លោក ហូ ណាំ ម្ចាស់កសិដ្ឋានចិញ្ចឹមមាន់បានប្រាប់ឲ្យដឹងថា “ត្រឹមរយៈពេល ៣ថ្ងៃ មាន់១៣០០ក្បាលឈឺងាប់គ្មានសល់”។

លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានឲ្យដឹងនៅល្ងាចថ្ងៃទី១១ ខែមករា  នេះថា លទ្ធផលធ្វើតេស្តលើសំណាកសត្វមាន់ដែលងាប់ជាង ១០០០ក្បាល នៅភូមិព្រែកតាច្រែង ឃុំព្រែកនរិន្ទ ស្រុកឯកភ្នំ ខេត្តបាត់ដំបង បានបង្ហាញថា គឺជាគ្រុនផ្តាសាយបក្សី (H5N1) ប៉ុន្តែប្រភេទជំងឺនេះ គឺមិនប៉ះពាល់ដល់មនុស្សទេ។

ក្នុងករណីនេះលោក ឈឹម វិជ្ជរ៉ា ប្រធានមន្ទីរកសិកម្ម រុក្ខាប្រមាញ់ និងនេសាទខេត្តបាត់ដំបង បានបញ្ជាក់ថា លោកចុះទៅពិនិត្យដល់ទីកន្លែងហើយ បានយកវត្ថុសំណាកទៅធ្វើការវិភាគនៅភ្នំពេញ។

លោកបន្ថែមទៀតថា ម្ចាស់កសិដ្ឋានចិញ្ចឹមមាន់ឈ្មោះ ហូ ណាំ ជាមន្ត្រីរមន្ទីរសុខាភិបាលខេត្តបាត់ដំបង រស់នៅភូមិព្រែកតាច្រែង ឃុំព្រែកនរិន្ទ ស្រុកឯកភ្នំ ចិញ្ចឹមមាន់ ទាកាប៉ាជាលក្ខណៈគ្រួសារ ។ លោកបន្តថា ករណីមាន់ងាប់នេះកើតឡើងតាំងពីថ្ងទី៥ ដល់ថ្ងៃទី៧ ខែមករា ឆ្នាំ២០២១ តែម្ចាស់កសិដ្ឋានមិនបានរាយការណ៍មកជំនាញបសុព្យាបាលស្រុក និងខេត្តឲ្យចុះទៅជួយអន្តរាគមន៍បាញ់ថ្នាំការពារទេ។

លោកបានបញ្ជាក់ថា ចំពោះមាន់ដែលងាប់មិនមែន ៣ពាន់ក្បាលទេ គឺងាប់តែ ១.៣០០ក្បាលប៉ុណ្ណោះហើយជំនាញប្រាប់ឲ្យយកទៅកប់ចោលមិនឲ្យយកទៅលក់ឲ្យអ្នកទិញយកទៅហូបទេ ព្រមទាំងខាងជំនាញបានយកវត្ថុសំណាកផ្ញើទៅធ្វើកោសល្យវិច្ច័យនៅភ្នំពេញរួចហើយព្រមទាំងជួយបាញ់ថ្នាំការពារនៅជុំវិញបរិវេណកសិដ្ឋាននេះផងដែរ។

លោកឈឹមវិជ្ជរ៉ាប្រធានមន្ទីរកសិកម្មខេត្តបាត់ដំបងបានអំពាវនាវពលរដ្ឋបេីឃេីញមាន់ឈឺរឺងាប់ខុសប្រក្រតីនិងសង្ស័យកេីតជម្ងឺផ្តាយសាយសូមរាយការណ៍ជាបន្ទាន់មកកាន់អជ្ញាធរមូលដ្ឋាននិមន្រ្តីការិយាល័យបក្សុព្យាបាលរឺមន្ទីរកសិកម្មផ្ទាល់ដេីម្បីចុះអន្តារគមន៍ភ្លាមៗ។

គួរបញ្ជាក់ថា សត្វមាន់ជាច្រើនក្បាលបានងាប់ជាបន្តបន្ទាប់ក្នុងកសិដ្ឋានស្ថិតនៅភូមិព្រែកតាច្រែង ឃុំព្រែកនរិន្ទ ស្រុកឯកភ្នំ ខេត្តបាត់ដំបង កាលពីថ្ងៃទី៥ ដល់ថ្ងៃទី៧ ខែមករា ឆ្នាំ២០២១ ករណីនេះបានធ្វើឲ្យប្រជាពលរដ្ឋរស់នៅតំបន់នោះ ព្រួយបារមម្ភខ្លាចមានជំងឺផ្តាសាយបក្សី៕

ភ្នំពេញ៖ ក្រសួងសុខាភិបាលកម្ពុជា នៅព្រឹកថ្ងៃទី១២ ខែមករា ឆ្នាំ២០២១នេះ បានចេញសេចក្ដីប្រកាសព័ត៌មានមួយ បានអោយដឹងថា អ្នកជំងឺកូវីដ១៩ ចំនួន២នាក់ ដែលជាពលករខ្មែរ ដែលធ្វើដំណើរត្រឡប់មកពីប្រទេសថៃ បានព្យាបាលជាសះស្បើយ ខណៈគ្មានអ្នកឆ្លងថ្មី។

តាមរយៈសេចក្ដីប្រកាសព័ត៌មាន ក្រសួងបញ្ជាក់ថា អ្នកព្យាបាលជាសះស្បើយទាំងពីរនាក់ រួមមាន៖

-ស្រ្តីជនជាតិខ្មែរ អាយុ៣៦ឆ្នាំ មានអាស័យដ្ឋាន ស្នាក់នៅឃុំបឹងរាំង ស្រុកកំរៀង ខេត្តបាត់ដំបង បានធ្វើដំណើរមកពីប្រទេសថៃ មកដល់កម្ពុជានៅថ្ងៃទី២៩ ខែធ្នូ ឆ្នាំ២០២០។

-ស្រ្តីជនជាតិខ្មែរ អាយុ៣៣ឆ្នាំ មានអាស័យដ្ឋាន ស្នាក់នៅឃុំស្ទឺងកាច់ ស្រុកសាលាក្រៅ ខេត្តប៉ៃលិន បានធ្វើដំណើរមកពីប្រទេសថៃ មកដល់កម្ពុជានៅថ្ងៃទី២៩ ខែធ្នូ ឆ្នាំ២០២០។

សូមបញ្ជាក់ថា គិតត្រឹមព្រឹកថ្ងៃទី១២ ខែមករា ឆ្នាំ២០២១នេះ កម្ពុជា រកឃើញអ្នកឆ្លងជំងឺកូវីដ១៩ សរុបចំនួន៣៩២នាក់ ក្នុងនោះបានព្យាបាលជាសះស្បើយសរុបចំនួន ៣៧៦នាក់ និងកំពុងសំរាកព្យាបាលនៅមន្ទីពេទ្យសរុបចំនួន១៦នាក់ (គ្មានអ្នកស្លាប់)៕