ក្នុងជំនួបនេះ លោក ស៊ុប្រាម៉ានៀម ជែស្យាងការ បានជម្រាបជូន លោក ហ៊ុន ម៉ាណែត អំពីការទន្ទឹងរង់ចាំដំណើរទស្សនកិច្ចនេះជាយូរមកហើយ ដែលជាទស្សនកិច្ចផ្លូវការលើកដំបូងបង្អស់របស់មេបញ្ជាការកងទ័ពជើងគោកកម្ពុជា មកកាន់សាធារណរដ្ឋឥណ្ឌានិងបានកត់សម្គាល់ដោយការពេញចិត្តចំពោះវឌ្ឍនភាពនៃកិច្ចសហប្រតិបត្តិការរវាងប្រទេសទាំងពីរ ព្រមជាមួយនឹងការគូសបញ្ជាក់អំពីការប្តេជ្ញាចិត្តរបស់ប្រទេសឥណ្ឌាក្នុងការបន្តពង្រឹង និងពង្រីកទំនាក់ទំនងជាមួយប្រទេសកម្ពុជា ដែលជាដៃគូដ៏ល្អរបស់ឥណ្ឌាទាំងក្នុងក្របខ័ណ្ឌទ្វេភាគី និងពហុភាគី ដើម្បីផលប្រយោជន៍ទៅវិញទៅមក ក៏ដូចជាដើម្បីសន្តិភាព ស្ថិរភាព និងការអភិវឌ្ឍនៅក្នុងតំបន់។

ជាការឆ្លើយតប ឧត្តមសេនីយ៍ឯក ហ៊ុន ម៉ាណែត បានធ្វើការវាយតម្លៃខ្ពស់ចំពោះចំណងសាមគ្គីភាព មិត្តភាព ការជឿទុកចិត្តគ្នា និងកិច្ចសហប្រតិបត្តិការល្អរវាងប្រទេសទាំងពីរកម្ពុជា–ឥណ្ឌា តាំងពីអតីតកាលរហូតមកដល់បច្ចុប្បន្ន ជាពិសេសក្នុងគ្រប់កាលៈទេសៈដែលកម្ពុជាជួបប្រទះការលំបាក និងដោយបានបញ្ជាក់ផងដែរអំពីការឯកភាពលើទិសដៅនៃការភ្ជាប់ទំនាក់ទំនងឱ្យបានច្រើនវិស័យបន្ថែមទៀតសម្រាប់ពេលខាងមុខ។

លោកឧត្តមសេនីយ៍ឯក ក៏បានយកឱកាសនេះ ថ្លែងអំណរគុណចំពោះប្រទេសឥណ្ឌា ដែលបានគាំទ្រភាពជាប្រធានអាស៊ានរបស់កម្ពុជាកាលពីឆ្នាំ២០២២ កន្លងទៅ រួមទាំងវិធានការនានាដែលកម្ពុជាបានខិតខំអនុវត្តដើម្បីចូលរួមចំណែកដោះស្រាយវិបត្តិនៅក្នុងប្រទេសមីយ៉ាន់ម៉ា៕

ក្នុងសន្និសីទសារព័ត៌មាន ទទួលវ៉ាក់សាំងការពារកូវីដ-១៩ ដែលជាជំនួយរបស់រដ្ឋាភិបាលចិន នៅអាកាសយានដ្ឋានអន្តរជាតិភ្នំពេញ នារសៀលថ្ងៃទី៧ ខែកុម្ភៈ ឆ្នាំ២០២១ សម្ដេចតេជោ ហ៊ុន សែន បានធ្វើលិខិតទៅ        នាយករដ្ឋមន្ដ្រីឥណ្ឌា ដើម្បីស្នើសុំជួយផ្គត់ផ្គង់វ៉ាក់សាំងការពារជំងឺកូវីដ-១៩ ហើយមិត្តឥណ្ឌាក៏បានខិតខំចែករំលែកមកដល់កម្ពុជាចំនួន១០ម៉ឺនដូស ទាំងនេះគឺជាការផ្គត់ផ្គង់របៀបលក់ជូនមកកម្ពុជា។

សម្ដេចតេជោ មានប្រសាសន៍ថា «ខ្ញុំបានណែនាំឲ្យ រដ្ឋមន្ដ្រីក្រសួងសុខាភិបាល ណែនាំក្រុមលទ្ធកម្មវ៉ាក់សាំងរបស់យើងថា ត្រូវចាប់ផ្ដើមចរចាជាមួយឥណ្ឌា ១០ម៉ឺនដូសវាតិចណាស់សម្រាប់កម្ពុជា។ ចឹងដោយសារ ឥណ្ឌាប្រើប្រាស់បច្ចេក ទេសរបស់អង់គ្លេសដែលផលិតវ៉ាក់សាំង អេស្ត្រាសេនីកាល។ ដូច្នេះ ខ្ញុំបានបញ្ជាក់ថា ឲ្យចរចាជាមួយប្រទេសឥណ្ឌា សូមចាប់ទិញពី១លានដូសឡើងទៅ ក្នុងរង្វង់ពី១លានដូស ទៅ៤លានដូស ពីឥណ្ឌា»។ឆ្លើយតបទៅនឹង បងប្អូន អ្នកសារព័ត៌មាន ពីចំនួនវ៉ាក់សាំងដែលត្រូវប្រើ និងប្រភពនៃវ៉ាក់សាំង គឺសម្ដេចតេជោ មានបំណងផ្ដល់ជូនប្រជាពលរដ្ឋចំនួន៨០% នៃប្រជាពលរដ្ឋសរុប ដែលស្មើនឹងចំនួន១៣លាននាក់ ត្រូវការវ៉ាក់សាំងប្រមាណ២៦លានដូស។ តែបន្ទាប់ឆ្លងកាត់ការពិភាក្សាជាប់ជាប្រចាំជាមួយគណ:កម្មការកូវ៉ាក់ គឺខាងកូវ៉ាក់ថាគួរផ្ដល់ត្រឹម ៦០% ទៅ ៧០% ឬសម្រាប់តែ១០លាននាក់បានហើយ តែចំពោះសម្ដេចតេជោ បានបញ្ជាក់ថា សម្ដេចនៅតែចង់ផ្ដល់ជូនប្រជាពលរដ្ឋអោយបានចំនួន៨០% នៃប្រជាពលរដ្ឋសរុប។

សម្ដេចតេជោ បានលើកឡើងថា តាមការប្រមើលមើលរបស់សម្ដេច ប្រភពច្បាស់លាស់នៃវ៉ាក់សាំងគឺចិន ដែលនៅតែប្រភពយុទ្ធសាស្ត្រ ដោយសារ ចិនគឺមានការងាយស្រួលដឹកជញ្ជូន និងសីតុណ្ហភាពក៏ងាយស្រួលក្នុងការរក្សាទុក(ដែលចន្លោះតែពី ៦ ដល់ ៨ អង្សា)។

ប្រភពមួយទៀត គឺគណ:កម្មការកូវ៉ាក់ របស់អង្គការសុខភាពពិភពលោក នឹងផ្ដល់វ៉ាក់សាំងសម្រាប់ចំនួនប្រជាជន ២០% នៃប្រជាជនសរុប ស្មើនឹង ៣,៥ លាននាក់ ឬស្មើនឹង៧លានដូស ។ ដែលនេះជាច្រកទ្វាមួយ ទៀត ហើយតាមព័ត៌មាន គឺកូវ៉ាក់មានវ៉ាក់សាំងក្នុងដៃរួចហើយ។

ប្រភពមួយផ្នែកទៀតគឺទទួលបានពីប្រទេសអូស្ត្រាលី ដែលមាន៣ លានដូស ដូច្នេះតាមទិន្នន័យវ៉ាក់សាំងពីប្រភពទាំង៣នេះ ទទួលបានវ៉ាក់សាំងសរុប១១លានដូស ( ដែលនៅថ្ងៃនេះគឺយើងទទួលបាន៦០ម៉ឺនដូស ពីមិត្តចិន)។ ដូច្នេះ បើតម្រូវការ២០លានដូស សម្រាប់១០លាននាក់គឺយើងត្រូវការ៩លានដូសបន្ថែម តែបើយើងប្រើសម្រាប់១៣លាននាក់ គឺយើងនៅខ្វះ១៥លានដូស។

ប្រភពមួយទៀត ដែលសម្ដេចតេជោ បានលើកឡើង យើងអាចទិញវ៉ាក់សាំងពីថៃ(អេស្ត្រាសេនីកាល) ដែលប្រទេសថៃនឹងផលិតនៅខែឧសភា ខាងមុខនេះ បើដូច្នេះគឺងាយស្រួល ជិតយើងស្រាប់។ ហើយចំពោះតម្លៃវ៉ាក់សាំងនេះគឺ តម្លៃប្រមាណតែ $៤ ក្នុងមួយដូសចឹង យើងចំណាយតែ ៤០លានដុល្លារ សម្រាប់១០លានដូស ដែលចំនួននេះគឺយើងអាចប្រើថវិកាសប្បុរសធម៌បាន។

ជាថ្មីម្ដងទៀត សម្ដេចតេជោ នៅតែអំពាវនាវឲ្យបងប្អូនប្រជាពលរដ្ឋមានការប្រុងប្រយ័ត្ន អនុវត្តតាមការណែនាំរបស់ក្រសួងសុខាភិបាលជាប់ជាប្រចាំ និងសូមជូនពរបងប្អូនប្រជាពលរដ្ឋទាំងអស់ជួបតែសេចក្តីសុខ សេចក្តីចម្រើនគ្រប់ៗគ្នា៕

ការឯកភាពនេះ ធ្វើឡើងក្នុងជំនួបពិភាក្សាការងាររវាង លោក ថោង ខុន រដ្ឋមន្ត្រីក្រសួងទេសចរណ៍កម្ពុជា ជាមួយលោកស្រី ទេវ្យានី ឧត្តម ខូប្រាហ្កាដេ (Devyani Uttam Khobragade) ឯកអគ្គរដ្ឋទូតឥណ្ឌាប្រចាំកម្ពុជា នៅទីស្ដីការក្រសួងទេសចរណ៍ នាថ្ងៃទី២០ ខែមករា ឆ្នាំ២០២១។

ថ្នាក់ដឹកនាំទាំងពីរ បានលើកឡើងអំពីទំនាក់ទំនង កិច្ចសហប្រតិបត្តិការជាប្រវត្តិសាស្ត្ររវាង កម្ពុជា-ឥណ្ឌា និងបានពង្រឹងវិស័យការទូត កាន់តែជិតស្និទ្ធជាមួយគ្នា ក្រោមការដឹកនាំរបស់ សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា និងលោក នរិន្ទ្រា ម៉ូឌី (Narendra Modi) នាយករដ្ឋមន្ត្រីនៃសាធារណរដ្ឋឥណ្ឌា។

កម្ពុជា-ឥណ្ឌា មានទំនាក់ទំនងវប្បធម៌ និងសាសនាជាមួយគ្នាដ៏យូរលង់ ហើយកាលពីមុនកើតមានវិបត្តិជំងឺកូវីដ-១៩ ប្រជាជនកម្ពុជាក៏ចូលចិត្តទៅលេងកម្សាន្តនៅឥណ្ឌា តាមរយៈដំណើរទេសចរណ៍បែបសាសនាច្រើនណាស់ដែរ ដូច្នេះហើយទើបឯកឧត្តមរដ្ឋមន្ត្រី ថោង ខុន បានស្នើដល់ស្ថានទូតឥណ្ឌា ក៏ដូចជារដ្ឋាភិបាលឥណ្ឌា ធ្វើយ៉ាងណារៀបចំឱ្យមានខ្សែទស្សនកិច្ចបែបសាសនានេះឡើងវិញ បន្ទាប់ពីចប់វិបត្តិជំងឺកូវីដ-១៩។

ទាក់ទងនឹងកិច្ចសហប្រតិបត្តិការ លើវិស័យទេសចរណ៍ លោក ថោង ខុន បានលើកឡើង អំពីសំណើឱ្យមានការតភ្ជាប់ ជើងហោះហើរត្រង់រវាង កម្ពុជា-ឥណ្ឌា ក្រោយពន្យារពេលអស់មួយរយៈ ដោយសារការរំខានពីការរីករាលដាល នៃជំងឺកូវីដ-១៩។

លោកស្រី ទេវ្យានី ក៏បានអះអាងថា ការងារនេះក៏ជាការងារអាទិភាព ក្នុងបេសកកម្មជាឯកអគ្គរដ្ឋទូតរបស់លោកស្រីផងដែរ។ បើតាមលោកស្រីទេវ្យានី ស្ថានទូតឥណ្ឌាប្រចាំកម្ពុជា នឹងរួមសហការជាមួយក្រសួងទេសចរណ៍ និងភាគីពាក់ព័ន្ធដទៃទៀត ក្នុងការបន្តរៀបចំទិវាយោគៈអន្តរជាតិ (International Yuga Day) នៅរាជធានីភ្នំពេញ ខេត្តសៀមរាប ខេត្តព្រះសីហនុ និងខេត្តបាត់ដំបងជាដើម។

លោក ថោង ខុន បានស្នើសុំឱ្យឥណ្ឌា បន្តរៀបចំព្រឹត្តិការណ៍ ប្រណាំងរថយន្ត អាស៊ាន-ឥណ្ឌា និងចលនាទេសចរ បើកបរដោយខ្លួនឯង ដែលនឹងក្លាយជាព្រឹត្តិការណ៍ រឹតចំណងមិត្តភាព ក៏ដូចជាជំរុញចលនា ទេសចរតាមផ្លូវគោក រវាងឥណ្ឌានិងអាស៊ាន។

លោកស្រីឯកអគ្គរដ្ឋទូត ក៏បានទទួលយល់ព្រម និងគាំទ្រយ៉ាងពេញទំហឹង ចំពោះគំនិតផ្ដួចផ្ដើមនេះ ពីព្រោះវានឹងផ្ដល់ប្រយោជន៍ច្រើន ដល់វិស័យទេសចរណ៍ ស្របពេលបច្ចុប្បន្ន យុវជនឥណ្ឌាពិតជាចូលចិត្តខ្លាំងណាស់ ចំពោះដំណើរ ទេសចរណ៍បែបនេះ។

ស្ថានទូតឥណ្ឌា ក៏បានគាំទ្រដល់ គម្រោងអភិវឌ្ឍន៍តំបន់ឆ្នេរសមុទ្រ កម្ពុជាបន្តទៀត ព្រមទាំងអភិវឌ្ឍន៍ទេសចរណ៍ឌីជីថល ដោយលោកស្រីឯកអគ្គរដ្ឋទូត ឥណ្ឌា សន្យាថា នឹងសម្របសម្រួល ដល់ការបណ្ដុះបណ្ដាល អ្នកជំនាញទេសចរណ៍ តាមរយៈប្រព័ន្ធវីដេអូអនឡាញ។

ក្រៅពីនេះ ស្ថានទូតឥណ្ឌាប្រចាំកម្ពុជា ក៏នឹងជួយ កែលម្អប្រព័ន្ធហេដ្ឋារចនាសម្ព័ន្ធ តាមតំបន់អេកូទេសចរណ៍ ទេសចរណ៍វប្បធម៌ ដូចជាការកែលម្អផ្លូវចូល ផ្លាកសញ្ញា ការបណ្ដុះបណ្ដាលប្រជាពលរដ្ឋ នៅតាមមូលដ្ឋាន ឱ្យទទួលជំនាញក្នុងការស្វាគមន៍ ភ្ញៀវទេសចរ កាន់តែល្អប្រសើរ។

ភាគីទាំងពីរ នឹងបង្កើតក្រុមការងារ ដែលមានសមាសភាព ពីក្រសួងទេសចរណ៍ ក្រសួងវប្បធម៌ និងវិចិត្រសិល្បៈ ក្រសួងព័ត៌មាន និងក្រសួង ស្ថាប័នពាក់ព័ន្ធមួយចំនួនទៀត ក៏ដូចជាក្រុមការងារ នៅស្ថានទូតឥណ្ឌា ប្រចាំកម្ពុជា និងក្រុមការងារឥណ្ឌា នៅរដ្ឋធានីញូវដេលី ផងដែរ ដើម្បីអនុវត្តការងារ ទាំងអម្បាលម៉ាន នេះ ឱ្យបានល្អប្រសើរ ក្រោមការរំពឹងទុកថានឹងចាប់ផ្ដើម អនុវត្តនៅក្រោយពេល ចប់វិបត្តិជំងឺកូវីដ-១៩៕

លោកស្រី ដេវីយ៉ានី ឧត្តាំ បានលើកឡើងនូវគម្រោងអភិវឌ្ឍន៍មួយចំនួនដូចជាការជួសជុលអភិរក្សប្រាសាទព្រះវិហារ ការជំរុញលើកកម្ពស់ការប្រើប្រាស់ទឹកស្អាតនៅជនបទរួមទាំងអណ្តូងស្នប់ និងជួយដល់វិស័យសុខាភិបាល ការប្រយុទ្ធប្រឆាំងជំងឺគ្រុនចាញ់ គ្រុនឈាម ជាដើម។

ជាមួយគ្នានេះលោកជំទាវបានប្តេជ្ញាថានឹងខិតខំជំរុញ ដល់វិនិយោគិនឥណ្ឌាមកបណ្ដាក់ទុននៅកម្ពុជា ឱ្យកាន់តែច្រើន ព្រមទាំងជំរុញឱ្យមានការហោះហើរត្រង់រវាងប្រទេសទាំងពីរ។ លោកស្រីឯកអគ្គរដ្ឋទូតបានជម្រាបសម្តេចដែរថា ឥណ្ឌានឹងលើកកម្ពស់ការទំនាក់ទំនងរវាងប្រជាជននិងប្រជាជនតាមបែបឌីជីថល ហើយគាំទ្រហិរញ្ញប្រទានដល់ការកសាងផ្លូវល្បឿនលឿនក្នុងតំបន់អាស៊ាន។

លោកស្រីឯកអគ្គរដ្ឋទូតបានជម្រាបសម្តេចប្រធានរដ្ឋសភាដែលថា ចំពោះសំណើរបស់សម្តេចនាយករដ្ឋមន្រ្តី ដែលបានស្នើដល់ប្រទេសឥណ្ឌជួយផ្តល់ជំនួយមនុស្សធម៌វ៉ាក់សំាងការពារកូវីដ១៩ ដល់ប្រទេសកម្ពុជានោះ លោកជំទាវនឹងរាយការណ៍ជូនថ្នាក់ដឹកនាំឥណ្ឌាបានជ្រាបនិងសម្រេចនៅក្នុងកិច្ចការនេះ។

សម្តេចអគ្គមហាពញាចក្រី ហេង សំរិន បានគាំទ្របេសកកម្មការទូតថ្មីរបស់លោកស្រីនៅកម្ពុជានឹងបន្តរួមចំណែកលើកកម្ពស់ទំនាក់ទំនងចំណងមិត្តភាព និងកិច្ចសហប្រតិបត្តិការ រវាងប្រទេសយើងទាំងពីរឱ្យកាន់តែល្អប្រសើរថែមទៀត និងបានរំលឹកថាឥណ្ឌាជាប្រទេសមួយក្នុងចំណោមប្រទេសមិនច្រើនទេ ដែលគាំទ្រដល់រដ្ឋាភិបាលកម្ពុជានៅក្រោយថ្ងៃជ័យជម្នះ៧មករា ឆ្នាំ១៩៧៩ ខណៈប្រទេសជាច្រើនពិសេសប្រទេសលោកខាងលិចបានហ៊ុមព័ទ្ធសេដ្ឋកិច្ចកម្ពុជា។

សម្តេចប្រធានរដ្ឋសភា បានសម្តែងការពេញចិត្ត ចំពោះវឌ្ឍនភាព នៃទំនាក់ទំនង និងកិច្ចសហប្រតិបត្តិការទ្វេភាគី រវាងប្រទេសទំាងពីរ ដែលមានការរីកចម្រើនឥតឈប់ឈរ ទំាងវិស័យនយោបាយ ការទូត សេដ្ឋកិច្ច ពាណិជ្ជកម្ម សង្គមកិច្ច វប្បធម៌ សុខាភិបាល និងការអភិវឌ្ឍធនធានមនុស្ស ដូចជាការបណ្តុះបណ្តាលដល់និស្សិត និងមន្រ្តីកម្ពុជា និងសូមជំរុញឱ្យបន្តជួយបណ្តុះបណ្តាលជំនាញផ្សេងៗបន្ថែមទៀត នាពេលអនាគត។

សម្តេចប្រធានរដ្ឋសភា បានគាំទ្រកិច្ចខិតខំប្រឹងប្រែងរបស់រដ្ឋាភិបាលប្រទេសទាំងពីរ ដែលឈានទៅដល់ការចុះកិច្ចព្រមព្រៀង និងអនុស្សរណៈយោគយល់គ្នា ក្នុងកិច្ចសហប្រតិបត្តិការ លើវិស័យអាទិភាពជាច្រើន និងបានត្រៀមចុះហត្ថលេខាលើឯកសារសំខាន់ៗជាច្រើនទៀតនាពេលអនាគត។

លោកស្រី ដេវីយ៉ានី ឧត្តាំ ខូប្រាហ្គាដ បានស្នើសុំសម្តេចបន្តពង្រឹងពង្រីកកិច្ចសហប្រតិបត្តិការរវាងសភាប្រទេសទាំងពីរ ឱ្យកាន់តែរឹងមាំថែមទៀត និងបានគោរពអញ្ជើញសម្តេចដឹកនាំគណប្រតិភូសភាកម្ពុជា ទៅបំពេញទស្សនកិច្ចនៅប្រទេសឥណ្ឌាក្រោយពេលជំងឺកូវីដ១៩ ធូរស្រាល។

សម្តេចបានទទួលយកសំណើនេះ និងបានលើកឡើងថា រដ្ឋសភាកម្ពុជាបានធ្វើកិច្ចសហប្រតិបត្តិការជាច្រើនជាមួយរដ្ឋសភាឥណ្ឌា នៅក្នុងក្របខណ្ឌក្រុមមិត្តភាពសភាទាំងពីរ តាមរយៈការផ្លាស់ប្តូរទស្សនកិច្ចការគាំទ្រគ្នាទៅវិញទៅមក នៅលើវេទិកាអន្តរសភានានា នៅក្នុងតំបន់និងសកលលោក មានជាអាទិ៍៖អន្តរសភាអាស៊ាន (AIPA) និងសហភាពអន្តរសភា (IPU) ជាដើម៕

យោងតាម​គេហទំព័រ​ហ្វេសប៊ុក​របស់​សម្ដេចតេជោ​ហ៊ុន​សែន​បាន​ឱ្យ​ដឹង​ថាសំណើខាងលើនេះ ត្រូវបាន សម្តេចតេជោនាយករដ្ឋមន្រ្តី បានស្នើតាមរយៈលោកស្រីឯកអគ្គរដ្ឋទូតទៅកាន់នាយករដ្ឋមន្រ្តីឥណ្ឌា Narendra Damodardas Modi ព្រោះប្រទេសឥណ្ឌាបានផលិតវ៉ាក់សាំងកូវីដ១៩ បានដោយខ្លួនឯង ហើយគ្រោងនឹងចាក់ជូនប្រជាពលរដ្ឋរបស់ខ្លួនជាង ៣០០លាននាក់នៅក្នុងឆ្នាំនេះផងដែរ៕