បន្ទាយមានជ័យ៖ បុរសម្នាក់ទើបវិលត្រឡប់មកពីប្រទេសថៃ ត្រូវបានបញ្ជូនទៅធ្វើចត្តាឡីស័ក នៅតំបន់ស ព្រំដែនកម្ពុជា-ថៃ ក្នុងភូមិសាស្ត្រឃុំគោករមៀង ស្រុកថ្មពួក ខេត្តបន្ទាយមានជ័យ បានបង្កការអុកឡុករំខានប្រជាពលរដ្ឋមកពីប្រទេសថៃដូចគ្នាកំពុងធ្វើចត្តាឡីស័កដូចគ្នា ត្រូវបានសមត្ថកិច្ចនាំខ្លួនប្រគល់ឲ្យកម្លាំងអធិការដ្ឋាននគរបាលស្រុកថ្មពួក ដើម្បីធ្វើការសួរនាំ ។
ប្រភពពីនគរបាលស្រុកថ្មពួកបានឲ្យដឹងថា បុរសខាងលើមានឈ្មោះ ស្រឿយ ប្រីយ៍ អាយុ២៨ឆ្នាំ មានទីលំនៅភូមិប្រាសាទ ឃុំស្លក្រាម ស្រុកស្វាយចេក ខេត្តបន្ទាយមានជ័យ ជាពលរដ្ឋទើបត្រឡប់មកពីធ្វើការនៅប្រទេសថៃបានរយៈពេលមួយថ្ងៃ គឺនៅថ្ងៃទី១១ ខែសីហា ឆ្នាំ២០២១នេះ ខណៈធ្វើសកម្មភាពបង្កការរំខានដល់អ្នកដទៃ កម្លាំងចម្រុះប្រចាំការនៅច្រកតំបន់បឹងត្រកួន បាននាំខ្លួនប្រគល់មកអោយកម្លាំងជំនាញនៃអធិការរដ្ឋាននគរបាលស្រុកថ្មពួក ធ្វើការសាកសួរ។
នគរបាលជំនាញបានបញ្ជាក់ថា ឈ្មោះ ស្រឿយ ប្រីយ៍ តាមការបញ្ជាក់របស់គ្រូពេទ្យយកសំណាកពិនិត្យលទ្ធផលអវិជ្ជមាន និងធ្វើតេស្តរកសារធាតុញៀន លទ្ធផលក៏អវិជ្ជមានដែរ។
បើតាមការអះអាងពីស្ត្រីឈ្មោះ ស្រឿយ សារួម អាយុ៥៤ឆ្នាំ ត្រូវជាម្តាយមីង បានប្រាប់សមត្ថកិច្ចថា ក្មួយប្រុសគាត់ឈ្មោះ ស្រឿយ ប្រីយ៍នេះ ពីដើមមានសតិល្អធម្មតា ហើយពុំមានជំងឺអ្វីដែរ ទើបរយៈពេល១ខែកន្លងមកនេះ ក៏ចាប់ផ្តើមមានសភាពចម្លែក មានសតិមិនល្អខុសពីធម្មតា។ ដោយឃើញសភាពមិនប្រក្រតី ក៏បានឲ្យគ្រូទាយឃើញថា ក្មួយរបស់គាត់ មានគ្រោះ ហើយមានអ្នកតាចូល ព្រាយចូលរូប និងមានគេដាក់អំពើ។
ផ្អែកតាមសំណូមពររបស់អាណាព្យាបាល បានស្នើសុំយកបុរសឈ្មោះ ប្រីយ៍ នេះទៅព្យាបាលជំងឺតាមជំនឿ ហើយនិងធ្វើចត្តាឡីស័កនៅផ្ទះ៕