ភ្នំពេញ៖ កាលពីព្រឹកថ្ងៃទី១ ខែមេសា ឆ្នាំ២០២៥ ឯកឧត្តមបណ្ឌិត ហេង សុផាន់ណារិទ្ធ អគ្គនាយករង ប.ស.ស. តំណាង ឯកឧត្តម ម៉េង ហុង ប្រតិភូរាជរដ្ឋាភិបាលទទួលបន្ទុកជាអគ្គនាយក ប.ស.ស. នៃក្រសួងការងារ និងបណ្ដុះបណ្ដាលវិជ្ជាជីវៈ បានអញ្ជើញជាអធិបតីក្នុងពិធីបើកវគ្គបណ្ដុះបណ្ដាលស្តីពី “បច្ចុប្បន្នភាពការ ងារជំនាញផ្ទៃក្នុង ប.ស.ស.” បានថ្លែងថា បច្ចុប្បន្ន ប.ស.ស. បានធ្វើការយ៉ាងសកម្មក្នុងដំណើរការ នៃបរិវត្តកម្មបច្ចេកវិទ្យា សំដៅដល់ការផ្ដល់សេវាគាំទ្រតាមរយៈប្រព័ន្ធអនឡាញ ដើម្បីផ្ដល់ភាពងាយស្រួលក្នុងការបម្រើសេវាសាធារណៈឱ្យកាន់តែល្អប្រសើរ និងឆាប់រហ័សជូនសមាជិករបស់ខ្លួន។
ឯកឧត្តមបណ្ឌិត អគ្គនាយករង ប.ស.ស. បានបន្ថែមថា គិតត្រឹមបំណាច់ខែមីនា ឆ្នាំ២០២៥នេះ ប.ស.ស. បានធ្វើបរិវត្តកម្មបច្ចេកវិទ្យាដែលរួមមាន៖ បញ្ជរសេវាសាធារណៈចល័ត ដើម្បីចុះបញ្ជិកា បង្កើតកម្មវិធីវេបផតថលក្នុងការចុះបញ្ជីសហគ្រាស/គ្រឹះស្ថាន និងបង់ភាគទានតាម online បង្កើតកម្មវិធីទូរស័ព្ទដៃសម្រាប់សមាជិក ប.ស.ស. ដើម្បីសមាជិក ប.ស.ស. អាចចុះឈ្មោះជាបុគ្គលស្វ័យនិយោជន៍ និងចុះបញ្ជីអ្នកក្នុងបន្ទុករបស់ខ្លួន បង្កើតប្រព័ន្ធតាមដាន (Tracking System) លើការចុះកិច្ចព្រមព្រៀងរវាង ប.ស.ស. និងមូលដ្ឋានសុខាភិបាល ការទូទាត់ជូនមូលដ្ឋានសុខាភិបាលដៃគូ ប.ស.ស. ប្រព័ន្ធទាមទារតាវកាលិក និងមានប្រព័ន្ធបណ្តឹងអនាមិកផងដែរ។
ឯកឧត្តមបណ្ឌិត អគ្គនាយករង ប.ស.ស. ក៏បានរំលេចបន្ថែមថា ប.ស.ស. នឹងអភិវឌ្ឍន៍សមត្ថភាពការងាររបស់ខ្លួនជាបន្តបន្ទាប់ និងរៀបចំប្រតិបត្តិការការងារទៅជាប្រព័ន្ធទាំងអស់។ ទន្ទឹមនឹងការវិវត្តន៍ខ្លួនឈានទៅរកប្រព័ន្ធបច្ចេកវិទ្យានេះ ទាមទារឱ្យថ្នាក់ដឹកនាំគ្រប់លំដាប់ថ្នាក់ និងគ្រប់សាខាខេត្ត-ខណ្ឌទាំងអស់ត្រូវចូលរួមស្វែងយល់បន្ថែម តាមរយៈវគ្គបណ្ដុះបណ្ដាលនាឱកាសនេះ ដើម្បីពង្រឹង និងពង្រីកសមត្ថភាពបន្ថែមដែលអាចអនុវត្តការងារតាមបរិបទថ្មី ប្រកបដោយជោគជ័យ និងបង្កើនទំនុកចិត្តកាន់តែខ្លាំង ពីសមាជិកគ្រប់រូប។
សូមបញ្ជាក់ថា វគ្គបណ្ដុះបណ្ដាលខាងលើនេះ មានការធ្វើបទបង្ហាញពីថ្នាក់ដឹកនាំ និងមន្រ្ដីជំនាញជាច្រើនរូប ដែលប្រព្រឹត្តទៅរយៈពេល ៣ថ្ងៃកន្លះ នៅសាលប្រជុំសន្ដិភាព ស្នាក់ការកណ្ដាល ប.ស.ស. រាជធានីភ្នំពេញ ដោយមានវត្តមានចូលរួមដោយផ្ទាល់ពីសំណាក់ថ្នាក់ដឹកនាំ ប.ស.ស. ស្នាក់ការកណ្តាល និងប្រធាន អនុប្រធាន សាខាខេត្ត-ខណ្ឌ សរុបប្រមាណជាង ៣០០រូប៕
