អ្នកធាក់ស៊ីក្លូក្នុងរាជធានីភ្នំពេញ ជាង៣០០នាក់ ទទួលអំណោយពីមូលនិធិត្រីចក្រក្រយានកម្ពុជា

0
4

ភ្នំពេញ៖ បងប្អូន អ្នកប្រកបរបរធាក់ស៊ីក្លូ ក្នុងរាជធានីភ្នំពេញចំនួន ៣០៦នាក់ បានទទួលអំណោយ ពីមូលនិធិ ត្រីចក្រយានកម្ពុជា ព្រមទាំងមានអំណោយពេលបុណ្យទានផ្សេងៗ រួមទាំងការផ្តល់ជាឯកសណ្ឋានអ្នកធាក់ស៊ីក្លូ និង ប័ណ្ណប.ស.ស. ដើម្បីឱ្យបងប្អូន ទៅព្យាបាលជំងឺដោយមិនអស់ប្រាក់។

យោងតាមក្រសួងព័ត៌មានបានឲ្យដឹងថាបងប្អូន និងលោកតា ជាអ្នកប្រកបរបរធាក់ស៊ីក្លូក្នុងរាជធានីភ្នំពេញ ចំនួន៣០៦នាក់ បានទទួលអំណោយពីមូលនិធិត្រីចក្រយានកម្ពុជា( ស៊ីក្លូ ) នៅសាលារាជធានីភ្នំពេញ កាលពីចុងសប្ដាហ៍ កន្លងមកនេះក្រោមអធិបតីភាពលោក ឃួង ស្រេង អភិបាលរាជធានីភ្នំពេញ និងជាប្រធានក្រុមប្រឹក្សាមូលនិធិត្រីចក្រយានកម្ពុជា ព្រមទាំងភរិយា។

លោក ឃួង ស្រេង បានថ្លែងឲ្យដឹងថាសម្តេច តេជោ បានផ្តួចផ្តើម ឱ្យមានមូលនិធិនេះឡើងសំដៅអភិរក្សស៊ីក្លូ ដែលមានដើមកំណើតតាំងពីសម័យអាណានិគមនិយមបារាំង។ កន្លងមកបងប្អូន អ្នកប្រកបរបរធាក់ស៊ីក្លូ ក្នុងរាជធានីភ្នំពេញចំនួន ៣០៦នាក់ បានទទួលអំណោយពីមូលនិធិត្រីចក្រយានកម្ពុជា ព្រមទាំងមានអំណោយ ពេល បុណ្យទានផ្សេងៗ រួមទាំងការផ្តល់ជា ឯកសណ្ឋានអ្នកធាក់ស៊ីក្លូ និងប័ណ្ណ ប.ស.ស. ដើម្បីឱ្យបងប្អូនទៅព្យាបាល ជំងឺដោយមិនអស់ប្រាក់។

លោកអភិបាលរាជធានីភ្នំពេញ បានបន្តថា នេះជាការយកចិត្តទុកដាក់ ដ៏ខ្ពង់ខ្ពស់ របស់សម្តេអគ្គមហាសេនាបតី តេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា។ គោលបំណង សំខាន់ក្នុងការ បង្កើតឱ្យមាន មូលនិធិត្រីចក្រយានកម្ពុជានេះឡើង​ គឺដើម្បីរួមចំណែកជួយសម្រួលការលំបាករបស់បងប្អូនដោយគិតគូរពីសុខភាព ជីវភាពរស់នៅ របស់បងប្អូនអ្នកប្រកបរបរធាក់ស៊ីក្លូ និងដើម្បីរួមចំណែកលើកស្ទួយ អភិរក្ស និងអភិវឌ្ឍន៍ស៊ីក្លូ ដែលមានជាយូរមកហើយ ឱ្យបានគង់វង្ស កុំឱ្យបាត់បង់។

លោក ឃួង ស្រេង ក៏បានអំពាវនាវដល់បងប្អូនដែលប្រកបរបរធាក់ស៊ីក្លូ ដែលភាគច្រើនមានវ័យចំណាស់ ឱ្យ ថែរក្សាសុខភាពប្រកាន់ខ្ជាប់នូវគោលការណ៍ ហូបស្អាត ផឹកស្អាត និងរស់នៅស្អាត ជាពិសេសការពារខ្លួនពីការរីក រាលដាល នៃជំងឺកូវីដ-១៩ ត្រូវលាងដៃឱ្យបានញឹកញាប់ ជាមួយសាប៊ូ អាល់កុល ឬជែល ហើយពាក់ម៉ាសជាប្រចាំ នៅពេល មានមនុស្សច្រើន អនុវត្តន៍តាម ការណែនាំរបស់ក្រសួងសុខាភិបាល និងរាជរដ្ឋាភិបាល។

លោក ម៉េត មាស ភក្តី អ្នកនាំពាក្យរដ្ឋបាលរាជធានីភ្នំពេញ និងជាប្រធានលេខាធិការដ្ឋាន មូលនិធិត្រីចក្រយាន កម្ពុជា បានបញ្ជាក់ផងដែរថាអំណោយ ដែលបងប្អូនអ្នកប្រកបរបរធាក់ស៊ីក្លូទាំង ៣០៦នាក់ ក្នុងម្នាក់ៗទទួល បាន មី ម៉ាស ម៉ាស១ប្រអប់និងភួយផងដែរ។

លោក បានឱ្យដឹងបន្ថែមថាមូលនិធិនេះត្រូវបានបង្កើតឡើង តាំងពីថ្ងៃទី ១៨ ខែមករា ឆ្នាំ២០១៨ គឺមានរយៈពេលជាង ៣ឆ្នាំ មកហើយក្រោម ការផ្តួចផ្តើមដ៏ខ្ពង់ខ្ពស់ របស់សម្តេចអគ្គមហាសេនាបតី តេជោ ហ៊ុន សែន ហើយសម្តេច ក៏ជាប្រធានកិត្តិយស , ឯកឧត្ដម ឃួង ស្រេង អភិបាលរាជធានីភ្នំពេញ ជាប្រធានក្រុមប្រឹក្សា មូលនិធិនេះ។

លោកបានបន្តទៀតថា មូលនិធិត្រីចក្រយានកម្ពុជា តែងបានផ្តល់ជូនថវិកាទ្រទ្រង់ ( របប ឧបត្ថម្ភ ) ដល់បងប្អូនអ្នកប្រកបរបរធាក់ស៊ីក្លូទាំង ៣០៦នាក់ ក្នុងម្នាក់ៗ ៧ម៉ឺនរៀល ក្នុងរយៈពេល ១០ថ្ងៃ ស្មើនឹង ២១ម៉ឺនរៀល ក្នុងមួយខែ។

គួបញ្ជាក់ដែរថា ក្នុងនោះបងប្អូន លោកតា ដែលប្រកបរបរធាក់ស៊ីក្លូដែលភាគច្រើន មានវ័យចំណាស់ ខ្លះអាយុ ៨៣ឆ្នាំ ខ្លះអាយុ ៨៧ឆ្នាំ និងលោកតា អាយុ ៩០ឆ្នាំ នៅមានសុខភាពល្អ អត់កូន និងប្រពន្ធ ដូចនេះមានតែ ធាក់ស៊ីក្លូចិញ្ចឹមជីវិត៕

LEAVE A REPLY

Please enter your comment!
Please enter your name here