បន្ទាប់ពីមានបទបញ្ជាពីសម្តេចតេជោ ហ៊ុន សែន នាយករដ្ឋមន្រ្តីកម្ពុជា ឱ្យធ្វើការទប់ស្កាត់ និងបង្រ្កាបជាបន្ទាន់ ចំពោះជនខិលខូចមួយចំនួន ដែលលួចកាប់ព្រៃលិចទឹក និងវាទទីយកដី នៅតាមបឹងទន្លេសាប ដើម្បីយកមកធ្វើជាកម្មសិទ្ធិផ្ទាល់ខ្លួន នោះប្រជាពលរដ្ឋបានសម្ដែង ការសាទរយ៉ាងពេញទំហឹង និងសូមស្នើទៅកាន់គណៈកម្មាធិការថ្នាក់ជាតិ មេត្តាចុះពិនិត្យមើល និងចាត់វិធានការទប់ស្កាត់ និងបង្ក្រាបឱ្យបានទាន់ពេលវេលាផង ព្រោះរាល់ថ្ងៃនេះ តំបន់ព្រៃលិចទឹកមួយ ភាគធំមានតែឈ្មោះ ប៉ុន្តែគ្មានរូបរាងឡើយ។

ពលរដ្ឋរស់នៅជិតតំបន់ព្រៃលិចទឹក កំពុងរងការកាប់ទន្ទ្រាន ស្ថិតក្នុងឃុំជ្រៃ ស្រុកមោងឫស្សី បានលើកឡើងថា ព្រៃលិចទឹកជាច្រើនចំណុច ត្រូវជនខិលខូចមួយចំនួន បានប្រើប្រាស់គ្រឿងចក្រ ត្រាក់ទ័រ ធ្វើការឈូសឆាយ ជាហូរហែរ នារយៈពេលប៉ុន្មានឆ្នាំចុងក្រោយនេះ មិនថាយប់មិនថាថ្ងៃ និងបានប្រើប្រាស់សកម្មភាព បំភាន់ភ្នែកអាជ្ញាធរ តាមរូបភាពផ្សេងៗ ។

ពលរដ្ឋបានបន្តថា ដោយរូបភាព បំភាន់ផ្នែកនោះ គឺពួកគេបានធ្វើការឈូសឆាយ ភ្ជួររាស់ដីព្រៃបណ្ដើរ ហើយធ្វើការ ព្រោះស្រូវបណ្ដើរ ធ្វើដូចជាខ្លួនបានអាស្រ័យផល លើដីនោះជាច្រើនឆ្នាំមកហើយ ប៉ុន្តែការពិត គឺជាដីព្រៃថ្មី មិនធ្លាប់អាស្រ័យផលសោះ ។

ប្រភពបានបន្ថែមថា សម្រាប់ចំណុចត្រូវជនទាំងអស់នោះ កំពុងកាប់ទន្ទ្រានជាបន្តបន្ទាប់ មាននៅបឹងកំភ្លាញក្នុង បឹងកំភ្លាញក្រៅ អូរចុងតាចាន់ ខ្ទមតូច រាងអង្ក្រង បឹងបណ្ដែតគល់ បឹងទឹកល្អក់ បឹងទឹកថ្លាជាដើម ហើយតំបន់ទាំងនោះខ្លះស្ថិតក្នុងភូមិអង្គ្រង និងខ្លះនៅភូមិដូនទ្រី ។

ប្រភពដដែលបន្ថែមថាជនខិលខូចដែលកំពុងកាប់ទន្ទ្រានដីព្រៃលិចទឹកនោះត្រូវបានគេស្គាល់ថាមានឈ្មោះ ឃឿត ជាអ្នកចាំទិញដីដែលបានឈូសឆាយរួច , ឈ្មោះ ដាង សាវ៉េត មន្រ្តីយោធាស្រុក , ឈ្មោះ សែម បូរ ប្រធានសហគមន៍ដូនទ្រី , ឈ្មោះ អ៊ី សេងហុង មន្រ្តីយោធាភូមិភាគ៥, ឈ្មោះ ម៉ូត ឌី ,ម៉ូត ស្រី, ម៉ូត ឆើត , ឈ្មោះ ចៀវ , ឈ្មោះ ឈុំ រៀន ជាប្រជាពលរដ្ឋរស់នៅភូមិដូនទ្រី និងមានមន្រ្តី សាលាស្រុកមោង មន្រ្តីប៉េអឹមស្រុក និងយោធាស្រុក មួយចំនួនទៀតផងដែរ ។

បើយោងតាមរបាយការណ៍របស់ លោក ទេព ហន អភិបាលស្រុកមោងឫស្សី ផ្ញើជូនអភិបាលខេត្តបាត់ដំបង កាលពីចុងឆ្នាំ២០២០ បានបញ្ជាក់ថា ដីព្រៃលិចទឹកក្នុងតំបន់៣ ក្នុងមូលដ្ឋានស្រុកមោងឫស្សីមានជាង២ពាន់ ហិកតា ត្រូវបានជនខិលខូចទន្ទ្រានកាន់។

ជាមួយគ្នានោះ ព្រៃលិចទឹកនៅក្នុងតំបន់៣ ប្រមាណជាង១០០០ហិកតា នៅចំណុចក្រពើស្គម ស្ថិតក្នុងភូមិព្រែកចាស់ ឃុំព្រែកចាស់ ស្រុកឯកភ្នំ ខេត្តបាត់ដំបង ក៏ត្រូវបានពួកជនខិលខូចលួច ឈូសឆាយកាប់ទន្ទ្រាន យកធ្វើជាកម្មសិទ្ធិដោយខុសច្បាប់ជាបន្តបន្ទាប់។

គួរបញ្ជាក់ថា ការលួចកាប់ទន្ទ្រានដី កាន់កាប់ព្រៃលិចទឹកក្នុងមូលដ្ឋាន ខេត្តបាត់ដំបង នេះមិនមែនកើត មានតែនៅស្រុកមោងឫស្សីនោះទេ គឺកើតឡើងនៅស្រុកឯកភ្នំ ស្រុកសង្កែ និងស្រុកថ្មគោលផងដែរ៕

កសិករម្នាក់ ដែលរស់នៅភូមិអង្រ្គងបានថ្លែងឲ្យដឹងថា ស្រូវដែលបានស្ដារឡើងបន្ទាប់ពីលិចខូចខាត គឺមិនមានច្រើននោះឡើយ ។គាត់បន្តថា ដោយសារការស្នើរសុំទឹកដល់អាជ្ញាធរពាក់ព័ន្ធមួយលើករួចហើយកាលពីដើមដៃ ទើបស្រូវបាននៅល្អដល់មានមួយចំនួនកំពុងផើម ស្រូវខ្លះកំពុងបែកមួយៗ ទើបតម្រូវការទឹកម្ដងទៀតនៅពេលនេះនៅផ្នែកខាងក្រោមមិនមានទឹកទើបសម្រេចចិត្ដរួមសាមគ្គីអ្នកភូមិមកជីក កាយថ្មនៅផ្នែកខាងលើដើម្បីបើកមុខទឹកឲ្យធំហូរដល់គោលដៅ ភូមិអង្រ្គង និងដល់ស្រែស្រូវ ដែលត្រូវការទឹកចាំបាច់ផងដែរ។

កសិករបន្ថែមថា បន្ទាប់ពីនាំគ្នា កាយថ្មបើកទឹកក៏មាន កំលាំងមួយផ្នែកបាន ធ្វើលិខិតស្នើរសុំទៅកាន់អាជ្ញាធរពាក់ព័ន្ធឃុំ ស្រុក ហើយនិងមន្ទីរធនធានទឹក និងឧតុនិយម ខេត្ដបាត់ដំបង ដើម្បីពន្លឿន មានការអនុញ្ញាតពីអាជ្ញាធរពាក់ព័ន្ធ ស្របពេលកាយថ្មរួច បានការអនុញ្ញាតពីអាជ្ញាធរពាក់ព័ន្ធ ដើម្បីបង្ហូរទឹកបានទាន់តម្រូវការ។

យោងតាមប្រសាសន៍លោក ឡុង ផលគុណ ប្រធានមន្ទីរធនធានទឹក និងឧតុនិយមខេត្តបាត់ដំបង បានលើកឡើងនៅកាលពីថ្ងៃទី១១ ខែមករា ឆ្នាំ២០២០ ក្នុងការចុះពិនិត្យស្ថានភាពស្រូវ ស្រាល ឬស្រូវប្រាំង កំពុងខ្វះខាតទឹកស្រោចស្រព នៅតំបន់ក្រោមអាងរាមគន់ ចំណុចភូមិអង្គ្រង និងភូមិដូនទ្រី ស្ថិតក្នុងឃុំជ្រៃ ស្រុកមោងឫស្សី ថា មន្ទីរនឹងខិតខំនាំទឹកពីប្រភពទំនប់អាងបាសាក់ ស្ថិតក្នុងស្រុករុក្ខគិរី មកជួយសង្គ្រោះស្រូវរបស់ពលរដ្ឋ នៅក្នុងភូមិទាំងពីរនេះ ឲ្យអស់ពីលទ្ធភាព និងឲ្យបានទាន់ពេលវេលា តាមការចង់បានរបស់ពលរដ្ឋ ដើម្បីជួយស្ដារជីវភាពរបស់ពួកគាត់ឡើងវិញ បន្ទាប់ពីបានរងការប៉ះពាល់ដោយទឹកជំនន់ កាលពីឆ្នាំ២០២០នោះ៕