ភ្នំពេញ៖ អ្នកនាំពាក្យសាលារាជធានីភ្នំពេញ លោក ម៉េត មាសភក្តី បានមានប្រសាសន៍ប្រាប់ បណ្តាញសារព័ត៌មាន នៅរសៀលថ្ងៃទី២០ ខែវិច្ឆិកា នេះ ថា លោក ឃួង ស្រេង អភិបាលរាជធានីភ្នំពេញ សម្រេចបញ្ជាអោយបិទការដ្ឋានអគារ៤២ជាន់ ហើយ ដែលតែងតែបង្កគ្រោះថ្នាក់ដល់ប្រជាពលរដ្ឋតាមដងផ្លូវជាញឹកញាប់ ដើម្បីធ្វើការណែនាំ និងដោះស្រាយបញ្ហាដែលតែងកើតមាន។ លោក ម៉េត មាសភក្តី បន្តថា ចំពោះការខូចខាតវិញ គឺ នឹងត្រូវដោះស្រាយគ្នាជាសំណងរដ្ឋប្បវេណី នៅពេលក្រោយទៀត ។
គួរបញ្ជាក់ថានៅវេលាម៉ោង១៖៣០នាទី រសៀលថ្ងៃទី២០ ខែវិច្ឆិកា ឆ្នាំ២០១៩ នេះ មានហេតុការណ៍ធ្លាក់ដែកពីលើសំណង់អគារ៤២ជាន់ ត្រូវរថយន្តទំនើបមួយគ្រឿង តាមមហាវិថីព្រះមុនីវង្ស សង្កាត់បឹងកេងកង១ ខណ្ឌបឹងកេងកង រាជធានីភ្នំពេញ ។ នេះជាលើកទី២ ហើយ ដែលមានការធ្លាក់ដែកចំឡានប្រជាពលរដ្ឋ នៅតាមដងផ្លូវ ខណៈដែលកាលពីពេលកន្លងទៅក៏មានហេតុការណ៍ធ្លាក់ដែកពីលើអគារមួយនេះត្រូវចំរថយន្តទំនើប លុច្សស៊ីស មួយគ្រឿង ដែលចតនៅតាមបណ្តោយផ្លូវព្រះសីហនុ ក្បែរគម្រោងសំណង់មួយនេះ៕
