តាមរយៈសេចក្ដីជូនដំណឹងកាលពីថ្ងៃទី២ មិថុនាកន្លងទៅ អាជ្ញាធរស្រុកកៀនស្វាយលើកឡើងថាម្ចាស់ទីតាំងដីឡូតិ៍ និងបងប្អូនអាជីវករដែលលក់ដូរនៅតាមដងផ្លូវសាធារណៈដែលបានសាងសង់តូប រាន លើចំណីផ្លូវ នៅមុខការិយាល័យរបស់រដ្ឋ ដែលបង្កផលប៉ះពាល់ដល់សណ្ដាបធ្នាប់សាធារណៈ ដោយកន្លងមកមានបងប្អូនអាជីវករមួយចំនួនបានលក់ដូរលើខឿននិងខ្លះទៀតលក់រហូតដល់លើផ្លូវសាធារណាៈរបស់រដ្ឋថែមទៀតផង។

រដ្ឋបាលស្រុកសង្កត់ធ្ងន់ថា” សូមជូនដំណឹងដល់អាជីវករទាំងអស់សូមរុះរើតូប គ្រែ រោង របាំង និងបញ្ឈប់ការលក់ដូរលើខឿន ឬចំណីផ្លូវសាធារណៈឲ្យបានមុនថ្ងៃទី១៦ ខែ មិថុនា ឆ្នាំ ២០២១ជាកំហិត។ករណីមិនគោរពតាមការណែនាំនេះអាជ្ញាធរមានសមត្ថកិច្ចនឹងចាត់វិធានការផ្លូវច្បាប់ជាធរមាន”។
ចំពោះម្ចាស់ទីតាំងដីឡូតិ៍ដែលមានបំណងចង់សាងសង់តូប រាន សម្រាប់ជួលឲ្យអាជីវករលក់ដូរត្រូវមានច្បាប់អនុញ្ញាតជាមុនសិន៕