ក្រសួងបន្តថា បន្ទាប់ពីបានទទួលព័ត៌មាន ក្រុមការងារនៃរដ្ឋបាលជលផល និងអង្គការ WWF បានចុះពិនិត្យសាកសព និងរកឃើញថា​ សត្វផ្សោតដែលស្លាប់នេះ​ ជាផ្សោតញី មានលេខសម្គាល់ ០៨៧ ទម្ងន់១០៥គក្រ និងប្រវែង ២,១០ម៉ែត្រ អាយុប្រមាណ ២៧ឆ្នាំ (សត្វផ្សោតរស់បានពី២៥-៣០ឆ្នាំ)។

ក្រសួងកសិកម្មបន្ថែមថា នៅពេលរកឃើញ​ សពសត្វផ្សោតមានសភាពហើម មានក្លិនស្អុយ ធ្លាយពោះ និងរលេះរលួយស្បែក។​ ចំណែកមូលហេតុនៃការស្លាប់​ តាមរយៈការធ្វើកោសល្យវិច្ច័យ គឺបណ្តាលមកពីវ័យចាស់ជរា។

សូមបញ្ជាក់ជូនថា​ នៅក្នុងរយៈពេល៩ខែ ក្នុងឆ្នាំ២០២៣នេះ នៅកម្ពុជា មានសត្វផ្សោតកើតថ្មីចំនួន៧ក្បាល និងស្លាប់ចំនួន៤ក្បាល​ ដោយក្នុងចំណោមផ្សោតដែលស្លាប់នោះ មានផ្សោតចាស់១ក្បាល ផ្សោតជំទង់១ក្បាល និងកូនផ្សោតចំនួន២ក្បាល៕

ករណីនេះប្រជាសហគមន៍ទេសចរណ៍នាំគ្នាសោកស្តាយ ព្រោះវាបាត់បង់សត្វផ្សោតមេពូជអាចធ្វើឱ្យមានការថមថយបរិមាណ សត្វផ្សោតនិងអាចបាត់បង់ក្នុងពេលដ៏ឆាប់ខាងមុខនេះ។

ក្នុងសកម្មភាពត្រួតពិនិត្យសំណាកត្រីផ្សោតដែលបានស្លាប់អណ្តែតទឹកកាលពីថ្ងៃទី១៤ ខែមិថុនា ឆ្នាំ២០២១នេះ លោក ដនបាន់ ឆ្មាំទន្លេប្រចាំការនៅឃុំព្រះរំកិលខេត្តស្ទឹងត្រែងបានបញ្ជាក់ថា តាមការពិនិត្យជាក់ ស្ដែង ត្រីផ្សោតដ៏ធំមួយក្បាល នេះ វាទើបតែស្លាប់ថ្មីៗអាចរងផលប៉ះពាល់ពីអ្នកលួចលាក់ធ្វើនេសាទខុសច្បាប់នៅពេលយប់។

លោកអះអាងថា សត្វផ្សោត ញីមួយក្បាលនេះ វារស់នៅក្នុងអន្លង់ផ្សោតអូរឈើទាលកន្លែងតំបន់ទេសចរណ៏ផ្សោតព្រះរំកិល ដែលមានទំងន់ ប្រមាណជិត ២០០ គីឡូក្រាម និងមានប្រវែងជាង២ម៉ែត្រ បច្ចុប្បន្ន ក្រុមមន្ត្រីជំនាញរបស់រដ្ឋបាលជលផលខេត្ត និងបុគ្គលិកអង្គការWWF បានធ្វើសំណាកទៅតាមបច្ចេកទេសទាក់ទងទៅនឹងការស្លាប់របស់សត្វផ្សោតនេះ និងយកទៅរក្សាទុកដើម្បីធ្វើពិសោធន៍រក ហេតុផលនៃការស្លាប់នេះ។

លោក ផយ វណ្ណា មន្ត្រីសហគមន៍ទេសចរណ៍នៅតំបន់ផ្សោតព្រះរំកិលនេះ បានបញ្ជាក់ថា៖កាលពី២ខែមុន សត្វផ្សោតបានស្លាប់មួយរួចមកហើយ ចំណែកខាងអង្គការ WWF យកសំណាកត្រីផ្សោតទៅពិនិត្យរកមូលហេតុ តែមិនបានចេញជាលទ្ធផលយ៉ាងណានោះទេ ហើយយុទ្ធសាស្ត្រការពារក៏មិនទាន់មានដែរ។

លោកស្នើឱ្យមន្ត្រីជំនាញពាក់ព័ន្ធទាំងអស់រិះរកយន្តការធ្វើការអភិរក្សឱ្យមានប្រសិទ្ធភាពនិងកុំទម្លាក់កំហុសទៅលើអាកាសធាតុប្រែប្រួល។

សូមបញ្ចាក់ថា នេះជាការស្លាប់ត្រីផ្សោតទី២ហើយ នៅខេត្តស្ទឹងត្រែងក្នុងឆ្នាំ២០២១នេះ ព្រោះកាលពីថ្ងៃទី២៣មេសាក៏មានសត្វផ្សោតញី១ក្បាល ទម្ងន់ជាង១រយគីឡូក្រាម បានស្លាប់រួចមកហើយដែរ៕

សហគមន៍កោះព្រហ្មចារីយ៍ ជាសហគមន៍អេកូទេសរណ៍ថ្មីមួយ នៅតាមបណ្តោយដងទន្លេមេគង្គ ស្ថិតក្នុងឃុំជ្រោយបន្ទាយ ស្រុកព្រែកប្រសព្វ ខេត្តក្រចេះ មានចម្ងាយប្រមាណ ១៧ គីឡូម៉ែត្រពីទីរួមខេត្ត។ សហគមន៍នេះទើបតែត្រូវបានបង្កើតឡើងនៅចុងឆ្នាំ២០២០ ដោយមានការជួយជ្រោមជ្រែង ពីមន្ទីរទេសចរណ៍ខេត្តក្រចេះ និងអង្គការ WWF។

ក្នុងឱកាសជួបសំណេះសំណាល ជាមួយប្រជាសហគមន៍ព្រហ្មចារីយ៍ ជ្រោយបន្ទាយ កាលពីថ្ងៃទី២៩ មករា លោករដ្ឋមន្ត្រី ថោង ខុន បានលើកឡើងថា ខេត្តក្រចេះ គឺជាគោលដៅទេសចរណ៍ដ៏សំខាន់ ក្នុងចំណោមខេត្តដទៃនៅតំបន់ភូមិភាគឦសាន ពិសេសគឺមានសក្ដានុពល អេកូទេសចរណ៍ដ៏សម្បូរបែប ពិសេសគឺមានសត្វផ្សោត ដែលជាសត្វដ៏កម្រនៅលើពិភពលោក។

លោកបន្តថា ភ្ញៀវអន្តរជាតិភាគច្រើន គឺចង់មកទស្សនាសត្វផ្សោត ទន្លេមេគង្គនៅកម្ពុជា។ សម្រាប់ខេត្តក្រចេះ ក៏ដូចជាខេត្តស្ទឹងត្រែង សត្វផ្សោតគឺប្រៀបដូចជាប្រាសាទអង្គរវត្តទីពីរយ៉ាងដូច្នេះដែរ ដែលនៅលើពិភពលោកសត្វប្រភេទនេះ បានផុតពូជសឹងតែអស់ហើយ ប៉ុន្តែមានសក្ដានុពលដ៏មានភាពទាក់ទាញ និងមានគុណតម្លៃដ៏ធំមហាសាល សម្រាប់វិស័យទេសចរណ៍ជាតិ។

ដោយសារចេះតែមានការរំខានធ្វើឱ្យសត្វផ្សោតបាត់បង់ជាបន្តបន្ទាប់ លោករដ្ឋមន្ត្រីបានស្នើយ៉ាងទទូចដល់ប្រជាសហគមន៍ អ្នកប្រកបរបរនេសាទ ក៏ដូចជាអង្គការ WWF និងភាគីពាក់ព័ន្ធដទៃទៀត ត្រូវបន្តរួមគ្នាថែរក្សាអភិរក្សសត្វផ្សោត ក៏ដូចជាសត្វព្រៃដទៃទៀត (សត្វក្ដាន់) ឱ្យបាននៅគង់វង្សតទៅមុខទៀត ដើម្បីបង្កើនភាពទាក់ទាញភ្ញៀវទេសចរនានា។

លោករដ្ឋមន្ត្រី បានស្នើឲ្យប្រជាពលរដ្ឋ កុំទៅនេសាទនៅកន្លែងសត្វផ្សោតរស់នៅ ពីព្រោះសត្វប្រភេទនេះងាយនឹងរងគ្រោះថ្នាក់ណាស់ និងមានការកកើតយឺត មិនអាចរំខានដល់ការរស់នៅ របស់ពួកវាបានឡើយ។នៅពេលប្រជាពលរដ្ឋថែរក្សាសត្វផ្សោតបានរស់នៅគង់វង្សហើយប្រជាពលរដ្ឋអាចងាកមកប្រកបមុខរបរបម្រើសេវាកម្ម ជូនភ្ញៀវទេសចរ នោះប្រជាពលរដ្ឋនឹងទទួលបានប្រាក់ចំណូលកាន់តែច្រើនពីវិស័យទេសចរណ៍ និងការចូលរួមអភិរក្សសត្វផ្សោត និងសត្វព្រៃដទៃ ពិសេសគឺទទួលបានប្រាក់ចំណូលច្រើនជាងការនេសាទ ជាងការកាប់ព្រៃឈើ ឬការបរបាញ់សត្វនោះទៅទៀត។

លោក ថោង ខុន ក៏បានណែនាំឱ្យមន្ទីរទេសចរណ៍ ត្រូវពង្រឹងការបណ្ដុះបណ្ដាលជំនាញ បដិសណ្ឋារកិច្ច ការបម្រើសេវាកម្មជូនភ្ញៀវឱ្យបានជាប្រចាំដើម្បីបង្កើនគុណភាពសេវាកម្ម ជូនភ្ញៀវទេសចរ បង្កើនការផ្សព្វផ្សាយអំពីគោលដៅរបស់ខ្លួន និងបង្កើនការទាក់ទាញភ្ញៀវបន្ថែមទៀតផងដែរ។ ប្រជាសហគមន៍ត្រូវចេះចិញ្ចឹមសត្វ ដាំបន្លែ ផ្លែឈើ និងពង្រីកផលិតផលទេសចរណ៍ ក្នុងសហគមន៍របស់ខ្លួនឱ្យកាន់តែច្រើន ត្រូវចេះច្នៃអ្វីដែលសហគមន៍មានឱ្យក្លាយទៅជា ផលិតផលទេសចរណ៍សម្រាប់ បង្ហាញទៅកាន់ភ្ញៀវទេសចរ នៅពេលពួកគេមកទស្សនានៅក្នុង សហគមន៍ព្រហ្មចារីយ៍ជ្រោយបន្ទាយនេះ។

លោករដ្ឋមន្ត្រីបានស្នើដល់រដ្ឋបាលខេត្តក្រចេះ ជួយសម្រួលការចរចាជាមួយរមណីដ្ឋានអន្លង់ផ្សោតកាំពី ដើម្បីមានភ្ញៀវមួយចំនួនចង់មកទស្សនាសហគមន៍ដោយភ្ជាប់ខ្សែរទស្សនកិច្ច ពីរមណីដ្ឋានអន្លង់ផ្សោតកាំពី ហើយសូមឱ្យមានការទំនាក់ទំនង ជាមួយសហគមន៍ព្រហ្មចារីយ៍ជ្រោយបន្ទាយ ដើម្បីឱ្យប្រជាសហគមន៍ទទួលបានកម្រៃពីការបម្រើសេវាកម្ម ជូនភ្ញៀវទេសចរ។

សូមជម្រាបថា សហគមន៍កោះព្រហ្មចារីយ៍ជ្រោយបន្ទាយនេះ សម្បូរទៅដោយសក្តានុពលទេសចរណ៍ បែបធម្មជាតិជាច្រីន រួមមាន៖ ព្រៃឈើ សត្វស្លាប កោះ សត្វព្រៃ (ពិសេសគឺសត្វក្តាន់) ទេសភាពព្រៃលិចទឹកទន្លេមេគង្គ សូម្បីតែសត្វផ្សោតទន្លេមេគង្គ ដ៏កម្រក៏ស្ថិតនៅតំបន់នេះផងដែរ។ នៅទីនេះទេសចរអាចជិះទូក មើលទេសភាពព្រៃលិចទឹក ទន្សនាសត្វស្លាប សម្រាកលម្ហែ ងូតទឹកកម្សាន្ត និងពិសាអាហារនៅតាមកោះស្អាតៗជាច្រើន។ សហគមន៍ក៏មានផ្តល់សេវាកម្មម្ហូបអាហារ និងស្នាក់នៅតាមផ្ទះស្នាក់សហគមន៍ផងដែរ៕

តាមរយៈហ្វេសប៊ុក នាថ្ងៃទី២៩ ខែមករា ឆ្នាំ២០២១នេះ លោក នេត ភក្ត្រា លើកឡើងថា “សត្វផ្សោតនៅអន្លង់ឈើទាល ទន្លេមេគង្គ ក្នុងឃុំព្រះរំកិល ស្រុកបូរីអូរស្វាយ ខេត្តស្ទឹងត្រែង ជាប់ព្រំប្រទល់រវាងព្រះរាជាណាចក្រកម្ពុជា និងប្រទេសឡាវ។ សត្វផ្សោតនៅអន្លង់នេះមានចំនួន៣ក្បាល ហើយពិតជាសំណាងណាស់ដែលសត្វផ្សោតមួយក្បាលនេះបានបង្ហាញខ្លួន និងហែលលេងឆ្វែលក្បែរទូក បង្ហាញឱ្យខ្ញុំនិងក្រុមការងារបានឃើញ។ នៅកម្ពុជា សត្វផ្សោតទឹកសាបមានប្រមាណជាង ៧០ ក្បាលប៉ុណ្ណោះ”។

ជាមួយគ្នានោះដែរ លោក នេត ភក្ត្រា ក៏បានអំពាវនាវសូមជួយថែរក្សាអភិរក្ស កុំនេសាទដាក់មង ឬឆក់ក្នុងទីតាំងដែលវារស់នៅ។ កម្ពុជាយើងមានជីវៈចម្រុះសម្បូណ៌បែប សូមជួយថែរក្សា! កុំឱ្យបាត់បង់ផុតពូជ បាននាំគ្នានឹកស្រណោះស្តាយ៕

លោក មួង ដា ជាអ្នកបើកទូកជូនភ្ញៀវទេសចរមើលសត្វផ្សោតនៅរម្មណីយដ្ឋានអន្លង់ផ្សោតកាំពី ដែលរស់នៅភូមិកាំពី ឃុំសំបុក ស្រុកចិត្របុរី ខេត្តក្រចេះ ជាអ្នកប្រទះឃើញ ហើយបានរាយការណ៍ជូនមកលោក គឹម គី និងលោក ស្រី ស៊ីថា ជាមន្ត្រីប៉ូលីសទេសចរណ៍ប្រចាំនៅរមណីយដ្ឋានអន្លង់ផ្សោតកាំពី។

ក្រោយពីបានព័ត៌មាននេះភ្លាមលោក គឹម គី និងក្រុមអ្នកបើកទូកជូនភ្ញៀវទេសចរក៏បានចុះ ទៅត្រួតពិនិត្យសាកសពសត្វផ្សោតនោះភ្លាមៗ និងបានកាត់សាច់មងដែលរុំជាប់ខ្លួនផ្សោត រួចបាននាំយកសាកសពផ្សោតមកប្រ គល់ជូនក្រុមការងារឆ្មាំទន្លេ ប្រចាំប៉ុស្តិ៍កាំពី។

បន្ទាប់មកក្រុមការងារឆ្មាំទន្លេក៏បានរាយការណ៍ជូនមកលោក ម៉ុក ពន្លក នាយខណ្ឌរដ្ឋបាលជលផលខេត្តក្រចេះ និងជាប្រធានឆ្មាំទន្លេប្រចាំខេត្តក្រចេះ ហើយបាននាំយកសាកសពសត្វផ្សោតនោះមកកាន់ទីរួមខេត្តក្រចេះ ពេលនោះលោកក៏បានចាត់មន្រ្តីជំនាញ ជានាយរងខណ្ឌរដ្ឋបាលជលផលខេត្តក្រចេះ និងជាមន្រ្តីសហការជាមួយអង្គការ WWF ប្រចាំខេត្តក្រចេះ រួមជាមួយមន្រ្តីផ្នែកស្រាវជ្រាវនៃអង្គការ WWF ប្រចាំខេត្តក្រចេះ ចុះទៅពិនិត្យ និងទទួលយកសាកសពសត្វផ្សោតនោះនៅចំណុចផែលើខេត្តក្រចេះ នាល្ងាចថ្ងៃទី១៤ ខែមករា ឆ្នាំ២០២១។

តាមការត្រួតពិនិត្យជាក់ស្តែងរបស់ក្រុមការងារឃើញថា សាកសពសត្វផ្សោតមានសភាពហើម រលាត់ស្បែកមួយចំនួន និងមានមងក្រឡាទំហំ១៥សង់ទីម៉ែត្ររុំជាប់នៅគល់កន្ទុយ និងលើដងខ្លួនទាំងមូលរបស់សាកសពសត្វផ្សោត។

ក្រោយពីបានធ្វើការពិនិត្យសាកសពសត្វផ្សោតរួចរាល់ក្រុមការងារក៏បានសន្និដ្ឋានថាសត្វផ្សោតនេះបានស្លាប់ដោយសារ ការជាប់ទៅនឹងមងនេសាទ វាជាផ្សោតពេញវ័យដែលរស់នៅអន្លង់ផ្សោតកាំពី ក្នុងភូមិកាំពី ឃុំសំបុក ស្រុកចិត្របុរី ខេត្តក្រចេះ។

បន្ទាប់ពីបានធ្វើការត្រួតពិនិត្យសាកសពផ្សោតរួចរាល់ហើយក្រុមការងារក៏បានធ្វើការ ថ្លឹងទម្ងន់ ថតរូប វាស់វែង ដែលមានទិន្ន័យសង្ខេបដូចខាងក្រោម៖ ផ្សោតដែលបានងាប់នេះ ជាផ្សោតឈ្មោល មានប្រវែង ១៩៨សង់ទីម៉ែត្រ ទម្ងន់៨៥គីឡូក្រាមអាយុកាលប៉ាន់ ប្រមាណពី១២ ទៅ១៥ឆ្នាំ ស្ថានភាពហើមស្អុយរយៈពេលស្លាប់ ប្រហែល៣ថ្ងៃ។

សូមរំលឹកថា សាកសពសត្វផ្សោតនេះជាផ្សោតទីពីរហើយដែលបានស្លាប់នៅក្នុងឆ្នាំ២០២១នេះ ចាប់ពីថ្ងៃទី១ ដល់ថ្ងៃទី១៤ ខែមករា ដែលក្នុងនោះរួមមានកូនផ្សោតចំនួន១ក្បាលបានស្លាប់ និងផ្សោតពេញវ័យចំនួន១ក្បាលបានស្លាប់៕