កែប ៖ នៅរសៀលថ្ងៃទី៤ ខែមករា ឆ្នាំ២០២០នេះ សមត្ថកិច្ចនគរបាលខេត្តកែប បានឃាត់ខ្លួនម្ចាស់សំណង់អគារកម្ពស់៦ជាន់ បាក់រលំ ២នាក់ប្ដីប្រពន្ធហើយ ។ នេះបើយោងតាមការឆ្លើយប្រាប់តាមទូរស័ព្ទរបស់លោកស្នងការនគរបាលខេត្ត មកគេហទំព័រនិងព័ត៌មាន របស់អគ្គស្នងការនគរបាលជាតិ នៅវេលាម៉ោង១៤និង៤៧នាទីមុននេះបន្តិច។
សូមបញ្ជាក់ថា ប្ដីឈ្មោះ ឯក សារុន ប្រពន្ធឈ្មោះ ឈីវ សុធី រស់នៅភូមិ១ សង្កាត់៣ ក្រុង/ខេត្តព្រះសីហនុ។
សូមជម្រាបថា ករណីរលំបាក់អគារកម្ពស់៦ជាន់ថ្មីនេះ បានកើតឡើងនៅវេលាម៉ោងប្រមាណ ៤និង៣០នាទីល្ងាចថ្ងៃទី៣ ខែមករា ឆ្នាំ២០២០ ហើយក្នុងអគារនេះ ត្រូវបានគេសន្និដ្ឋានថា មានជនរងគ្រោះប្រមាណ២០ទៅ៣០នាក់ ដែលជាអ្នកម៉ៅការ និងកម្មករសំណង់ដែលកប់នៅក្នុងនេះ។ អគារនេះ ត្រូវបានសាងសង់រួចរាល់ប្រមាណជា៩០ភាគរយ ហើយដែលបាក់រលំនៅពេលដែលចាក់ប្លង់សេខាងលើបង្អស់។ នេះជាឧបទ្ទវហេតុរលំអគារលើកដំបូងក្នុងឆ្នាំ២០២០នេះ ខណៈដែលឆ្នាំ២០១៩ ក៏មានករណីរលំបាក់អគារកំពស់៧ជាន់មួយផងដែរ កាលពីខែមិថុនា ឆ្នាំ២០១៩ ដែលបណ្តាលឱ្យមានមនុស្សស្លាប់២៨នាក់ និងរស់២៦នាក់៕
ប្រភព៖ អគ្គស្នងការនគរបាលជាតិ
