សម្តេចព្រះមហាក្សត្រី នរោត្តម មុនិនាថ សីហនុ – Champey News

ព្រះមហាក្សត្រ និងសម្តេចម៉ែ សព្វព្រះរាជហឫទ័យប្រោសព្រះរាជទាន ថវិកា១០ម៉ឺនដុល្លារជូនកាកបាទក្រហមកម្ពុជា

មករា — Sat, 08 May 2021 03:54:28 +0000

ភ្នំពេញ៖ ព្រះករុណាជាអម្ចាស់ជីវិតលើត្បូង ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា និងសម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ ក្នុងសេរីភាព សេចក្តីថ្លៃថ្នូរ និងសុភមង្គល ក្នុងព្រះបរមនាមជាព្រះប្រធានកិត្តិយស នៃកាកបាទក្រហមកម្ពុជា ជាទីគោរពសក្ការៈដ៏ខ្ពង់ខ្ពស់បំផុត ព្រះអង្គទាំងទ្វេសព្វព្រះរាជហឫទ័យប្រោសព្រះរាជទានព្រះរាជូបត្ថម្ភជាព្រះរាជទ្រព្យផ្ទាល់ដ៏ឧត្តុង្គឧត្តម ចំនួន ១០ម៉ឺនដុល្លារសហរដ្ឋអាមេរិក (ព្រះករុណា ព្រះមហាក្សត្រ ចំនួន ៥ម៉ឺនដុល្លារ និងសម្តេចព្រះមហាក្សត្រី ព្រះវររាជមាតាជាតិខ្មែរ ចំនួន ៥ម៉ឺនដុល្លារ ) ជូនដល់កាកបាទក្រហមកម្ពុជា ក្នុងឱកាសដ៏វិសេសវិសាលនៃខួបទី១៥៨ ទិវាពិភពលោកកាកបាទក្រហម និងអឌ្ឍចន្ទក្រហម ៨ ឧសភា ឆ្នាំ២០២១ ដើម្បីគាំទ្រនូវសកម្មភាពមនុស្សធម៌នានាទាំងឡាយនៅក្នុងព្រះរាជាណាចក្រកម្ពុជា ដែលជាព្រះរាជសកម្មភាពលើវិស័យមនុស្សធម៌ដ៏ឧត្តុង្គឧត្តម បន្តចាប់តាំងពី ព្រះករុណា ព្រះបរមរតនកោដ្ឋ ជាទីគោរពសក្ការៈដ៏ខ្ពង់ខ្ពស់បំផុតនៃយើងតរៀងមក៕

សម្ដេចម៉ែ ប្រទានព្រះរាជទ្រព្យ ២០ម៉ឺនដុល្លារ ជូនរាជរដ្ឋាភិបាល ទិញយកមន្ទីរពេទ្យហ្លួងម៉ែ

មករា — Tue, 30 Mar 2021 06:31:08 +0000

ភ្នំពេញ៖ សម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ ក្នុងសេរីភាព សេចក្តីថ្លៃថ្នូរ និងសុភមង្គល ជាទីគោរពសក្ការៈដ៏ខ្ពង់ខ្ពស់បំផុត ស្តេចសព្វព្រះរាជហឫទ័យ ប្រោសព្រះរាជទានវិភាគទាន ជាព្រះរាជទ្រព្យផ្ទាល់ដ៏ឧត្តុង្គឧត្តម ចំនួន ២០ម៉ឺនដុល្លារ ជូនដល់រាជរដ្ឋាភិបាលកម្ពុជា ដើម្បីទ្រទ្រង់ដល់ដំណើរការ ទិញយកមន្ទីរពេទ្យស្រ្តីនគរទេព ដែលបច្ចុប្បន្នជាកន្លែង សម្រាប់ពិនិត្យព្យាបាលអ្នកជំងឺកូវីត១៩ ហើយនឹងត្រូវប្រែក្លាយទៅជាមន្ទីរពេទ្យរដ្ឋ ដោយប្រសិទ្ធនាមថា «មន្ទីរពេទ្យហ្លួងម៉ែ» នាពេលខាងមុខនេះ។

«មន្ទីរពេទ្យស្រ្តីនគរទេពដ៏ធំស្កឹមស្កៃ នឹងប្រែក្លាយទៅជា មន្ទីរពេទ្យ ហ្លួងម៉ែ»

មករា — Sun, 28 Mar 2021 04:08:00 +0000

ភ្នំពេញ៖ អគារមន្ទីរពេទ្យដ៏ធំស្កឹមស្កៃដែលមានឈ្មោះថា មន្ទីរពេទ្យស្រ្តីនគរទេព នឹងត្រូវប្រែក្លាយឈ្មោះទៅជា «មន្ទីរពេទ្យ ហ្លួងម៉ែ » បន្ទាប់ពី សម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ ក្នុងសេរីភាព សេចក្តីថ្លៃថ្នូរ និងសុភមង្គល ជាទីគោរពសក្ការៈដ៏ខ្ពង់ខ្ពស់បំផុត ស្តេចសព្វព្រះរាជហឫទ័យព្រះបរមរាជានុញ្ញាតប្រោសព្រះរាជទានតបតាមសេចក្តីក្រាបបង្គំទូលថ្វាយ នៃសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា ក្នុងការប្រសិទ្ធនាមមន្ទីរពេទ្យស្រ្តីនគរទេព ទៅជា មន្ទីរពេទ្យ ហ្លួងម៉ែ បន្ទាប់ពីរាជរដ្ឋាភិបាលកម្ពុជា បញ្ចប់ការចរចារក្នុងការទិញយកមន្ទីរពេទ្យនេះនាពេលខាងមុខ ហើយប្រែក្លាយទៅជាកន្លែងសម្រាប់ពិនិត្យព្យាបាលអ្នកជំងឺកូវីត១៩។

យោងតាមគេហទំព័រRoyal du Cambodgeបានឲ្យដឹងបន្តថាអង្គសម្តេចព្រះមហាក្សត្រី ព្រះវររជមាតាជាតិខ្មែរ ជាទីគោរពសក្ការៈដ៏ខ្ពង់ខ្ពស់បំផុត ព្រះអង្គតែងតែមានព្រះរាជតម្រិៈដង្ហែតាមជានិច្ចចំពោះព្រះរាជសកម្មភាពដ៏ឧត្តុង្គឧត្តម នៃព្រះករុណា ព្រះវររាជបិតាសុខាភិបាលជាតិ ព្រះបរមរតនកោដ្ឋ ជាទីគោរពសក្ការៈដ៏ខ្ពង់ខ្ពស់បំផុត ចាប់តាំងពីសម័យសង្គមរាស្រ្តនិយមដ៏រុងរឿងនៃយើង ដែលព្រះអង្គតែងតែមានព្រះរាជហឫទ័យទុកដាក់ខ្ពស់ចំពោះវិស័យសុខាភិបាល ជាពិសេសបញ្ហាសុខភាពរបស់បងប្អូនប្រជានុរាស្រ្តជាកូនចៅ តាមរយៈការប្រោសព្រះរាជទានព្រះរាជអំណោយជាព្រះរាជសមិទ្ធផលនានាជាច្រើនដែលបម្រើឲ្យវិស័យសុខាភិបាលទូទាំងព្រះរាជាណាចក្រកម្ពុជា និងប្រោសព្រះរាជទានព្រះរាជទ្រព្យជូនដល់តាមបណ្តាមន្ទីរពេទ្យនានា ដើម្បីគាំទ្រដំណើរការពិនិត្យព្យាបាលជូនដល់ប្រជានុរាស្រ្តជាកូនចៅ ព្រមទាំងព្រះរាជសកម្មភាពជាច្រើនឥតគណនាផ្សេងទៀត។