យោងតាមហ្វេសប៊ុករបស់ លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានឲ្យដឹងថា គិតត្រឹមថ្ងៃទី៧ ខែធ្នូ របាយការណ៍បានបង្ហាញ ដូចខាងក្រោម៖
១- ខេត្តដែលសម្រេចបានចាប់ពី ៩០% ឡើងមាន៖ ខេត្តកោះកុង ក្រចេះ រតនគីរី និងខេត្តស្ទឹង ត្រែង។

២- ខេត្តដែលសម្រេចបានចាប់ពី ៧០% ទៅ ៨០% មាន៖ ខេត្តកំពត ពោធិ៍សាត់ សៀមរាប ស្វាយរៀង និងខេត្តឧត្តរមានជ័យ។

៣- ខេត្តដែលសម្រេចបានចាប់ពី ៥០% ទៅ ៦០% មាន៖ ខេត្តបន្ទាយមានជ័យ កំពង់ចាម កំពង់ឆ្នាំង កណ្តាល មណ្ឌលគីរី ភ្នំពេញ ព្រះវិហារ ព្រៃវែង តាកែវ កែប ប៉ៃលិន និងខេត្តត្បូងឃ្មុំ។

៤- ខេត្តដែលសម្រេចបានក្រោម ៥០% មាន៖ ខេត្តបាត់ដំបង កំពង់ស្ពឺ និងខេត្តកំពង់ធំ។

ដោយ ឡែក ខេត្តព្រះសីហនុសកម្មភាពប្រមូលផលស្រូវវស្សាទើបតែសម្រេចបានជាង ២០% ប៉ុណ្ណោះ៕

យោងតាមសេចក្ដីអំពាវនាវ របស់ធនាគារ អភិវឌ្ឍន៍ជនបទ និងកសិកម្ម នៅថ្ងៃទី២៩ ខែវិច្ឆិកា ឆ្នាំ២០២០នេះ បានកត់សម្គាល់ឃើញថា ក្នុងរដូវប្រមូលផលស្រូវនេះ ប្រជាកសិករនៅតាមបណ្តាខេត្តមួយចំនួន កំពុងសស្រាក់សស្រាំ ធ្វើការប្រមូលផលស្រូវសែនក្រអូប និងស្រូវម្លិះឱ្យទាន់ពេលវេលា ក៏ប៉ុន្តែព្រមពេលជាមួយគ្នានេះ នៅតំបន់មួយចំនួន ការប្រមូលផលស្រូវទាំងពីរប្រភេទនេះ កំពុងប្រឈមមុខ និងការខ្វះខាតនូវកំលាំងពលកម្ម ដើម្បីច្រូតកាត់ ក៏ដូចជាខ្វះខាតម៉ាស៊ីនច្រូតកាត់ស្រូវធ្វើឱ្យការ ច្រូតកាត់មិនបានទាន់ពេលវេលា ដោយមូលហេតុការប្រមូលស្រូវ ក្នុងរដូវប្រមូលផលឆ្នាំនេះមានភាពសម្រុកខ្លាំងផ្ទួនគ្នា។

ធនាគារអភិវឌ្ឍន៍ជនបទបានបញ្ជាក់ថា “ការសម្រុកប្រមូលផល និងកង្វះខាតមធ្យោបាយច្រូតកាត់នេះ បានធ្វើឱ្យថ្លៃឈ្នួលម៉ាស៊ីនច្រូតស្រូវក្នុងមួយគ្រឿងហក់ស្ទុះលើស៣ដង ធៀបនឹងថ្លៃឈ្នួលឆ្នាំមុន។ ប្រសិនបើសភាពការណ៍ខ្វះខាតមធ្យោបាយច្រូតកាត់នេះ នៅតែអូសបន្លាយយូរថ្ងៃទៀត ស្រូវរបស់បងប្អូនប្រជាកសិករ នៅក្នុងស្រែនឹងទុំជ្រុលជាហេតុ ធ្វើឱ្យបាត់បង់គុណភាពស្រូវ ព្រមទាំងធ្វើឱ្យថ្លៃស្រូវធ្លាក់ចុះផងដែរ”។

ទន្ទឹមនិងនោះធនាគារអភិវឌ្ឍន៍ជនបទ ក៏បានអំពាវ អ្នកដែលមានម៉ាស៊ីនច្រូតកាត់ស្រូវ សូមមេត្តាកុំដំឡើងថ្លៃឈ្នួល និងសូមរក្សាថ្លៃឈ្នួលដដែល។

ជាមួយគ្នានោះដែរ ធនាគារអភិវឌ្ឍន៍ជនបទ និងកសិកម្ម បានអំពាវនាវដល់អាជ្ញាធរខេត្ត កងកម្លាំងប្រដាប់អាវុធ អាជ្ញាធរមូលដ្ឋាន យុវជនស្ម័គ្រចិត្ត ដែលកំពុងឈរជើងនៅតាមតំបន់ ដែលកំពុងប្រមូលផលស្រូវសែនក្រអូប និងស្រូវម្លិះ មេត្តាចាត់ចែងកម្លាំងចុះជួយច្រូតកាត់ស្រូវ របស់បងប្អូនប្រជាកសិករជាបន្ទាន់ និងតាមលទ្ធភាពដែលអាចធ្វើបាន ដើម្បីជួយសម្រាលទុក្ខលំបាក ក៏ដូចជាជួយទប់ស្កាត់ការធ្លាក់ចុះថ្លៃស្រូវរបស់បងប្អូនប្រជាកសិករ ដែលអាចកើតឡើងដោយប្រការណាមួយ៕

ពលរដ្ឋម្នាក់រស់នៅភូមិសំរោង ឃុំស្នឹង ស្រុកបាណន់ ខេត្ដបាត់ដំបង បានថ្លែងឲ្យដឹងថា ក្នុងតំបន់ពួកគាត់ ធ្វើស្រូវប្រភេទផ្ការំដួល ផ្កាម្លិះ សែនក្រអូប និងស្រូវប្រភេទលេខ១។ មួយចំនួនទៀត ធ្វើតាមបច្ចេកទេសកសិកម្ម រាល់ឆ្នាំជាមធ្យមក្នុងមួយហិកតាទទួលផលបានជាង ៣តោន និងតម្លៃលក់បានក្នុង១តោន អាចនឹងបានជាង ១ ១៥០ ០០០រៀល។

ពលរដ្ឋដដែលបានបន្តថា៖«នៅក្នុងឆ្នាំនេះ បានជួបបញ្ហាគ្រោះធម្មជាតិធំៗចំនួនពីរ គឺនៅដើមរដូវបានជួបបញ្ហាគ្រោះរាំងស្ងួត និងនៅចុងខែវស្សានេះ បានជួបបញ្ហាគ្រោះទឹកជំនន់ ធ្វើឲ្យលិចលង់ស្រូវអស់ជាច្រើនហិកតា ហើយសម្រាប់ស្រូវដែលនៅសេសសល់ មានសភាពទន់ដើម បន្ទាប់ពីមានខ្យល់បក់មកខ្លាំង ធ្វើឲ្យដេកដួលទ្រាលពេញស្រែលិចកប់ទឹក ហើយស្រូវបានបាត់បង់នូវទិន្នផលលើសជាងពាក់កណ្ដាល»។

កសិករម្នាក់ដែលរស់នៅក្នុងឃុំស្នឹង ស្រុកបាណន់ ខេត្ដបាត់ដំបងក៏បានប្រាប់ឲ្យដឹងដែរថា ស្រូវប្រភេទលេខ១ កាលពីប្រមូលដើមដៃអាចលក់បានជាង ១១០០ ០០០លានរៀល និងបច្ចុប្បន្នធ្លាក់មកជាង ១០០០ ០០០រៀល ។

កសិករបានបន្តទៀតថា៖«បញ្ហាតំលៃស្រូវធ្លាក់ចុះជាបន្តបន្ទាប់នេះ បានធ្វើឲ្យកសិករមានការព្រួយបារម្ភ ព្រោះស្រូវសល់ពីការលិចលង់បន្តិចបន្តួច ប្រមូលផលមកលក់បានថោកមិនអាចទប់ទល់ នឹងការចំណាយផ្សេងៗឡើយ»។

ពលរដ្ឋរស់នៅក្នុងខេត្ដបាត់ដំបងដែលបានជួបបញ្ហា សូមសំណូមពរដល់អាជ្ញាធរពាក់ព័ន្ធខេត្ត ជួយធ្វើកិច្ចអន្តរាគមន៍ជួយទប់ស្កាត់ឈ្មួញ កុំឲ្យមានការទម្លាក់តម្លៃបន្តទៀត ។ ម្យ៉ាងវិញទៀតពលរដ្ឋសំណូមពរដល់រាជរដ្ឋាភិបាល ជួយរៀបចំប្រព័ន្ធធារាសាស្រ្ដដើម្បីស្តុកទឹក សម្រាប់ស្រោចស្រព ដំណាំដែលស្ដារឡើងវិញក្រោយ ជួបគ្រោះធម្មជាតិទឹកជំនន់កាលពេលកន្លងមក។

បច្ចុប្បន្នចំពោះបញ្ហាតម្លៃស្រូវវស្សានេះ នៅតាមតំបន់ខ្លះ ក៏មានការធ្លាក់ថ្លៃក្រោម ១លានរៀលក្នុង១តោនផងដែរ ដូចជានៅក្នុងឃុំក្ដុលតាហែន ស្រុកបវេលជាដើម ខណៈនៅតំបន់នេះកំពុងខ្វះខាតគ្រឿងចក្រសម្រាប់ច្រូតកាត់ទៀតផង ។

ទាក់ទិនបញ្ហានេះក្រុមឈ្មួញទិញស្រូវ បានលើកឡើងថា ការដែលស្រូវចុះថ្លៃជាបន្តបន្ទាប់នេះ ដោយសារឃ្លាំងស្រូវតាមរោងម៉ាស៊ីនមួយចំនួនពេញ ហើយស្រូវខ្លះបានលិចកប់ទឹក ធ្វើឲ្យបាត់គុណភាព។

លោក ងួន រតនៈ អភិបាលខេត្តបាត់ដំបង បានថ្លែងនៅក្នុងសន្និសីទសារព័ត៌មានកន្លងមក ស្តីពីវឌ្ឍនភាពនិងទិសដៅការងារបន្តរបស់រដ្ឋបាលខេត្តបាត់ដំបង ថា កាលពីឆ្នាំ២០១៩ ផ្ទៃដី អនុវត្តការដាំដុះស្រូវក្នុងខេត្តបាត់ដំបង សរុបមានចំនួនជាង ៣៨ ម៉ឺនហិកតា ទទួលបានទិន្នផល សរុបចំនួនជាង ១លានតោន ស្មើនឹងជាង៣តោនក្នុង១ហិកតា។

លោកបន្ថែមថា ខេត្តបាត់ដំបងបាន បង្កបង្កើនផលស្រូវរដូវវស្សា សម្រេចបានចំនួន១៨ ៣៨៩ ហិកតា ស្មើនឹង ៥.៦៩% នៃផែនការដាំដុះស្រូវរដូវវស្សាឆ្នាំ២០២០ចំនួន៣២៣ ២០០ ហិកតា៕