ក្នុងជំនួបពិភាក្សាការងារជាមួយ លោក MIKAMI Masahiro ឯកអគ្គរាជទូតជប៉ុន ប្រចាំព្រះរាជាណាចក្រកម្ពុជា នារសៀលថ្ងៃទី១០ ខែមិថុនា ឆ្នាំ២០២១ នៅទីស្ដីការក្រសួងមហាផ្ទៃ សម្ដេចក្រឡាហោម ស ខេង បានមានប្រសាសន៍ថា «ជាការពិតបណ្ដាព្រឹត្តិការណ៍ជាតិធំៗ ក៏ដូចជា ព្រឹត្តិការណ៍អន្តរជាតិធំៗ ដែលកម្ពុជានឹងធ្វើជាម្ចាស់ផ្ទះ ព្រមទាំងប្រារព្ធធ្វើជាបន្តបន្ទាប់នោះ កម្ពុជាបានត្រៀមថានឹងប្រព្រឹត្តទៅតាមកាលវិភាគ ឬកម្មវិធីដែលបានគ្រោងទុក ដោយមិនមានអ្វីប្រែប្រួលនោះឡើយ»។

នាឱកាសនោះ លោកឯកអគ្គរាជទូតជប៉ុន លើកឡើងថា នៅក្នុងឆ្នាំ២០២១ និងឆ្នាំបន្តបន្ទាប់ទៀត កម្ពុជានឹងត្រូវប្រារព្ធធ្វើនៅព្រឹត្តិការណ៍ជាតិ និងអន្តរជាតិធំៗជាច្រើន ដូចជា កិច្ចប្រជុំកំពូលអាស៊ីអឺរ៉ុប និងប្រធានអាស៊ានឆ្នាំ២០២២ និងព្រឹត្តិការណ៍ជាតិ ដូចជា ការបោះឆ្នោត ជាបន្ទាប់។
លោកក៏បានលើកឡើងពីការត្រៀមខ្លួនរបស់ភាគីជប៉ុន សម្រាប់ការបន្តធ្វើកិច្ចសហប្រតិបត្តិការជាមួយ រាជរដ្ឋាភិបាលកម្ពុជា ក៏ដូចជា ក្រសួងមហាផ្ទៃ ក្នុងការរួមចំណែកធ្វើឱ្យព្រឹត្តិការណ៍ជាតិ និងព្រឹត្តិការណ៍អន្តរជាតិធំៗទាំងនោះ មានដំណើរការទៅប្រកបដោយជោគជ័យ។

ជាការឆ្លើយតប សម្ដេចក្រឡាហោម ស ខេង បានថ្លែងអំណរគុណដល់បំណងដ៏ល្អរបស់ភាគីជប៉ុន ដែលត្រៀមផ្ដល់កិច្ចសហការគាំទ្រដល់ការប្រារព្ធបណ្ដាព្រឹត្តិការណ៍ធំៗទាំងនោះឱ្យទទួលបានជោគជ័យ។ ក្នុងនាមថ្នាក់ដឹកនាំក្រសួងមហាផ្ទៃ សម្ដេច ក៏ត្រៀមខ្លួនក្នុងការបន្តនូវកិច្ចសហប្រតិបត្តិការ ក៏ដូចជា ពិភាក្សាលើបញ្ហានានា ក្នុងគោលដៅពង្រឹងពង្រីកិច្ចសហប្រតិបត្តិការទ្វេភាគី កម្ពុជា-ជប៉ុន ឱ្យកាន់តែរីកចំរើនខ្លាំងក្លាថែមទៀត៕

សម្ដេចក្រឡាហោម ស ខេង បានបញ្ជាក់ថា នាពេលកន្លងមក ក្នុងនាមសម្ដេចផ្ទាល់តែងតែផ្ដល់ការលើកទឹកចិត្តដល់អាជ្ញាធរពាក់ព័ន្ធ ជាពិសេសអាជ្ញាធរមូលដ្ឋានឲ្យបន្ដកិច្ចសហប្រតិបត្តិការក្នុងភាពជាដៃគូរជាមួយនឹងភាគីពាក់ព័ន្ធ ក្នុងការធ្វើយ៉ាងណា ខិតខំរួមគ្នាដោះស្រាយនូវបញ្ហាប្រឈម ដើម្បីបម្រើដល់ផលប្រយោជន៍រួម។
សម្ដេចក្រឡាហោម ក៏បានបន្ដថា រាជរដ្ឋាភិបាលកម្ពុជា ក៏ដូចជា អាជ្ញាធរមូលដ្ឋានតែងតែចាត់ទុកអ្នកធ្វើការពាក់ព័ន្ធក្នុងវិស័យបរិស្ថាននេះ ជាដៃគូ ហើយតែងតែលើកទឹកចិត្តជំរុញឱ្យអ្នកធ្វើការក្នុងវិស័យទាំងអស់ឲ្យចាត់ទុកអាជ្ញាធរមូលដ្ឋាន ក៏ដូចជា រាជរដ្ឋាភិបាល ជាដៃគូរទៅវិញទៅមក ដែលធ្វើការរួមជាមួយគ្នាដើម្បីដោះស្រាយបញ្ហាផ្សេងៗ។

ទន្ទឹមនឹងនេះ សម្ដេចក្រឡាហោម បានសង្កត់ធ្ងន់ថា កន្លងមកក៏មានសកម្មភាពមួយចំនួនដែលបានឡើងក្រោមហេតុផលរបស់សកម្មភាពការពារបរិស្ថាននេះ ប៉ុន្ដែក្នុងចេតនាបង្កឲ្យមានអសន្ដិសុខ ក៏ដូចជា ប៉ះពាល់ដល់សណ្ដាប់ធ្នាប់សាធារណៈ ហើយសកម្មភាពទាំងនោះ គឺអាជ្ញាធរមានសមត្ថកិច្ចត្រូវតែមានវិធានការសមស្របតាមច្បាប់។

ពាក់ព័ន្ធកិច្ចសហប្រតិបត្តិការទៅលើវិស័យបរិស្ថាននេះផងដែរ លោក W. Patrick Murphy ក៏បានលើកឡើងថា បច្ចុប្បន្ននេះ អាមេរិកមានគម្រោងមួយចំនួន ពាក់ព័ន្ធទៅនឹងការងារបរិស្ថាននេះ កំពុងតែដំណើរការនៅកម្ពុជា ក្រោមការជួយគាំទ្រពីសហរដ្ឋអាមេរិក ហើយលោករំពឹងថា វឌ្ឍនភាពនឹងបន្ដរីកចម្រើនទៅលើការងារទាំងនោះដែលពាក់ព័ន្ធទៅលើវិស័យបរិស្ថាន។

ជាការឆ្លើយតប សម្ដេចក្រឡាហោម ស ខេង ក៏បានលើកឡើងថា នេះជាឱកាសមួយក្នុងការពង្រីកកិច្ចសហប្រតិបត្តិការមួយផ្នែកទៀតក្រៅពីការងារពង្រឹងកិច្ចសហប្រតិបត្តិការអនុវត្តច្បាប់ ហើយភាគីទាំងពីរ អាចកំណត់នូវវិស័យផ្សេងៗទៀតសម្រាប់កិច្ចប្រតិបត្តិការជាមួយគ្នា៕

យោងតាមសារផ្ញើជូន ដល់អាជ្ញាធរមានសមត្ថកិច្ច និងកងម្លាំងអនុវត្តច្បាប់ ក្នុងស្ថានភាពនៃការអនុវត្តវិធានការបិទខ្ទប់ដើម្បីទប់ស្កាត់ការឆ្លងរាលដាលនៃជំងឺកូវីដ-១៩នាថ្ងៃទី២១ ខែមេសា សម្ដេច ស ខេងបានឲ្យដឹងាថា”ក្នុងនាមថ្នាក់ដឹកនាំក្រសួងមហាផ្ទៃ និងក្នុងនាមខ្ញុំផ្ទាល់ ខ្ញុំសូមសម្ដែងនូវការកោតសរសើរយ៉ាង ស្មោះស្ម័គ្រចំពោះកិច្ចខិតខំប្រឹងប្រែងរបស់អាជ្ញាធរមានសមត្ថកិច្ច និងកងកម្លាំងអនុវត្តច្បាប់ពាក់ព័ន្ធទាំងអស់ ដែលបាន និងកំពុងចាត់តាំងអនុវត្តយ៉ាងសកម្មផុលផុសនូវគោលការណ៍នានារបស់រាជរដ្ឋាភិបាល ប្រកបដោយការប្តេជ្ញាចិត្ត និងស្មារតីទទួលខុសត្រូវខ្ពស់ ក្នុងភារកិច្ចបិទខ្ទប់ដើម្បីទប់ស្កាត់ការឆ្លងរាលដាល នៃជំងឺកូវីដ-១៩ តាមមូលដ្ឋាននានាក្នុងរាជធានីភ្នំពេញ និងក្រុងតាខ្មៅ នៃខេត្តកណ្តាល”។

សម្តេចក្រឡាហោម បញ្ជាក់ថា “សូមក្រើនរំលឹកដល់អាជ្ញាធរពាក់ព័ន្ធ និងកងកម្លាំងអនុវត្តច្បាប់ទាំងអស់ បន្តយកចិត្តទុកដាក់បំពេញភារកិច្ចប្រកបដោយការអត់ធ្មត់ ដោយប្រកាន់ខ្ជាប់នូវវិន័យ អាកប្បកិរិយាថ្លៃថ្នូរ ម៉ឺងម៉ាត់ និងត្រូវគោរពគោលកាណ៍នៃក្រមសីលធម៌វិជ្ជាជីវៈរបស់កងកម្លាំងឲ្យបានជាដាច់ខាត ជាពិសេសត្រូវចៀសវាងការប្រើប្រាស់អំពើហិង្សាក្នុងការដោះស្រាយបញ្ហា នៅពេលអនុវត្តរាល់បទបញ្ជា ឬវិធានការ នានារបស់រាជរដ្ឋាភិបាល”។

សម្តេចបន្តថា ក្នុងនាមថ្នាក់ដឹកនាំក្រសួងមហាផ្ទៃ យើងខ្ញុំយល់ច្បាស់អំពីការលំបាក ផលប៉ះពាល់ និងបញ្ហាប្រឈមផ្សេងៗ ដែលអាជ្ញាធរមានសមត្ថកិច្ច ព្រមទាំងកងកម្លាំងអនុវត្តច្បាប់ទាំងអស់ កំពុងជួបប្រទះ នៅក្នុងស្ថានភាពបច្ចុប្បន្ននេះ។ ក៏ប៉ុន្តែទោះបីយ៉ាងណា ខ្ញុំសូមជំរុញទឹកចិត្តឲ្យបងប្អូនបន្តរក្សា និងប្រកាន់ខ្ជាប់នូវការអត់ធ្មត់ខ្ពស់ ដើម្បីទទួលបានការគាំទ្រ និងការចូលរួមពីគ្រប់មជ្ឈដ្ឋាន ក្នុងការបំពេញបេសកកម្ម ដ៏មានសារៈសំខាន់លើសមរភូមិប្រយុទ្ធប្រឆាំងជំងឺកូវីដ-១៩ ឲ្យទទួលបានជោគជ័យ។

ទន្ទឹមនេះ សម្តេចក្រឡាហោម ស ខេង បានអំពាវនាវដល់ប្រជាពលរដ្ឋទាំងអស់ ចូលរួមអនុវត្តវិធានការនានារបស់ រាជរដ្ឋាភិបាល ក៏ដូចជាសហការអនុវត្តតាមការណែនាំរបស់អាជ្ញាធរ និងកងកម្លាំងមានសមត្ថកិច្ច ដើម្បីបុព្វហេតុរួម នៃការកាត់ផ្ដាច់ និងឈានទៅបញ្ចប់ការឆ្លងរាលដាលក្នុងសហគមន៍នៃជំងឺកូវីដ-១៩ សំដៅនាំស្ថានការណ៍ និងគ្រប់សកម្មភាពរបស់សង្គម វិលមករកប្រក្រតីភាពឡើងវិញក្នុងពេលឆាប់ៗខាងមុខនេះ៕

តាមរយៈលិខិតចុះហត្ថលេខានៅថ្ងៃទី២៧ ខែមីនានេះ សម្ដេចក្រឡាហោម បានជម្រាបជូន អភិបាលនៃគណៈ អភិបាលរាជធានី ខេត្ត និងជាប្រធានគណៈបញ្ជាការឯកភាពរដ្ឋបាលរាជធានី ខេត្ត ថាក្រសួងសេដ្ឋកិច្ច និងហិរញ្ញវត្ថុ និងក្រសួងសុខាភិបាលបានដាក់ចេញប្រកាសអន្តរក្រសួងលេខ១៧៨ សហវ.ប្រក ចុះថ្ងៃទី១៩ ខែមីនា ឆ្នាំ២០២១ ស្តីពីការពិន័យជាប្រាក់ចំពោះបុគ្គល ឬនីតិបុគ្គលដែលប្រព្រឹត្តអំពើល្មើសនឹងវិធានការសុខាភិបាល ដើម្បីទប់ស្កាត់ការឆ្លងរាលដាលនៃជំងឺកូវដ-១៩ និងជំងឺឆ្លងកាចសាហាវ និងប្រកបដោយគ្រោះថ្នាក់ធ្ងន់ធ្ងរផ្សេងទៀត។

សម្ដេចបន្តថា ទន្ទឹមនេះ ក្រសួងសុខាភិបាលក៏បានដាក់ចេញប្រកាសលេខ០៨១ ស.នក.ប្រក ចុះថ្ងៃទី២២ ខែមីនា ឆ្នាំ២០២១ របស់ក្រសួងសុខាភិបាល ស្តីពីកាតព្វកិច្ចពាក់ម៉ាស និងកាតព្វកិច្ចរក្សាគម្លាត សុវត្ថិភាពក្នុងអំឡុងពេលនៃការឆ្លងរាលដាលជំងឺកូវីដ-១៩ ក្នុងសហគមន៍។

ពាក់ព័ន្ធនឹងការងារនេះ ហើយផ្អែកតាមសំណើរបស់ក្រសួងសុខាភិបាល និងដើម្បីចូលរួមសហការក្នុងការទប់ស្កាត់ការឆ្លងរាលដាលនៃជំងឺកូវីដ-១៩ ក្នុងព្រឹត្តិការណ៍សហគមន៍ ២០កុម្ភៈ ឲ្យមានប្រសិទ្ធភាព សម្ដេចក្នុងនាមរដ្ឋមន្ត្រីក្រសួងមហាផ្ទៃ បាននាំ អភិបាលនៃគណៈអភិបាលរាជធានី ខេត្ត និងជាប្រធានគណៈបញ្ជាការឯកភាពរដ្ឋបាលរាជធានី ខេត្ត ត្រូវផ្តល់ការគាំទ្រ និងគោលការណ៍ណែនាំដល់គណៈបញ្ជាការឯកភាពរដ្ឋបាលក្រុង ស្រុក ខណ្ឌ ត្រូវចូល រួមសហការឲ្យបានជិតស្និទ្ធជាមួយមន្ត្រីសុខាភិបាលក្នុងការអនុវត្តការផាកពិន័យអន្តរការណ៍លើបុគ្គល ឬនីតិបុគ្គលដែលមិនអនុវត្តនូវកាតព្វកិច្ចពាក់ម៉ាស និងកាតព្វកិច្ចរក្សាគម្លាតសុវត្ថិភាពបុគ្គល ស្របតាមច្បាប់ និងលិខិតបទដ្ឋានគតិយុត្តជាធរមាន។

នៅក្នុងការចាត់ចែងអនុវត្តការងារជាក់ស្តែង ប្រសិនបើមានជួបការលំបាក ឬបញ្ហាប្រឈមណាមួយ សម្ដេចក្រឡាហោមឧបនាយករដ្ឋមន្ត្រី បានណែនាំគណៈបញ្ជាការឯកភាពរដ្ឋបាលរាជធានី ខេត្ត ត្រូវរាយការណ៍ជូនក្រសួងសុខាភិបាល និងចម្លងជូនក្រសួងមហាផ្ទៃ ជាបន្ទាន់៕

ក្នុងពិធីប្រកាសចូលកាន់មុខតំណែង ជាប្រធានលេខាធិការដ្ឋាន អនុប្រធាន សមាជិក និងក្រុមជំនួយការ នៃលេខាធិការដ្ឋានគ្រប់គ្រងគ្រោះមហន្ដរាយក្រសួងមហាផ្ទៃ នាព្រឹកថ្ងៃទី៩ ខែកុម្ភៈ ឆ្នាំ២០២១ នៅទីស្ដីក្រសួងមហាផ្ទៃ សម្ដេច ស ខេង បានណែនាំទៅដល់សមត្ថកិច្ចទូទាំងប្រទេស ត្រូវបន្ដរួបរួមគ្នាទប់ស្កាត់អំពើជួញដូរមនុស្សនៅទូទាំងប្រទេសកម្ពុជាដើម្បីកិច្ចការនេះឲ្យបានកាន់តែល្អប្រសើរបន្ថែមទៀត។

សម្ដេច ស ខេង បញ្ជាក់ថា «នាពេលថ្មីៗតាមព័ត៌មានថា អង្គការសហប្រជាជាតិ បានចាត់ទុកកម្ពុជាទទួលបានជោគជ័យ ក្នុងការងារទេសន្តរប្រវេសន៍។ នេះជាជោគជ័យមួយ ការគ្រប់គ្រងទេសន្ដរប្រវេសន៍ប្រជាពលរដ្ឋយើងចេញទៅរកការងារនៅក្រៅប្រទេស»។

សម្ដេចក្រឡាហោម បន្ដថា តាមរយៈការងារនេះមានន័យថា កម្ពុជាបានការពារប្រជាពលរដ្ឋ បានរួចផុតពីការជួញដូរមនុស្ស។ ប៉ុន្ដែដោយឡែកតាមការវាយតម្លៃរបស់ក្រសួងការបរទេសសហរដ្ឋអាមេរិកវិញអោយដឹងថា ការជួញដូរមនុស្សនៅកម្ពុជា នៅតែជាប់ចំណាក់ថ្នាក់លេខ២ ដែលស្ថិតក្រោមការឃ្លាំមើលរបស់គេ។

សម្ដេច ក៏បានសន្និដ្ឋានថា កម្ពុជានៅតែជាប់ចំណាក់ថ្នាក់លេខ២នេះ គឺមានមូលហេតុមួយចំនួន ដែលកម្ពុជាមិនទាន់បានអនុវត្តតាមសំណើរ និងសំណូមពររបស់ភាគីដៃគូរ ហើយបញ្ហាអំពើជួញដូរមនុស្ស ក៏នាំឲ្យគេបានចាត់ទុកកម្ពុជា ជាប់ចំណាក់ថ្នាក់លេខ២ ផងដែរ។

ជាងនេះទៅទៀត សម្ដេច ស ខេង ក៏បានលើកឡើងថា ទោះបីកម្ពុជាជាប់ចំណាក់ថ្នាក់លេខ២ ក៏ដោយ សមត្ថកិច្ច និងភាគីពាក់ព័ន្ធមួយចំនួនទៀត ត្រូវបន្ដអនុវត្តការងារអំពើជួញដូរមនុស្សតាមគោលការណ៍ច្បាប់របស់ប្រទេសកម្ពុជា ក្នុងស្មារតីទទួលខុសត្រូវខ្ពស់ជាបន្តទៀត៕

ក្នុងឱកាសអញ្ជើញប្រគល់សញ្ញាបត្រ ជូនដល់និស្សិតជ័យលាភីថ្នាក់ បរិញ្ញាបត្ររង ថ្នាក់បរិញ្ញាបត្រ និងថ្នាក់បរិញ្ញាបត្រជាន់ខ្ពស់ នៃសាកលវិទ្យាល័យជាតិបាត់ដំបង នាថ្ងៃទី២០ មករានេះ សម្តេច ស ខេង បានថ្លែងយ៉ាងដូច្នេះថា «ប្រសិនបើចែកទៅដល់កូនជាលុយ ជាប្រាក់ ដីធ្លី គង់តែថ្ងៃណាមួយទ្រព្យទាំងនោះនឹងអស់ ប្រសិនបើអ្នកបន្តវេនមិនចេះថែរក្សា មិនចេះការពារ ហើយយកទៅចាយវាយដោយពុំមានការពិចារណារ ប៉ុន្តែបើយើងចែកឱ្យកូននូវចំណេះដឹងៗនោះគឺជាទ្រព្យសម្បត្តិនេះមិនចេះរីងស្ងួតហើយមានតម្លៃ និងកាន់តែមានតម្លៃនៅពេលដែលកូនខិតខំសិក្សារៀនសូត្រ ព្រោះការសិក្សារៀនសូត្រជាទ្រព្យសម្បត្តិមានតម្លៃដែលចាយមិនចេះចប់ និងមិនចេះអស់នោះទេ»។

សម្តេចបន្តថា ការអប់រំអាចធ្វើឱ្យមនុស្សផលិតបាននូវអ្វីៗគ្រប់យ៉ាង ដើម្បីបំពេញសេចក្តីត្រូវការរបស់មនុស្សជាតិ អាចនិយាយក្នុងន័យប្រៀបធៀបបានថា មនុស្សផលិតមាសបាន ហើយមាសដែលផលិតចេញពីខួរក្បាលមនុស្សគឺមិនចេះអស់នោះទេ ហេតុនេះការអប់រំមនុស្សឱ្យមានបញ្ញា មានចំណេះដឹង មានជំនាញ មានសីលធម៌ មានទ្រព្យសម្បត្តិនឹងរួចផុតពីភាពក្រីក្រគឺជាគោលដៅអតិភាពរបស់រាជរដ្ឋាភិបាល។

សម្តេចលើកឡើងថា ប្រទេសដែលមានការរីកចំរើន និងអភិវឌ្ឍន៍ជឿនលឿនគឺជាប្រទេសដែលសំបូរដោយធនធានមនុស្សគ្រប់ជំនាញដែលបានពីការអប់រំបណ្តុះបណ្តាលត្រឹមត្រូវ និងប្រកបដោយគុណភាព ដោយគុណភាពគឺជាកត្តាអទិភាពមួយដែលគ្រប់ភាគីពាក់ព័ន្ធត្រូវរួមគ្នាឱ្យតម្លៃ រួមគ្នាទទួលខុសត្រូវ និងរួមគ្នាបេ្តជ្ញាចិត្តធ្វើឱ្យបានក្នុងការផលិតនូវធនធានមនុស្សប្រកបដោយសមត្ថភាព វិជ្ជាជីវៈពិតប្រាកដ៕

សម្ដេចក្រឡាហោម មានប្រសាសន៍ថា «ក្រុមការងារចុះមូលដ្ឋានរបស់យើង និងអាជ្ញាធររបស់យើងបានខិតខំប្រឹងប្រែង ដើម្បីជួយសង្គ្រោះប្រជាពលរដ្ឋ នៅពេលជួបបញ្ហាអ្វីមួយទាំងនេះជាចំណុចពិសេសរបស់ក្រុមការងារ អាជ្ញាធរមូលដ្ឋានរបស់យើង»។ សម្ដេចក្រឡាហោម ស ខេង ក៏បានថ្លែងអំណរគុណ និងកោតសរសើរដល់ក្រុមការងាររដ្ឋាភិបាល និងអាជ្ញាធរមូលដ្ឋានគ្រប់ជាន់ថ្នាក់ ដែលតែងតែចុះជួយប្រជាពលរដ្ឋគ្រប់ពេលវេលា នឹងបានចូលរួមទប់ស្កាត់ការរីករាលដាលជំងឺកូវីដ-១៩ ដោយបានចុះអប់រំ និងណែនាំផ្សព្វផ្សាយដល់ប្រជាពលរដ្ឋនៅតាមមូលដ្ឋានជាប់ជាប្រចាំផងដែរ។

ទន្ទឹមនឹងនេះ សម្ដេចក្រឡាហោម ក៏បានអំពាវនាវដល់ប្រជាជននៅទូទាំងប្រទេស ឲ្យបន្តអនុវត្តន៍វិធានការថែរក្សាអនាម័យសុខភាពឲ្យបានខ្ជាប់ខ្ជួន ចូលរួមសហការឲ្យបានល្អជាមួយអាជ្ញាធរមានសមត្ថកិច្ចគ្រប់លំដាប់ថ្នាក់ ជឿជាក់លើសមត្ថភាព និងវិធានការរបស់រាជរដ្ឋាភិបាល និងមកទទួលការពិនិត្យព្យាបាលឲ្យបានទាន់ពេលវេលា ក្នុងករណីសង្ស័យថា មានរោគសញ្ញាជំងឺកូវីដ-១៩៕

ក្នុងពិធីប្រគល់សញ្ញាបត្រ ជូននិស្សិតជ័យលាភីថ្នាក់ បរិញ្ញាបត្ររង បរិញ្ញាបត្រ និងបរិញ្ញាបត្រជាន់ខ្ពស់ របស់សាកល វិទ្យាល័យបាត់ដំបង នាថ្ងៃទី២០ ខែមករា ឆ្នាំ២០២១ សម្ដេចក្រឡាហោម ស ខេង បានឲ្យដឹងថា នាពេលបច្ចុប្បន្ននេះ រាជរដ្ឋាភិបាលកម្ពុជា បានធ្វើការកំណែទម្រង់ប្រព័ន្ធអប់រំ ហើយប្រជាពលរដ្ឋចង់ធ្វើប៉ូលីស ត្រូវមានការប្រឡងឲ្យបានត្រឹមត្រូវ។

សម្ដេចក្រឡាហោម បន្ដថា នាពេលកន្លងមក មានការអន្តរាគមន៍ឲ្យប្រឡងជាប់ធ្វើប៉ូលីស ការធ្វើបែបនេះខុសពីកំណែទម្រង់ របស់រាជរដ្ឋាភិបាល។

សម្ដេចក្រឡាហោម មានប្រសាសន៍ថា «អ្នកខ្លះមិនដែលរៀនប៉ូលីស មកដល់សុំធ្វើប៉ូលីសធំទៀត ហើយធ្វើចឹងខុសពីនយោបាយ កំណែទម្រង់ទៅហើយ ចង់ធ្វើប៉ូលីសត្រូវចូលរួមប្រឡង»។

សម្ដេចក្រឡាហោម បន្ថែមថា រដ្ឋមន្ដ្រីក្រសួងមហាផ្ទៃ មានសិទ្ធិឲ្យដាក់ប្រឡងតែប៉ុណ្ណោះ គ្មានសិទ្ធិឲ្យជាប់ដោយស្វ័យប្រវត្តិឡើយ។ សម្ដេចក្រឡាហោម បន្ដថា កាលណាចង់ធ្វើប៉ូលីស ត្រូវចូលរួមប្រឡងប៉ូលីស ហើយប្រឡងធ្លាក់ជាលទ្ធផលរបស់ខ្លួនឯង។

សម្ដេចក្រឡាហោម ស ខេង ក៏បានលើកឧទាហរណ៍ថា បើឲ្យធ្វើប៉ូលីសមិនចាំបាច់ប្រឡង ដល់ពេលធ្វើការងារមិនកើត ប្រជាពលរដ្ឋនឹងធ្វើការស្ដីបន្ទោស មករដ្ឋមន្ដ្រីក្រសួងមហាផ្ទៃហើយ ដូច្នេះ ត្រូវមានការប្រឡងឲ្យបានត្រឹមត្រូវបំផុត៕

ក្នុងពិធីប្រកាសផ្សព្វផ្សាយ ដាក់ឲ្យប្រើប្រាស់ជាផ្លូវការ ផែនការសកម្មភាពជាតិ ស្តីពីការទប់ស្កាត់អំពីហិង្សាលើស្ត្រី ២០១៩-២០២៣ នាព្រឹកថ្ងៃទី១៩ ខែមករា ឆ្នាំ២០២១ នៅសណ្ឋាគារ សូហ្វីតែល ភ្នំពេញ ភូគីត្រា សម្ដេច ស ខេង បានឲ្យដឹងថា នាពេលកន្លងមក គោលនយោបាយ ភូមិ-ឃុំ មានសុវត្ថិភាព ភាគីពាក់ព័ន្ធបានរួមគ្នាដោះស្រាយទទួលបានជោគជ័យគួរឲ្យកត់សំគាល់ តាមរយៈការបូកសរុបលទ្ធការងារ របស់អគ្គស្នងការដ្ឋាននគរបាលជាតិ។

សម្ដេចបញ្ជាក់ថា «យើងឃើញថា ក្នុងរយៈពេល១០ឆ្នាំ ឆ្នាំ២០១០-២០២០ គឺលទ្ធផលនៃការអនុវត្តគោលនយោបាយ ភូមិ-ឃុំ មានសុវត្ថិភាពនេះ គឺទទួលបានជោគជ័យធំណាស់។ប៉ុន្ដែទោះបីយ៉ាងណាយើង ឃើញថា នៅមានបញ្ហាខ្លះដែលនៅតែជាបញ្ហា ហើយអាចធំជាងពីមុនថែមទៀត»។

សម្ដេចក៏បានលើកជាឧទាហរណ៍ថា ដូចជា បញ្ហាគ្រឿងញៀន ក៏ស្ថិតនៅក្នុងកម្មវិធីគោលនយោបាយ ភូមិ-ឃុំ មានសុវត្ថិភាព ក្នុងការអនុវត្តនាពេលកន្លងទៅ ទទួលបានលទ្ធផលច្រើន ហើយចំនួនចាប់ជនល្មើសជួញដូរគ្រឿងញៀន និងវត្ថុតាងគ្រឿងញៀនមកដាក់ទោសក៏បានកាន់តែច្រើនដែរ ប៉ុន្ដែមិនទាន់ធូរស្រាល។ សម្ដេចក្រឡាហោម បន្ដថា បញ្ហាខ្លះត្រូវដកចេញពីគោលនយោបាយ ភូមិ-ឃុំ មានសុវត្ថិភាព ដើម្បីដាក់បញ្ចូលបញ្ហាបច្ចុប្បន្នភាពវិញ។

ជាមួយគ្នានោះដែរសម្ដេច ស ខេង ក៏បានកោតសរសើរ ចំពោះក្រុមការងារអន្តរក្រសួងឆ្លើយតបទៅ នឹងអំពើហិង្សាទាក់ទងនឹងយេនឌ័រ ដែលមានក្រសួងកិច្ចការនារីជាអ្នកសម្របសម្រួល ក្នុងការរៀបចំឡើងវិញនូវផែនការសកម្មភាពជាតិ ស្តីពីការទប់ស្កាត់អំពីហិង្សាលើស្ត្រីដ៏មានសារៈប្រយោជន៍នេះ ដើម្បីជំរុញការអនុវត្តឱ្យសម្រេច បាននូវគោលនយោបាយរបស់រាជរដ្ឋាភិបាលកម្ពុជា ដោយបានចាត់ទុកការលុបបំបាត់អំពើហិង្សាលើស្ត្រជាការងារអទិភាព។

សម្ដចបន្ថែមថា គ្រប់ក្រសួងស្ថាប័នរដ្ឋ ឯកជន និងអង្គការសង្គមស៊ីវិល ត្រូវតែចូលរួមអនុវត្តឱ្យបាន ម៉ឺងម៉ាត់ និងគ្រប់ជ្រុងជ្រោយដើម្បីទប់ស្កាត់ លុបបំបាត់គ្រប់ទម្រង់នៃអំពើហិង្សាលើស្រ្តី និងក្មេងស្រី និងការពារជនរងគ្រោះឱ្យបានទាន់ពេលវេលា និងប្រកបដោយប្រសិទ្ធភាព សំដៅអភិវឌ្ឍធនធានមនុស្សដែលជាគន្លឹះសម្រាប់ទ្រទ្រង់កំណើនសេដ្ឋកិច្ច និងភាពប្រកួតប្រជែងរបស់ប្រទេស និងធានាកិច្ចអភិវឌ្ឍប្រកបដោយចីរភាព ស្របតាមយុទ្ធសាស្រ្តចតុកោណដំណាក់កាលទី៤ ដើម្បីកំណើន ការងារសមធម៌ និងប្រសិទ្ធភាព ដែលមានចំណងជើង កសាងមូលដ្ឋានឆ្ពោះទៅសម្រេចចក្ខុវិស័យកម្ពុជា ឆ្នាំ២០៥០៕