WHO៖ កម្ពុជា ឈរនៅមាត់ជ្រោះ នៃសោកនាដកម្ម ព្រោះមេរោគរាតត្បាតកូវីដ-១៩ បើពលរដ្ឋ មិនធ្វើទង្វើដោយទទួលខុសត្រូវ

មករា — Mon, 12 Apr 2021 01:15:23 +0000

ភ្នំពេញ៖ លោកស្រី លី អាយលែន (Li Ailan) តំណាងអង្គការ WHO ប្រចាំកម្ពុជាបានព្រមានថា ប្រទេសកម្ពុជា ឈរនៅមាត់ជ្រោះ នៃសោកនាដកម្ម ព្រោះមេរោគរាតត្បាតកូវីដ-១៩ បើសិនជាប្រជាពលរដ្ឋ មិនធ្វើទង្វើដោយទទួលខុសត្រូវ ។

តំណាងអង្គការ WHO បញ្ជាក់ថា ” ប្រទេសកម្ពុជា ស្ថិតនៅលើផ្លូវបំបែក។ អ្វីដែលយើងទាំងអស់គ្នាត្រូវធ្វើក្នុងប៉ុន្មានថ្ងៃ និងសប្តាហ៍ខាងមុខ នឹងកំណត់ពីអនាគតរបស់យើង។ ប្រទេសជាតិ ត្រូវតែរួមគ្នាតែមួយឆ្ពោះទៅរកគោលដៅរួមមួយ រួមគ្នា យើងអាចគ្រប់គ្រងការផ្ទុះឡើងនេះ។ បើសិនជាយើងមិនអាចគ្រប់គ្រងបានទេ ផលវិបាកទាំងនេះ នឹង ក្លាយជាមហន្តរាយ”។

អង្គការWHO ក៏បានសាទរចំពោះកិច្ចខំប្រឹងប្រែង និងវិធានការរបស់រាជរដ្ឋាភិបាល ចំពោះការបិទ ការធ្វើដំណើរឆ្លងកាត់ខេត្ត និងការជួបជុំគ្នាផ្សេងៗ។ អង្គការ បានស្នើសុំឱ្យប្រជាពលរដ្ឋកម្ពុជា ចូលរួមទប់ ស្កាត់ការឆ្លង និងចម្លង ដោយគោរពវិធានការសុខាភិបាល។ ជាមួយគ្នានោះដែរក៏បានអំពាវនាវឱ្យពលរដ្ឋរីករាយជួបជុំគ្រួសារ អបអរសាទរពិធីបុណ្យចូលឆ្នាំ នៅក្នុងផ្ទះ ដើម្បីសុវត្ថិភាព៕

WHO – Champey News