យោងតាមក្រសួងបរិស្ថានបានឲ្យដឹងថា
មន្រ្តីនៃមន្ទីរបរិស្ថានខេត្តព្រះវិហារ សហការជាមួយក្រុមការងារជំនាញ និងសហគមន៍ថតបានដោយ Camera Trap នៅពេលហ្វូងសត្វរមាំងចេញរកចំណីតាមព្រៃ ដែលមានស្មៅខៀវខ្ខី ក្បែរបឹងបួរនៅក្នុងដែនជម្រកសត្វព្រៃភ្នំត្នោត-ភ្នំពក ភូមិសាស្រ្តខេត្តព្រះវិហារ។

សូមបញ្ជាក់ថា រមាំង ជាសត្វចតុប្បាទព្រៃ ចូលចិត្តយរស់នៅជាក្រុមតូចធំ ចន្លោះពី៤ ទៅ២០ក្បាល នៅតាមព្រៃរបោះ ដែលមានវាលស្មៅ ត្រពាំង បឹងបួ ថាលស្រែ និងនៅតាមមាត់ព្រៃទីវាទំនាបមាត់ព្រៃ ដែលសត្វនេះងាយរកចំណី ដូចជាស្មៅ ស្បូវ ព្រេច ស្លឹកត្រួយរក្ខជាតិតូចធំ ផ្លែឈើ និងស្រូវជាដើម។ យោងតាមសៀវភៅសម្បត្តិធម្មជាតិនៃប្រទេសកម្ពុជា សត្វរមាំងឈ្មោលមានដុះស្នែង និងមានស្នែងច្រើន។ ក្នុងចន្លោះខែមីនា និងឧសភា ជារដូវនៃការបន្តពូជរបស់សត្វរមាំង ហើយការបន្តពូជមានរយៈពេលពី៦ ទៅ៨ខែ និងបង្កើតកូនម្តងបានតែ១ក្បាល៕

នៅថ្ងៃដដែល មន្រ្តីឧទ្យានុរក្សនៃដែនជម្រកសត្វព្រៃគូលែន-ព្រហ្មទេព ដែនជម្រកសត្វព្រៃ ព្រៃឡង់-បឹងពែរ និងតំបន់បេតិកភណ្ឌធម្មជាតិ-ភ្នំត្បែង បានចុះល្បាតទប់ស្កាត់បទល្មើសធនធានធម្មជាតិ ដោយជាលទ្ធផល បានរុះបំផ្លាញចោលរោងស្នាក់កាប់ឈើ០២កន្លែង(មួយប្រក់តង់ និងមួយសង់ពីឈើ) របស់អញ្ញាត្តជន និងដកហូតរណាយន្ដ០២គ្រឿង ពីបុរសជាជនសង្ស័យ ហើយបានធ្វើកិច្ចសន្យា និងអប់រំណែនាំច្បាប់ស្តីពីតំបន់ការពារធម្មជាតិផងដែរ៕