ភ្នំពេញ៖ រដ្ឋបាលខេត្តកែប បានប្រកាសឲ្យដឹងថា តាមលទ្ធផលដែល ប្រកាសដោយក្រសួងសុខាភិបាល នៅព្រឹកថ្ងៃទី២២ មីនា បញ្ជាក់ថា ខេត្តកែបមានបុគ្គលវិជ្ជមានកូវី១៩ ចំនួន ម្នាក់ ឈ្មោះ ប៉ែន ហេង ភេទស្រី អាយុ ៣៤ឆ្នាំ មានមុខរបរជាជំនួយការចុងភៅនៅកាស៊ីណូ ហ៊ួយហ័រ ភូមិ៣ សង្កាត់៤ ក្រុងព្រះសីហនុ ខេត្តព្រះសីហនុ បានមកដល់ខេត្តកែប ថ្ងៃទី១៣ ខែមីនា ឆ្នាំ២០២១ វេលាម៉ោង១១:០០នាទីយប់ តាមរយៈមធ្យោបាយម៉ូតូ ផ្ទាល់ខ្លួន ដោយសំងំលាក់ខ្លួននៅផ្ទះ។
នៅថ្ងៃទី១៩ ខែមីនា ឆ្នាំ២០២១ បានទទួលដំណឹងវិលត្រឡប់មកវិញ របស់បុគ្គលរូបនេះ ក្រុមឆ្លើយតបបន្ទាន់បាន ចុះទៅពិនិត្យសួរនាំធ្វើការវាយតម្លៃហានិភ័យ និងបាននាំ យកបុគ្គលរូបនេះធ្វើចត្តាឡីស័ក នៅមណ្ឌលចត្តាឡីស័កខេត្ត ព្រមទាំងបានយកសំណាកនៅព្រឹកថ្ងៃទី២០ ខែ មីនា ឆ្នាំ២០២១ ទើបទទួលបានលទ្ធផលវិជ្ជមានកូវិដ-១៩ នៅព្រឹកថ្ងៃទី២២ ខែមីនា ឆ្នាំ២០២១នេះ។
យោងតាមសេចក្ដីប្រកាសព័ត៌មាន របស់រដ្ឋបាលខេត្តកែប នៅរសៀលថ្ងៃទី២២ មីនានេះ បានឲ្យដឹងបន្តថា អ្នកដែលពាក់ព័ន្ធផ្ទាល់រួមមាន៖
១- ឈ្មោះ ប៉ែន ណាវី ភេទស្រី អាយុ ៤៧ឆ្នាំ នៅភូមិកែប សង្កាត់កែប ក្រុងកែប
២- ឈ្មោះ សៀម ស្រីទូច ភេទស្រី អាយុ ២៦ឆ្នាំ នៅភូមិកែប សង្កាត់កែប ក្រុងកែប
៣-ឈ្មោះ សៀង គឺ ភេទប្រុស អាយុ ៣៧ឆ្នាំ នៅភូមិកែប សង្កាត់កែប ក្រុងកែប
៤- ឈ្មោះ ដាន ត្រូវ ភេទប្រុស អាយុ ២៣ឆ្នាំ នៅភូមិកែប សង្កាត់កែប ក្រុងកែប
៥- ឈ្មោះ ស្រេង ចាន់ណាក់ ភេទប្រុស អាយុ ៣៣ឆ្នាំ នៅភូមិកែប សង្កាត់កែប ក្រុងកែប។
បុគ្គលប៉ះពាល់ផ្ទាល់ទាំង ៥នាក់នេះ បានយក សំណាកវត្ថុវិភាគ និងធ្វើចត្តាឡីស័កនៅមណ្ឌល ចត្តាឡីស័កខេត្តដោយមានការដាក់ កម្លាំងការពារប្រចាំការយ៉ាងម៉ត់ចត់។
បច្ចុប្បន្នក្រុមការងារឆ្លើយតបបន្ទាន់ កំពុងស្រាវជ្រាវអ្នកប៉ះពាល់ផ្ទាល់ និងប្រយោលជាមួយបុគ្គលវិជ្ជមានកូវីដ-១៩នេះបន្តទៀត។
ទន្ទឹមនេះ សូមអញ្ជើញបងប្អូនផ្សេងៗទៀត ដែលធ្លាប់មានទំនាក់ទំនងជាមួយបុគ្គលវិជ្ជមាន និងមានរោគសញ្ញា ដូចជាគ្រុនក្តៅ ក្អក កណ្តាស ឈឺបំពង់ក ពិបាកដកដង្ហើម សូមទំនាក់ទំនងក្រុមការងារ តាមរយៈ ទូរស័ព្ទលេខ ០១៦ ៣៣៨ ៣៣៣ ឬ០១២ ៤៩៣ ៣១៤ ដើម្បីធ្វើតេស្តសំណាកឱ្យបានឆាប់បំផុត។ ដោយឡែកចំពោះអ្នកដែលប៉ះពាល់ ដោយប្រយោលជាមួយបុគ្គលរូបនេះ សូមតាមដានសុខភាពរបស់ខ្លួន និងត្រូវធ្វើ ចត្តាឡីស័កចំនួន១៤ថ្ងៃនៅផ្ទះខ្លួនឯង សំដៅចូលរួមទប់ស្កាត់ការរីករាលដាលនៃជំងឺកូវីដ-១៩ក្នុងសហគមន៍៕
![](https://i0.wp.com/champeynews.com/wp-content/uploads/2021/03/IMG_20210322_164048_753.jpg?resize=640%2C906&ssl=1)
![](https://i0.wp.com/champeynews.com/wp-content/uploads/2021/03/IMG_20210322_164109.jpg?resize=526%2C627&ssl=1)