាយបក្សី នៅចំណុចភូមិព្រែកតាច្រែង ឃុំព្រែកនរិន្ទ ស្រុកឯកភ្នំ ទោះបីជាមនុស្សទាំង ២នាក់ មិនបានឆ្លងជំងឺនេះក៏ដោយ តែអាជ្ញាធរខេត្ត និងមន្ត្រីជំនាញ នៅបន្តដាក់តំបន់នោះ ជាទីតាំងឆ្លងជំងឺគ្រុនផ្ដាសាយបក្សី តាមប្រកាសរបស់ក្រសួងកសិកម្ម រុក្ខាប្រមាញ់ និងនេសាទ ដោយមានការហាមឃាត់ផ្សេងៗដដែល និងមិនទាន់ប្រកាសសម្រេចបែបណាថែមទៀតនោះទេ។

សូមបញ្ជាក់ថា នៅចំណុចទីតាំងដែលមានការឆ្លងជំងឺផ្ដាសាយបក្សីនេះ មានម្ចាស់ឈ្មោះ ហូ ណាម ដោយសត្វស្លាបរបស់គាត់ បានឆ្លងជំងឺនេះ ហើយបានងាប់ជាបន្តបន្ទាប់តាំងពីដើមខែមករា ឆ្នាំ២០២១ ក្នុងករណីនេះ មាន់ឆ្លងជំងឺបានងាប់អស់ចំនួនប្រមាណ ១៣០០ក្បាល ខណៈសត្វទា និងក្ងាន សរុបជាង ១៦០ក្បាល ដែលចិញ្ចឹមនៅទីតាំងជាមួយគ្នា ក៏ត្រូវបានអាជ្ញាធរខេត្ត និងមន្ត្រីជំនាញធ្វើការកម្ទេចចោល និងធ្វើការបាញ់ថ្នាំសម្លាប់មេរោគនៅជុំវិញទីតាំងផ្ទុះឆ្លងជំងឺនេះ ដើម្បីទប់ស្កាត់កុំឲ្យមានការរីករាលដាលជំងឺគ្រុនផ្ដាសាយបក្សីនេះ ទៅកាន់ទីកន្លែងផ្សេងៗទៀត តាមវិធានការរបស់ក្រសួងកសិកម្ម និងក្រសួងសុខាភិបាល។

គួរឲ្យដឹងផងដែរថា ការផ្ទុះឆ្លងជំងឺផ្ដាសាយបក្សីនៅស្រុកឯកភ្នំនេះ ត្រូវមន្ត្រីជំនាញ បានអះអាងថា នេះជាករណីដំបូង សម្រាប់ដើមឆ្នាំ២០២១នេះ ប៉ុន្តែអាជ្ញាធរខេត្ត និងមន្ត្រីជំនាញ ក៏បានអំពាវនាវទៅកាន់ទីកន្លែង ឬកសិដ្ឋានចិញ្ចឹមសត្វស្លាបផ្សេងៗទៀត នៅជុំវិញខេត្តបាត់ដំបង ត្រូវអនុវត្តនូវវិធានការបាញ់សម្លាប់មេរោគ នៅក្នុងរោងចិញ្ចឹមសត្វរបស់ខ្លួន និងចាក់វ៉ាក់សាំងឲ្យសត្វទាំង នោះ ឲ្យបានទៀងទាត តាមបច្ចេកទេសកសិកម្ម៕

កម្មករ២នាក់ដែលជាអ្នកថែនិងប៉ះពាល់មាន់ងាប់ផ្ទាល់ មានឈ្មោះ រ៉ន បញ្ញា អាយុ២១ ឆ្នាំ និង ឈ្មោះ ខន ជីវ័នអាយុ២៨ឆ្នាំ។

លោកវេជ្ជបណ្ឌិតអ៊ុកវិទ្យាអនុប្រធានមន្ទីរសុខាភិបាលខេត្តបាត់ដំបងបានអោយដឹងថាសុខភាព
កម្មករទាំងពីរនាក់នេះល្អធម្មតាទេពុំមានរោគសញ្ញាបង្ហាញគួរអត់សំគាល់នោះទេ។

លោកបញ្ជាក់ថាក្រោយយកសំណាកពួកគេហើយលោកបាន ណែនាំ មិនអនុញ្ញាតិអោយកម្មករទាំងពីរនេះដើរហើយទៅណានោះទេគឺនៅឆ្ងាយពីគេសិន រង់ចាំលទ្ធផលធ្វើតេស្តលើសំណាកសិនថាមានឆ្លងជំងឺផ្តាសាយH5N1រឺអត់ ។ លោកបញ្ជាក់ថាជម្ងឺផ្តាសាយH5N1ជាប្រភេទជំងឺឆ្លងពីមាន់ទៅមនុស្ស ប៉ុន្តែមិនទាន់មានការរកឃើញថាមានការឆ្លងពីមនុស្សទៅមនុស្សនោះទេ។

សូមបញ្ជាក់ថាបើតាមលោកកហូណាំម្ចាស់កសិដ្ឋានអោយដឹងថាកសិដ្ឋាននេះចិញ្ចឹមមាន់១ខែមកហើយ ដែលនាំចូលពូជមកពីក្រុមហ៊ុនមួយរបស់ប្រទេសវៀតណាមចំនួន១៣០០ក្បាលនិងមាន់ស្រែ២០០ក្បាល ទាកប៉ាជាង២០០ក្បាលនិងក្ងានមួយចំនួន។

តាមកម្មករមើលថែផ្ទាល់បានបញ្ជាក់ថា មាន់ចាប់ផ្តើមឈឺងាប់ពីថ្ងៃទី៣១មករាដល់ថ្ងៃទី៥ មករាគឺងាប់ទាំងអស់តែម្តង ហើយមាន់ដែលងាប់ទាំងនេះត្រូវបានមន្រ្តីជំនាញបានចុះមកណែនាំអោយកប់ចោល និងបានបាញ់ថាំសម្លាប់មេរោគជុំវិញកសិដ្ឋានផងដែរ។

សូមបញ្ជាក់ថា លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានបញ្ជាក់នៅល្ងាចថ្ងៃទី១១ ខែមករា នេះដល់បណ្តាញព័ត៏មានក្នុងស្រុកថា លទ្ធផលធ្វើតេសលើសំណាកសត្វមាន់ដែលងាប់ជាង ១០០០ក្បាល នៅភូមិព្រែកតាច្រែង ឃុំព្រែកនរិន្ទ ស្រុកឯកភ្នំ ខេត្តបាត់ដំបង បានបង្ហាញថា គឺជាគ្រុនផ្តាសាយបក្សី (H5N1) ប៉ុន្តែប្រភេទជំងឺនេះ គឺមិនប៉ះពាល់ដល់មនុស្សទេ។

លោក ឈឹម វិជ្ជរ៉ាប្រធានមន្ទីរកសិកម្មខេត្តបាត់ដំបងបានអំពាវនាវពលរដ្ឋបើឃើញមាន់ឈឺរឺងាប់ខុសប្រក្រតីនិងសង្ស័យកើតជម្ងឺផ្តាយសាយ សូមរាយការណ៍ជាបន្ទាន់មកកាន់អជ្ញាធរមូលដ្ឋាននិមន្រ្តីការិយាល័យបក្សុព្យាបាលរឺមន្ទីរកសិកម្មផ្ទាល់ដើម្បីចុះអន្តារគមន៍ភ្លាមៗ៕