ថ្លែងក្នុងពិធីបើកវេទិកា ឯកឧត្តម សុខ លូ គូសបញ្ជាក់ថា រាជរដ្ឋាភិបាលកម្ពុជាបានខិតខំប្រឹងប្រែងប្រកបដោយឆន្ទៈ មោះមុតក្នុងការធ្វើកំណែទម្រង់វិមជ្ឈការ និងវិសហមជ្ឈការ ផ្តោតលើការរៀបចំឡើងវិញនូវរចនាសម្ព័ន្ធប្រព័ន្ធ គ្រប់គ្រងរដ្ឋបាលថ្នាក់ជាតិ និងថ្នាក់ក្រោមជាតិស្របតាមគោលការណ៍ការអភិវឌ្ឍតាមបែបប្រជាធិបតេយ្យ។ ការធ្វើកំណែទម្រង់វិមជ្ឈការ និងវិសហមជ្ឈការ មានគោលបំណងសំខាន់ក្នុងការចូលរួមថែរក្សាសុខសន្តិភាព ស្ថិរភាព នយោបាយ បង្កើតឱ្យមានមូលដ្ឋានគ្រឹះប្រជាធិបតេយ្យ អភិបាលកិច្ចមូលដ្ឋាន សំដៅលើកកម្ពស់ការផ្តល់សេវាជូន ប្រជាពលរដ្ឋ ការអភិវឌ្ឍសេដ្ឋកិច្ច ឆ្លើយតបតម្រូវការប្រជាពលរដ្ឋចំគោលដៅ សំដៅដល់ការចូលរួមអភិវឌ្ឍសេដ្ឋជាតិ ប្រកបដោយចីរភាព កាត់បន្ថយភាពក្រីក្រ និងលើកកម្ពស់គុណភាពជីវិតរបស់ប្រជាពលរដ្ឋ។

ផ្អែកតាមបទពិសោធន៍ និងភាពជោគជ័យនៃកំណែទម្រង់គ្រប់ថ្នាក់ ស្របតាមគោលបំណងរបស់រាជរដ្ឋាភិបាលកម្ពុជា បានពង្រីកវិសាលភាពនៃកំណែទម្រង់កាន់តែប្រសើរឡើង គ្រប់ក្រសួងស្ថាប័ន ថ្នាក់ជាតិ បានបង្កើត និងដាក់ ចេញឱ្យអនុវត្តលិខិតបទដ្ឋានគតិយុត្តជាច្រើន ជាពិសេសកម្មវិធីជាតិរយៈពេល១០ឆ្នាំ ដំណាក់កាលទី១ និងដំណាក់ កាលទី២ ដែលកំពុងអនុវត្តយ៉ាងសកម្មនៅថ្នាក់ក្រោមជាតិ។

ឯកឧត្តម សុខ លូ ថ្លែងបន្ថែមថា ការរៀបចំវេទិការវាងរាជរដ្ឋាភិបាល និងរដ្ឋបាលថ្នាក់ក្រោមជាតិ គឺជាកិច្ចការថ្មីមួយដែលរាជរដ្ឋាភិបាលនីតិកាលទី៧ នៃរដ្ឋសភា ក្រោមការដឹកនាំដ៏ឈ្លាសវៃប៉ិនប្រសព្វ និងប្រកបដោយគតិបណ្ឌិតរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានផ្ដោតការយកចិត្តទុកដាក់លើការបន្តពង្រឹង និងជំរុញកិច្ចដំណើរការកំណែទម្រង់វិមជ្ឈការ និងវិសហមជ្ឈការឱ្យកាន់តែស៊ីជម្រៅ ដើម្បីចូលរួមអនុវត្តកម្មវិធីនយោបាយ និងយុទ្ធសាស្ត្របញ្ចកោណដំណាក់

កាលទី១ សំដៅកសាងមូលដ្ឋានគ្រឹះឆ្ពោះទៅសម្រេចបានចក្ខុវិស័យកម្ពុជា ឆ្នាំ២០៣០ ក្លាយជាប្រទេសមានចំណូល មធ្យមកម្រិតខ្ពស់ និងឆ្នាំ២០៥០ ក្លាយជាប្រទេសមានចំណូលខ្ពស់។

ឯកឧត្តម សុខ លូ សង្កត់ធ្ងន់ថា ការរៀបចំវេទិការវាងរាជរដ្ឋាភិបាល និងរដ្ឋបាលថ្នាក់ក្រោមជាតិ ស្តីពីកំណែទម្រង់វិមជ្ឈការ និងវិសហមជ្ឈការ មានគោលបំណងពិគ្រោះយោបល់រវាងរាជរដ្ឋាភិបាល ដែលមានក្រសួងស្ថាប័នថ្នាក់ជាតិ ជាមួយរដ្ឋបាលថ្នាក់ក្រោមជាតិ និងអង្គការសង្គមស៊ីវិល រួមគ្នាវាយតម្លៃអំពីវឌ្ឍនភាពបញ្ហាប្រឈម សំណូមពរ កំណត់ដំណោះស្រាយ និងការដាក់ចេញនូវការតម្រង់ទិសផ្នែកគោលនយោបាយ សម្រួចការអនុវត្តកំណែទម្រង់វិមជ្ឈការ និងវិសហមជ្ឈការ ឱ្យកាន់តែប្រសើរឡើង។ វេទិកានេះនឹងត្រូវរៀបចំជាទៀងទាត់រៀងរាល់៣ឆ្នាំម្ដង ដោយចាប់ផ្តើមអនុវត្តដំបូងនាឆ្នាំនេះ។

ឯកឧត្តមអភិបាលខេត្តស្នើសុំឱ្យអង្គវេទិកាទាំងមូលយកចិត្តទុកដាក់ស្តាប់បទបង្ហាញ និងចូលរួមពិភាក្សាឱ្យបានផុលផុស ដើម្បីជាធាតុចូលសម្រាប់ជាមូលដ្ឋានក្នុងការអនុវត្តកំណែទម្រង់វិមជ្ឈការនិងវិសហមជ្ឈការឱ្យទទួលបានជោគជ័យសម្រេចបានចក្ខុវិស័យកម្ពុជាឆ្នាំ២០៥០ខាងមុខ៕

យោងតាមសេចក្ដីណែនាំរបស់រដ្ឋបាលខេត្ដបាត់ដំបង នាថ្ងៃទី៧ ខែធ្នូ ឆ្នាំ២០២១ បានឱ្យដឹងថា ដើម្បីចូលរួមទប់ស្កាត់ ការចូលទន្ទ្រានកាន់កាប់ដោយខុសច្បាប់នូវដីរដ្ឋព្រៃលិចទឹកតំបន់៣ រដ្ឋបាលខេត្ដបាត់ដំបង សូមធ្វើការណែនាំ និងដាក់វិធានការរួមមានដូចខាងក្រោម៖

១. ត្រូវបានបដិសេធ និងមោឃភាពរាល់លិខិត និងឯកសារទាំងឡាយណាដែលរដ្ឋបាលស្រុក រដ្ឋបាលឃុំ និងភូមិ បានចុះហត្ថលេខាបញ្ជាក់កន្លងមកលើការកាន់កាប់អាស្រ័យផល ការផ្ទេរសិទ្ធដីធ្លី លិខិតទិញលក់ ជួលបញ្ចាំ ពាក្យស្នើរសុំកាន់កាប់ដីធ្លី ឬពាក្យស្នើរសុំប្រើប្រាស់ដីធ្លី ការបញ្ជាក់ទទួលស្គាល់ផ្សេងៗ ការបញ្ជាក់ប្លង់ទីតាំង និងលិខិតទិញ លក់ ដោយខ្លួនឯងរវាងបុគ្គលអ្នកលក់ និងបុគ្គលអ្នកទិញ នៅលើដីរដ្ឋព្រៃលិចទឹកតំបន់៣ ក្នុងភូមិសាស្រ្ដខេត្ដបាត់ដំបង ។

២. រដ្ឋបាលស្រុក រដ្ឋបាលឃុំ និងភូមិ ត្រូវបញ្ឈប់ការចុះហត្ថលេខាបញ្ជាក់ផ្សេងៗ មានលិខិតផ្ទេរសិទ្ធការទិញ លក់ ជួលបញ្ចាំ ពាក្យស្នើរសុំកាន់កាប់ដីធ្លី ពាក្យស្នើរសុំប្រលប្រាស់ដីធ្លី  និងបញ្ជាក់ប្លង់បង្ហាញទីតាំង នៅលើដីរដ្ឋព្រៃលិចទឹកតំបន់៣ នៅក្នុងដែនសមត្ថកិច្ចរបស់ខ្លួន ។

៣. ត្រូវទទួលខុសត្រូវ និងប្រឈមមុខជាមួយនឹងផ្លូវច្បាប់ជាធរមាន ដោយគ្មានការលើកលែងឡើយ ករណីបុគ្គលដែលតំណាងឱ្យរដ្ឋបាលស្រុក រដ្ឋបាលឃុំ និងភូមិណាមួយនៅតែបន្តចុះហត្ថលេខាបញ្ជាក់លើលិខិត និងឯកសារទាំងនេះ។

សេចក្ដីប្រកាសបញ្ជាក់ថា ចាប់ពីទទួលបានសេចក្ដីណែនាំនេះរដ្ឋបាលស្រុកមោងឬស្សី រដ្ឋបាលស្រុកសង្កែ រដ្ឋបាលស្រុកឯកភ្នំ រដ្ឋបាលស្រុកថ្មគោល រដ្ឋបាលឃុំពាក់ព័ន្ធតំបន់៣ បឹងទន្លេសាបទាំងអស់ និងមន្ទីរអង្គភាព ស្ថាប័ននានា ដែលមានការពាក់ព័ន្ធ ត្រូវចូលរួមអនុវត្តឱ្យបានម៉ឺងម៉ាត់ និងមានប្រសិទ្ធភាពប្រកប ដោយការទទួល ខុសត្រូវខ្ពស់រៀងៗខ្លួន ចាប់ពីថ្ងៃចុះហត្ថលេខាតទៅ។

គួបញ្ជាក់ថា យោងតាមរបាយណ៍ការក្រុមការងារអន្តរក្រសួង ដីព្រៃលិចទឹកតំបន់៣ ក្នុងភូមិសាស្រ្ដខេត្ដបាត់ដំបង មានស្រុកចំនួន៤ ជាប់តំបន់ដីព្រៃលិចទឹកតំបន់៣ បឹងទន្លេសាប ត្រូវបានកាប់ទន្រ្ទានអស់ផ្ទៃដីចំនួន ១២ ២២១ហិកតាក្នុងនោះ ស្រុកសង្កែតំបន់ដីព្រៃលិចទឹកដែលបានទន្រ្ទានកាន់កាប់ អស់ផ្ទៃដី ១ ១៤៥ហិកតា ស្រុកថ្មគោលតំបន់ដីព្រៃលិចទឹកដែលបានកាប់ទន្រ្ទានកាន់កាប់អស់ផ្ទៃដី ៣៨៦ហិកតា ស្រុកមោងឬស្សី តំបន់ដីព្រៃលិចទឹកដែលបានទន្រ្ទានកាន់កាប់អស់ផ្ទៃដី ២ ១៤៧ហិកតា ស្រុកឯកភ្នំតំបន់ដីព្រៃលិចទឹក ដែលបានទន្រ្ទានកាន់កាប់ អស់ផ្ទៃដី ៣០ ៥៣ហិកតា៕