សោកស្ដាយ! សត្វផ្សោតមួយក្បាលទម្ងន់ជិត១០០គីឡូក្រាម ងាប់ដោយសារជាប់មង

0
9

ភ្នំពេញ៖ សត្វផ្សោតមួយក្បាលទម្ងន់ជិត ១០០គីឡូក្រាម ត្រូវបានប្រទះឃើញងាប់កាលពីល្ងាចទី១៤ ខែមករាឆ្នាំ២០២១ ដោយជាប់មងស្ថិតនៅក្នុងអន្លង់ផ្សោតកាំពី ក្នុងភូមិកាំពី ឃុំសំបុក ស្រុកចិត្របុរី ខេត្តក្រចេះ។

លោក មួង ដា ជាអ្នកបើកទូកជូនភ្ញៀវទេសចរមើលសត្វផ្សោតនៅរម្មណីយដ្ឋានអន្លង់ផ្សោតកាំពី ដែលរស់នៅភូមិកាំពី ឃុំសំបុក ស្រុកចិត្របុរី ខេត្តក្រចេះ ជាអ្នកប្រទះឃើញ ហើយបានរាយការណ៍ជូនមកលោក គឹម គី និងលោក ស្រី ស៊ីថា ជាមន្ត្រីប៉ូលីសទេសចរណ៍ប្រចាំនៅរមណីយដ្ឋានអន្លង់ផ្សោតកាំពី។

ក្រោយពីបានព័ត៌មាននេះភ្លាមលោក គឹម គី និងក្រុមអ្នកបើកទូកជូនភ្ញៀវទេសចរក៏បានចុះ ទៅត្រួតពិនិត្យសាកសពសត្វផ្សោតនោះភ្លាមៗ និងបានកាត់សាច់មងដែលរុំជាប់ខ្លួនផ្សោត រួចបាននាំយកសាកសពផ្សោតមកប្រ គល់ជូនក្រុមការងារឆ្មាំទន្លេ ប្រចាំប៉ុស្តិ៍កាំពី។

បន្ទាប់មកក្រុមការងារឆ្មាំទន្លេក៏បានរាយការណ៍ជូនមកលោក ម៉ុក ពន្លក នាយខណ្ឌរដ្ឋបាលជលផលខេត្តក្រចេះ និងជាប្រធានឆ្មាំទន្លេប្រចាំខេត្តក្រចេះ ហើយបាននាំយកសាកសពសត្វផ្សោតនោះមកកាន់ទីរួមខេត្តក្រចេះ ពេលនោះលោកក៏បានចាត់មន្រ្តីជំនាញ ជានាយរងខណ្ឌរដ្ឋបាលជលផលខេត្តក្រចេះ និងជាមន្រ្តីសហការជាមួយអង្គការ WWF ប្រចាំខេត្តក្រចេះ រួមជាមួយមន្រ្តីផ្នែកស្រាវជ្រាវនៃអង្គការ WWF ប្រចាំខេត្តក្រចេះ ចុះទៅពិនិត្យ និងទទួលយកសាកសពសត្វផ្សោតនោះនៅចំណុចផែលើខេត្តក្រចេះ នាល្ងាចថ្ងៃទី១៤ ខែមករា ឆ្នាំ២០២១។

តាមការត្រួតពិនិត្យជាក់ស្តែងរបស់ក្រុមការងារឃើញថា សាកសពសត្វផ្សោតមានសភាពហើម រលាត់ស្បែកមួយចំនួន និងមានមងក្រឡាទំហំ១៥សង់ទីម៉ែត្ររុំជាប់នៅគល់កន្ទុយ និងលើដងខ្លួនទាំងមូលរបស់សាកសពសត្វផ្សោត។

ក្រោយពីបានធ្វើការពិនិត្យសាកសពសត្វផ្សោតរួចរាល់ក្រុមការងារក៏បានសន្និដ្ឋានថាសត្វផ្សោតនេះបានស្លាប់ដោយសារ ការជាប់ទៅនឹងមងនេសាទ វាជាផ្សោតពេញវ័យដែលរស់នៅអន្លង់ផ្សោតកាំពី ក្នុងភូមិកាំពី ឃុំសំបុក ស្រុកចិត្របុរី ខេត្តក្រចេះ។

បន្ទាប់ពីបានធ្វើការត្រួតពិនិត្យសាកសពផ្សោតរួចរាល់ហើយក្រុមការងារក៏បានធ្វើការ ថ្លឹងទម្ងន់ ថតរូប វាស់វែង ដែលមានទិន្ន័យសង្ខេបដូចខាងក្រោម៖ ផ្សោតដែលបានងាប់នេះ ជាផ្សោតឈ្មោល មានប្រវែង ១៩៨សង់ទីម៉ែត្រ ទម្ងន់៨៥គីឡូក្រាមអាយុកាលប៉ាន់ ប្រមាណពី១២ ទៅ១៥ឆ្នាំ ស្ថានភាពហើមស្អុយរយៈពេលស្លាប់ ប្រហែល៣ថ្ងៃ។

សូមរំលឹកថា សាកសពសត្វផ្សោតនេះជាផ្សោតទីពីរហើយដែលបានស្លាប់នៅក្នុងឆ្នាំ២០២១នេះ ចាប់ពីថ្ងៃទី១ ដល់ថ្ងៃទី១៤ ខែមករា ដែលក្នុងនោះរួមមានកូនផ្សោតចំនួន១ក្បាលបានស្លាប់ និងផ្សោតពេញវ័យចំនួន១ក្បាលបានស្លាប់៕

LEAVE A REPLY

Please enter your comment!
Please enter your name here