នាយករដ្ឋមន្ត្រី ប្រកាសមិនចាក់វ៉ាក់សាំងស៊ីណូហ្វាម របស់ចិន

មករា — Fri, 05 Feb 2021 13:05:05 +0000

ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានប្រកាសថា នឹងមិនចាក់វ៉ាក់សាំងស៊ីណូហ្វាម ដែលជាជំនួយរបស់ចិនឡើយ នៅថ្ងៃទី១០ ខែកុម្ភៈ ឆ្នាំ២០២១ដោយសារវ៉ាក់សាំងនេះ ឱ្យចាក់ក្នុងចន្លោះអាយុពី ១៨ឆ្នាំ ទៅ៥៩ឆ្នាំប៉ុណ្ណោះ ដោយឡែកសម្តេចអាយុ ៦៨ឆ្នាំហើយ។

សម្តេចតេជោ ហ៊ុន សែន បានបញ្ជាក់នៅលើទំព័រ នៅល្ងាចថ្ងៃទី៥ ខែកុម្ភៈ យ៉ាងដូច្នេះថា “ជនរួមជាតិជាទីគោរព
ស្រឡាញ់! ខ្ញុំទើបបានទទួលព័ត៍មានតាមរយៈក្រសួងសុខាភិបាលដែលបានទទួលលិខិតផ្លូវការពីការិយាល័យ នៃទីប្រឹក្សាសេដ្ឋកិច្ចនិងពាណិជ្ជកម្មប្រចាំស្ថានទូតនៃសាធារណរដ្ឋប្រជាមានិតចិន ប្រចាំព្រះរាជាណាចក្រកម្ពុជាដែលបញ្ជាក់ថា វ៉ាក់សាំងឈ្មោះសុីណូហ្វាម(Sinopharm) ចាក់បានតែមនុស្សមានអាយុពី១៨ឆ្នាំទៅ៥៩ឆ្នាំតែប៉ុណ្ណោះ។
សម្រាប់ខ្ញុំដែលមានអាយុជាង៦៨ឆ្នាំទៅហើយមិនទាន់អាចចាក់បានទេ។ ដូចនេះគំរោងចាក់វ៉ាក់សាំងដែលគ្រោងចាក់នៅថ្ងៃទី១០ កុម្ភៈ ២០២១ នៅមន្ទីរពេទ្យកាល់ម៉ែត្រ នឹងត្រូវលុបចោលអាស្រ័យដោយទាំងខ្ញុំទាំងមន្ត្រីជាន់ខ្ពស់ផ្សេងទៀត ភាគច្រើនមានអាយុលើសពី៦០ឆ្នាំទៅ ហើយមិនអាចចាកបានទេ។ សម្រាប់កម្មវិធីចេញទៅទទួលជំនួយវ៉ាក់សាំង នៅព្រលានយន្តហោះនាល្ងាច ថ្ងៃ៧កុម្ភៈនៅរក្សាទុកដដែល “។

សូមបញ្ជាក់ថា វ៉ាក់សាំងស៊ីណូហ្វាមជាជំនួយរបស់ចិន ប្រមាណ ៦០ម៉ឺនដូស ក្នុងចំណោម ១លានដូស នឹងមកដល់ប្រទេសកម្ពុជានៅថ្ងៃទី៧ ខែកុម្ភៈ ឆ្នាំ២០២១៕

វ៉ាក់សាំងកូវីដ១៩ ចំនួន៦០ម៉ឺនដូសជាជំនួយរបស់ចិន នឹងដឹកមកដល់កម្ពុជានៅល្ងាចថ្ងៃអាទិត្យ ទី៧កុម្ភៈ ខណៈសម្ដេចទៀ បាញ់ បានចាក់រួចហើយ

មករា — Fri, 05 Feb 2021 01:24:45 +0000

ភ្នំពេញ៖ សម្ដេចតេជោ ហ៊ុន សែន នាយករដ្ឋមន្រ្តីនៃកម្ពុជាបានបញ្ជាក់ជាថ្មីម្ដងទៀតថា វ៉ាក់សាំងកូវីដ១៩ ចំនួន៦០ម៉ឺនដូសដែលជាជំនួយរបស់ចិនក្នុងដំណាក់កាលដំបូងនឹងដឹកមកដល់កម្ពុជានៅល្ងាច ថ្ងៃអាទិត្យទី៧កុម្ភៈ២០២១ ខណៈសម្ដេចប្រកាសចាក់វ៉ាក់សាំងនេះមុនគេជាមួយមន្ត្រីជាន់ខ្ពស់ផ្សេងទៀត នៅម៉ោង៨និង៣០នាទីថ្ងៃទី១០កុម្ភៈ២០២១ លើកលែងតែ សម្ដេច ទៀ បាញ់ ប្រមុខការពារជាតិបានចាក់វ៉ាក់សាំងនេះរួចហើយ។

តាមរយៈគេហទំព័រហ្វេសប៊ុកនៅព្រឹកថ្ងៃទី៥ កុម្ភៈនេះ សម្ដេចតេជោ ហ៊ុន សែន នាយករដ្ឋមន្រ្តីបានបញ្ជាក់ថា”វ៉ាក់សាំងដែលជាជំនួយរបស់សាធារណរដ្ឋប្រជាមានិតចិនតាមរយៈក្រសួងការពារជាតិចិនមកកាន់ក្រសួងការពារជាតិកម្ពុជានឹងដឹកមកដល់កម្ពុជាចំនួន៦០ម៉ឺនដូសនៅល្ងាចថ្ងៃអាទិត្យទី៧កុម្ភៈ២០២១ដែលជាដំណាក់កាលដំបូងនៃជំនួយចំនួន១លានដូស។

ម៉ោង៨និង៣០នាទីថ្ងៃទី១០កុម្ភៈ២០២១ដំណើរការចាក់វ៉ាក់សាំងនឹងចាប់ផ្តើមជាផ្លូវការនៅមន្ទីរពេទ្យកាល់ម៉ែត្រដែលខ្លួនខ្ញុំនឹងទទួលមុនគេជាមួយមន្ត្រីជាន់ខ្ពស់ផ្សេងទៀត លើកលែងតែ សម្តេចពិជ័យសេនា ទៀ បាញ់ ដែលគាត់បានចាក់វ៉ាក់សាំងនេះរួចហើយ។ការចាក់វ៉ាក់សាំងនេះនឹងមានការផ្សាយផ្ទាល់និងបន្ទាប់ពីចាក់រួចខ្ញុំនឹងធ្វើសន្និសីទសារព័ត៌មាននៅមន្ទីរពេទ្យកាល់ម៉ែត្រតែម្តង”។

សម្តេចតេជោ ហ៊ុន សែន នាយករដ្ឋមន្ត្រីបានអំពាវនាវ ដល់សហគមន៍អឺរ៉ុប ជួយផ្តល់ជំនួយវ៉ាក់សាំង ការពារជំងឺកូវីដ១៩ មកកម្ពុជា ខណៈកម្ពុជាកំពុងត្រៀម បញ្ជាទិញវ៉ាក់សាំងកូវីដ១៩ ពីប្រទេសអង់គ្លេស និងចិនបន្ថែមទៀត ។បូកសរុបទាំងការបញ្ជាទិញនិងជំនួយគិតមកដល់ពេលនេះកម្ពុជា មានវ៉ាក់សាំងកូវីដ១៩ចំនួន១១លានដូសហើយ។

សូមរំលឹថាក្រសួងសុខាភិបាលនៃព្រះរាជាណាចក្រកម្ពុជា កាលពីថ្ងៃទី៤កុម្ភៈបានប្រកាសអនុញ្ញាតឱ្យប្រើប្រាស់នូវវ៉ាក់សាំង Sinopharm COVID-19 ដែលផលិតដោយវិទ្យាស្ថាន Beijing Institute of Biological Products Co., Ltd នៃសាធារណរដ្ឋប្រជាមានិតចិន ក្នុងលក្ខខណ្ឌនៃការប្រើប្រាស់ជាបន្ទាន់ (Emergency Use Authorization) ដោយអនុវត្តតាមពិធីសារស្តីពីយុទ្ធនាការចាក់វ៉ាក់សាំងកូវីដ-១៩ របស់រាជរដ្ឋាភិបាល។

សូមជម្រាបថា គិតត្រឹមព្រឹកថ្ងៃទី៥ ខែកុម្ភៈ ឆ្នាំ២០២១នេះ កម្ពុជាបានរកឃើញអ្នកឆ្លងកូវិដ១៩ សរុបចំនួន ៤៧០នាក់ក្នុងនោះអ្នកជាសះស្បើយចំនួន៤៥២នាក់និងអ្នកជំងឺ១៨នាក់កំពុងសម្រាកព្យាបាលនៅមន្ទីរពេទ្យ៕

ជំនួយរបស់ចិន – Champey News

នាយករដ្ឋមន្ត្រី ប្រកាសមិនចាក់វ៉ាក់សាំងស៊ីណូហ្វាម របស់ចិន