តាមរយៈហ្វេសប៊ុក លោក នេត្រ ភក្ត្រាបញ្ជាក់ថា កម្ពុជាមានមោទកភាពដែលមានសត្វកម្រនេះហើយចាំបាច់យើងទាំងអស់ គ្នាត្រូវរួមគ្នាការពារ និងអភិរក្សសត្វដ៏កម្រប្រភេទនេះឱ្យបាន គង់វង្សស្ថិតស្ថេរសម្រាប់មនុស្សរាប់ជំនាន់ទៅមុខទៀតដើម្បី ផលប្រយោជន៍នៃជីវៈចម្រុះពិភពលោកទាំងមូល។

យោងតាមការសិក្សា នៅកម្ពុជាមានត្រយ៉ងយក្សចំនួនប្រមាណជាង ៣០០ ក្បាល ស្មើនឹង ៩៩% នៃសត្វត្រយ៉ងយក្សរបស់ពិភពលោក ក្នុងនោះសត្វត្រយ៉ងយក្សពេញវ័យមានប្រមាណ ២០០ក្បាល។ ជាមួយកម្មវិធីថែរក្សាសំបុកសត្វ កម្រៗនានាគាំទ្រដោយអង្គការដៃគូ នៅឆ្នាំ២០២១ នេះ សំបុកពងកូនរបស់សត្វត្រយ៉ងយក្សជាច្រើនក្នុងតំបន់ការពារធម្មជាតិ ត្រូវបានរកឃើញ និងថែរក្សាដើម្បីឱ្យពងញាស់ និងកូនសត្វត្រយ៉ងលូតលាស់ ធំធាត់រហូតអាចហើររកស៊ីដោយខ្លួនឯង។

ប្រទេសកម្ពុជាជាប្រទេសទី១ ដែលបានផ្តល់រូបថតប្រភេទសត្វត្រយ៉ងយក្សនេះក្នុងធម្មជាតិមុនគេលើពិភពលោក។ត្រយ៉ងយក្សត្រូវបានរាជរដ្ឋាភិបាលកំណត់ថាជាបក្សីនិមិត្តរូបនៃព្រះរាជាណាចក្រកម្ពុជាតាមព្រះរាជក្រឹត្យលេខ នស/រកត/០៣០៥/១៤៩ ចុះថ្ងៃទី២១ ខែមីនា ឆ្នាំ២០០៥៕

តាមការឱ្យដឹងរបស់ក្រសួងបរិស្ថាន សត្វត្រយងយក្សដែល​ជាប្រភេទសត្វទទួល​រង​គ្រោះ​ថ្នាក់​ជិត​ផុត​ពូ​ជ​បំផុត​រស់នៅតាមព្រៃល្បោះ ព្រៃលិចទឹក និងតំបន់ដីសើម ហើយចិញ្ចឹមជីវិតដោយស៊ីត្រី ជន្លេន និងកង្កែបជាអាហារ។

ក្រសួងបរិស្ថានបានអំពាវនាវថា «ក្នុងទិវាមួយម៉ោងសម្រាប់ភពផែនដីនេះ​ សូមផ្តល់សម្លេងដល់ ធម្មជាតិ ដោយផ្សព្វផ្សាយ និងចូលរួមអភិរក្សសត្វត្រយងយក្ស ដែលជាសត្វនិមិត្តរូបជាតិកម្ពុជា និងការពារទីជម្រករបស់វា ក៏ដូចជាការពារប្រភេទសត្វស្លាបកម្រ​ និង​សត្វស្លាប​​​រង​គ្រោះ​ថ្នាក់​ជិត​ផុត​ពូជដ៏ទៃផ្សេងទៀត»៕