យោងតាមការប្រកាសឱ្យដឹងពីរដ្ឋបាលខេត្តបន្ទាយមានជ័យ កាលពីថ្មីៗនេះបានឱ្យដឹងថា សេវារថយន្តក្រុងសាធារណៈតភ្ជាប់ពីក្រុងប៉ោយប៉ែត ឆ្ពោះទៅស្រុកម៉ាឡៃ នឹងត្រូវដាក់ឱ្យប្រើប្រាស់ក្នុងឆ្នាំ ២០២០ ខាងមុខនេះ ដើម្បីបង្កភាពងាយស្រួល និងសម្រួលចរាចរណ៍ដល់ប្រជាពលរដ្ឋ ។
អភិបាលខេត្តបន្ទាយមានជ័យ លោក អុំ រាត្រី បានប្រាប់សារព័ត៌មានថា ខេត្តបានសម្រេចឲ្យដំណើរការរថយន្តក្រុងសាធារណៈ ២០នាទីម្ដង ដែលតភ្ជាប់ចរាចរណ៍ពីទីក្រុងប៉ោយប៉ែត ឆ្ពោះទៅស្រុកម៉ាឡៃ សម្រាប់ជាការប្រើប្រាស់មុនគេបង្អស់ ដោយមិនគិតថ្លៃរយៈពេល ៣ខែ។
គោលបំណងនៃការដាក់ឱ្យដំណើរនេះ គឺសម្រួលការធ្វើដំណើរ កាត់បន្ថយការចំណាយ កាត់បន្ថយគ្រោះថ្នាក់ចរាចរណ៍ ហើយធ្វើឱ្យជីវភាពប្រជាពលរដ្ឋកាន់តែភាពល្អប្រសើរ។
សេវារថយន្តក្រុងខាងលើនេះមាន រថយន្តចំនួន ១៥ គ្រឿង និងអាចដាក់ឱ្យដំណើរការនៅឆ្នាំ២០២០ខាងមុខនេះ ដោយជំហានបន្ទាប់នឹងអាចដាក់ឱ្យដំណើរការពីក្រុងប៉ោយប៉ែត ឆ្ពោះមកក្រុងសិរីសោភ័ណបន្ថែមទៀត។
ការធ្វើដំណើរពីក្រុងប៉ោយប៉ែត ទៅស្រុកម៉ាឡៃមានចម្ងាយប្រមាណ ៤០គីឡូម៉ែត្រ ដោយក្នុងនោះទីតាំងចំណតរថយន្តបានរៀបចំរួចជាស្រេចហើយ អាចដំណើរការអាចដើមឆ្នាំក្រោយនេះ៕
