លោកងួន រតនៈ អភិបាលខេត្តបាត់ដំបងបានថ្លែងនៅថ្ងៃទី២១ ខែមករា ឆ្នាំ២០២១ក្នុងការអញ្ជើញជាអធិបតី ក្នុងកិច្ចប្រជុំបូកសរុប កិច្ចការងារធ្វើចត្តាឡីស័ក និងផែនការបន្ត សម្រាប់មណ្ឌលចត្តាឡីស័កក្នុងខេត្តបាត់ដំបងថា មណ្ឌលចត្តាឡីស័កក្រុង ស្រុក មួយចំនួនបានធ្វើការលាងសម្អាត បាញ់ថ្នាំសម្លាប់មេរោគ រួចប្រគល់ជូនលោកគ្រូអ្នកគ្រូ និងបានបើកដំណើរការឱ្យសិស្សានុ សិស្សចូលរៀនវិញហើយ រួមមាន៖ មណ្ឌលចត្តាឡីស័កក្រុងបាត់ដំបង( វិទ្យាល័យព្រះមុន្នីវង្ស) មណ្ឌលចត្តាឡីស័កស្រុកថ្មគោល (វិទ្យាល័យជ្រៃ) និងមណ្ឌលចត្តាឡីស័កស្រុកសង្កែ (វិទ្យាល័យអន្លង់វិល)។

លោកអភិបាលខេត្ដ បានណែនាំដល់រដ្ឋបាលស្រុកទាំង ៣ ជាប់ព្រំដែន រួមមាន៖ ស្រុកកំរៀង ស្រុកភ្នំព្រឹក និងស្រុកសំពៅលូន ត្រូវពិនិត្យទីតាំងសាលារៀនដែលជាមណ្ឌលចត្តាឡីស័ក ហើយត្រូវយកទីតាំងមណ្ឌលចត្តាឡីស័កណាមួយច្របាច់បញ្ចូលគ្នា និងត្រូវលាងសម្អាត បាញ់ថ្នាំសម្លាប់មេរោគ រួចប្រគល់ជូនលោកគ្រូ អ្នកគ្រូ ដើម្បីបើកដំណើរការសិក្សាឡើងវិញផងដែរ។

គួរឲ្យដឹងថា គិតត្រឹមថ្ងៃទី២០ ខែមករា ឆ្នាំ២០២១ ពលករដែលវិលត្រឡប់ពីប្រទេសថៃ ដែលកំពុងធ្វើចត្តាឡីស័កសរុបប្រមាណ ៣.០៧៩នាក់ បានបញ្ចប់ចត្តាឡីស័កប្រមាណ ១.៧១០នាក់ បញ្ជូនទៅបណ្តាខេត្តផ្សេងៗ ៣១៩នាក់ នៅសល់ក្នុងមណ្ឌលចត្តាឡីស័ក ១.០៥០នាក់ ហើយករណីកើតថ្មីចំពោះពលករមានផ្ទុកជំងឺកូវីដ-១៩ សរុប១៧នាក់ ជាសះស្បើយចំនួន ៧នាក់ និងកំពុងសម្រាកព្យាបាលនៅមន្ទីរបង្អែកខេត្ត ចំនួន ១០នាក់ ផងដែរ៕

លោក ងួន រតនៈ អភិបាលខេត្ដបាត់ដំបង បានណែនាំដល់រដ្ឋបាលស្រុក នៅក្នុងកិច្ចប្រជុំបន្ទាន់ស្តីពីការគ្រប់គ្រងពលករវិលត្រឡប់មកពីប្រទេសថៃ នៅថ្ងៃទី១៥ ខែមករា ឆ្នាំ២០២១ ត្រូវរៀបចំបន្ទប់ទឹកបន្ថែម និងរៀបចំផ្លូវឱ្យពួកគាត់សម្រាប់ប្រើប្រាស់ ដើម្បីជៀសវាងការប្រើប្រាស់ជាមួយពលករផ្សេងទៀត។

លោក សុខ គឹមខុន អភិបាលស្រុកកំរៀង បានឱ្យដឹងថា តាមរយៈទាហានទំនាក់ទំនងកម្ពុជា-ថៃ និងការផ្តល់ព័ត៌មានពីភាគីថៃ គឺថាមានករណីសង្ស័យពលករមួយចំនួន ដែលវិលត្រឡប់ពីប្រទេសថៃមានផ្ទុកជំងឺកូវិដ ១៩ ដែលត្រូវមានការប្រុងប្រយ័ត្នខ្ពស់ និងរៀបចំពួកគាត់ឱ្យរស់នៅដាច់ដោយឡែកពីពលករផ្សេងៗ។

ក្នុងកិច្ចប្រជុំនេះមានការអញ្ជើញចូលរួមពី ស្នងការ ស្នងការរងនគរបាលខេត្ត លោកអភិបាល អភិបាលរង ស្រុកទាំង ៣ ដែលស្ថិតនៅតាមបន្ទាត់ព្រំដែនខេត្ដបាត់ដំបង កម្លាំងវរៈការពារព្រំដែន កម្លាំងយោធភូមិភាគទី៥ និងកម្លាំងចម្រុះពាក់ព័ន្ធនានាជាច្រើនទៀត។

គួរបញ្ជាក់ថា លំហូរចូលពលករខ្មែរនៅតាមបន្ទាត់ព្រំដែននៅតែបន្តមានជាហូរហែរពីមួយថ្ងៃទៅមួយថ្ងៃប្រមាណជាង ៥០ ទៅ ១០០ នាក់ និងមានការកើនឡើងការផ្ទុះជំងឺកូវីដ ១៩៕

លោក ងួន រតនៈ អភិបាលខេត្ដបាត់ដំបង បានមានប្រសាសន៍កាលពីថ្ងៃទី៦ ខែមករា ឆ្នាំ២០២១ ក្នុងឱកាសអញ្ជើញសំណេះសំណាល និងចែកស្បៀងដល់អ្នករត់កង់បី និងផាស់ស្អាប់ ថា ខណៈនេះនៅប្រទេសថៃ មានការឆ្លងរីករាលដាលច្រើននូវជំងឺកូវីដ១៩ ក្នុងសហគមន៍ ហើយពលករខ្មែរកំពុងធ្វើការនៅទីនោះក៏បាននាំគ្នាត្រឡប់មកស្រុកកំណើតវិញដោយអ្នកខ្លះក៏បានឆ្លងជំងឺកូវីដ១៩ កំពុងសម្រាកព្យាបាលក្នុងមន្ទីរពេទ្យ រួមទាំងពលករផ្សេងៗទៀត ត្រូវបានធ្វើចត្តាឡីស័កដោយត្រឹមត្រូវ។

លោកបន្តថា ដោយបញ្ហានេះ ក៏បានធ្វើឲ្យមានការព្រួយបារម្ភ ដូច្នេះសូមបងប្អូនជាអ្នកបម្រើសេវាកម្មដឹកជញ្ជូនភ្ញៀវទេសចរណ៍ទាំងអស់ សូមមានការប្រុងប្រយ័ត្ន អនុវត្តនូវវិធានការអនាម័យ តាមសេចក្តីណែនាំរបស់ក្រសួងសុខាភិបាល មានពាក់ម៉ាស់ឲ្យបានត្រឹមត្រូវ លាងដៃនឹងទឹកស្អាត ជែល អាល់កុល ហើយត្រូវរក្សាគម្លាតសង្គមជាដើម ។

លោកអភិបាលខេត្ត ក៏បានអំពាវនាវដល់អ្នករត់កង់បី និងផាស់ស្អាប់ ត្រូវចូលរួមថែរក្សាសណ្ដាប់ធ្នាប់ក្រុងតាមរយៈការបើកបរនិងការចតឲ្យមានរបៀបរៀបរយចៀសវាងបង្កការរំខានដល់ភ្ញៀវទេសចរ ឬអ្នករួមដំណើរលើផ្លូវតែមួយ ហើយក៏ត្រូវត្រៀមជានិច្ច នូវការទទួលភ្ញៀវទេសចរមកលេងកម្សាន្តនៅក្នុងខេត្ត ដើម្បីស្ដារជីវភាពឡើងវិញ នៅពេលជំងឺកូវីដ១៩ បានធូរស្បើយនៅទូទាំងពិភពលោក ខណៈបញ្ហាជំងឺកូវីដ១៩ដ៏កាច់សាហាវនេះ បានប៉ះពាល់ដល់មុខរបរអ្នកបម្រើសេវាកម្មដឹកជញ្ជូនទាំងអស់នេះ។

ពលរដ្ឋម្នាក់តំណាង អ្នកដែលបានទទួលអំណោយទាំងអស់ បានថ្លែងអំណរគុណដល់អាជ្ញាធរខេត្ត ដែលបានយកចិត្តទុកដាក់ពីសុខទុក្ខរបស់ពួកគាត់ ហើយពួកគាត់សន្យា នឹងអនុវត្តទៅតាមការណែនាំរបស់អាជ្ញាធរ ។
គួរឲ្យដឹងផងដែរថា អំណោយផ្ដល់ជូនអ្នករត់កង់បី និងរត់ផាស់ស្អាប់នោះ រួមមានអង្ករ ត្រីខ សាប៊ូលាងដី ទឹកសុទ្ធ និងថវិកាមួយចំនួន៕