កម្ពុជាត្រៀមលក្ខណៈសម្បត្តិហើយជាស្រេច ដើម្បី​ចូល​រួម​ព្រឹត្តិ​ការណ៍ 19th Asian Games Hangzhou 2022

0
2

ភ្នំពេញ៖ លោក វ៉ាត់ ចម្រើន អគ្គលេខាធិការគណ:​កម្មា​ធិ​ការ​ជាតិ​​អូ​ឡាំ​ពិក​កម្ពុជា ​(NOCC) បាន​មាន​ប្រ​សាសន៍​ថា កម្ពុជា​បាន​ត្រៀម​លក្ខណ:​សម្បត្តិ​រួច​រាល់​ហើយ ដើម្បី​ចូល​រួម​ព្រឹត្ដិ​ការណ៍​កី​ឡា​អា​ស៊ី លើកទី​១៩ ឆ្នាំ​២០២២ (19th Asian Games Hangzhou 2022) នៅ​ទី​ក្រុង Hangzhou នៃ​សា​ធា​រ​ណ:​រដ្ឋ​ប្រ​ជា​មា​និត​ចិន។

អគ្គលេខាធិការគណ:កម្មាធិការជាតិ CAMSOC ដដែល​បាន​គូស​បញ្ជាក់​ថា «គណ:​កម្មា​ធិ​ការ​ជាតិ​អូ​ឡាំ​ពិក​កម្ពុជា បាន​ទទួល​លិ​ខិត​អញ្ជើញ ដើម្បី​ចូល​រួម​ព្រឹត្តិ​ការណ៍ 19th Asian Games Hangzhou 2022 ហើយ​កម្ពុជា​បាន​ត្រៀម​ខ្លួន​ហើយ​ជា​ស្រេច ដើម្បី​ចូល​រួម​ការ​ប្រ​កួត​កី​ឡា​អាស៊ី នៅ​ទី​ក្រុង Hangzhou ។ ជួប​គ្នា​នៅ​ទី​ក្រុង Hangzhou ការ​ប្រ​កួត​កី​ឡា​អាស៊ី ឆ្នាំ២០២២»។

ចំពោះព្រឹត្តិការណ៍ 19th Asian Games Hangzhou 2022 គ្រោង​ប្រ​ព្រឹត្ត​ទៅ​រយ:​ពេល១៦ថ្ងៃ ចាប់ពីថ្ងៃទី១០ ដល់ថ្ងៃទី២៥ ខែកញ្ញា ឆ្នាំ២០២២ ដោយ​ម្ចាស់​ផ្ទះចិន បានកំណត់កីឡាចំនួន ៤០ប្រភេទ ដាក់​ក្នុង​ការ​ប្រ​កួត​ព្រឹត្តិ​ការណ៍​ប្រចាំទ្វីប៤ឆ្នាំម្ដងនេះ។

សូមរំឮកថា ក្នុងការប្រកួតកីឡាអាស៊ី ២លើកចុងក្រោយ កម្ពុជា​បាន​បើក​ទំព័រ​ប្រវត្តិសាស្ដ្រធំៗ ២ផ្សេងគ្នា ទី១-ការប្រកួតកីឡាអាស៊ី លើក​ទី១៧ ឆ្នាំ២០១៤ នៅសាធារណរដ្ឋកូរ៉េ កម្ពុជាដណ្ដើម មេដាយមាស ១គ្រឿង​លើក​ដំបូង ដោយវីរកីឡាការិនីតេក្វាន់ដូ ស៊ន សៀវម៉ី ទី២-​ការ​ប្រ​កួត​កីឡា​អាស៊ី លើកទី១៨ ឆ្នាំ២០១៨ នៅឥណ្ឌូនេស៊ី កម្ពុជា​បាន​បំបែក​កំណត់​ត្រាថ្មីដណ្ដើម បានមេដាយ មាស២គ្រឿងនិងសំរឹទ្ធ១គ្រឿង ដោយ​វីរ​កីឡាការិនីជឺជិតស៊ូ ខាន់ ចេសា ឈ្នះមេដាយមាស១ និង​វីរ​កី​ឡា​ករម៉ូតូទឹក សាលី អ៊ូមើត ឈ្នះមេដាយមាស១និងសំរឹទ្ធ១៕

LEAVE A REPLY

Please enter your comment!
Please enter your name here