ភ្នំពេញ÷ សម្ដេចពិជ័យ សេនាទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិបានមានប្រសាសន៍ថា ទោះបីព្រឹត្តិការណ៍ ៣ វិច្ឆិកា បានបញ្ចប់ តែការគំរាមកំហែងរបស់កូវីដ-១៩នៅមានកម្រិតខ្ពស់គួរឱ្យបារម្ភ ដូច្នេះត្រូវបន្តអនុវត្តតាមវិធានការរបស់ក្រសួងសុខាភិបាល។
តាមរយ:ហ្វេសប៊ុកនាព្រឹកថ្ងៃទី២២ ខែវិច្ឆិកា ឆ្នាំ២០២០នេះ សម្ដេចទៀ បាញ់បានលើកឡើងយ៉ាងដូច្នេះថា” ការគំរាមកំហែងរបស់មេរោគកូវីដ-១៩ គឺនៅមានកម្រិតខ្ពស់គួរឱ្យបារម្ភ បើទោះជាព្រឹត្តិការណ៍ ៣ វិច្ឆិកា ត្រូវបានបិទបញ្ចប់ហើយក៏ដោយ។ ហេតុនេះ សូមបងប្អូនប្រជាពលរដ្ឋ បន្តពាក់ម៉ាសឱ្យបានត្រឹមត្រូវ ឧស្សាហ៍លាងសម្អាតដៃជាមួយសាប៊ូឬអាល់កុល បន្តរក្សាគម្លាតឆ្ងាយពីគ្នា និងអនុវត្តឱ្យបានម៉ឺងម៉ាត់នូវរាល់វិធានការនានា ដែលក្រសួងសុខាភិបាលបានណែនាំ”។
សូមជម្រាបជូនថា គិតត្រឹមថ្ងៃទី២២ ខែវិច្ឆិកានេះ នៅកម្ពុជារកឃើញអ្នកឆ្លងជំងឺកូវីដ១៩ ចំនួន៣០៦នាក់ (ស្ត្រី៦២នាក់ និងបុរស២៤៤នាក់) ក្នុងនោះអ្នកព្យាបាលជាសះស្បើយចំនួន២៩៥នាក់ និងអ្នកកំពុងសម្រាកព្យាបាលនៅមន្ទីរពេទ្យចំនួន១១នាក់៕
