ភ្នំពេញ៖ ក្នុងនាមជាកីឡាករវ័យក្មេងដ៏លេចធ្លោ សៀង ចន្ធា បានបង្ហាញខ្លួនជាច្រើនលើកច្រើនសារជាមួយក្រុមជម្រើសជាតិ ទាំងឈុតតូច និងធំ នឹងក្តោបបានទីផ្សារជាមួយក្លិប បឹងកេត ដោយចុះហត្ថលេខាយកមកលេងជាផ្លូវការសម្រាប់ការប្រកួតលីកដែលចាប់ផ្តើមនាពាក់កណ្តាលខែកុម្ភៈ ។
ការឈានជើងចូលមកកាន់ទឹកដីបឹងកេត អ្វីដែលទស្សនិកជនចង់ដឹងបំផុត និងចោទ ជាសំនួតថា តើសំណព្វចិត្តរបស់គេ មានតម្លៃខ្លួនប៉ុន្មាន ក្នុងការចុះហត្ថលេខាលេងជាមួយក្លិបអ្នកមាននៅស្រុកខ្មែរ ?
ច្បាស់ណាស់រឿងតម្លៃខ្លួននេះ ក្នុងលីកកម្ពុជាត្រូវបានក្លិបបិតសូន្យឈឹងមិនឲ្យដឹង តែទោះជាយ៉ាងណាក្រដាស់មិនអាចខ្ចប់ភ្លើងជិតបានឡើយ ដោយថ្មីៗនេះត្រូវបានប្រភពមួយបង្ហើបដោយសូមមិនបញ្ចេញឈ្មោះ ឲ្យដឹងថា តម្លៃខ្លួនរបស់សៀង ចន្ធា បានកើនឡើងជាងលេងនៅក្លិប សាលាជាតិបាទី ដោយតម្លៃខ្លួនរបស់គេអាចទិញផ្ទះល្វែង និងរថយន្តទំនើបមួយគ្រឿង បានយ៉ាងងាយស្រួល ។
ប្រភពខាងលើដោយបញ្ចាក់ថា សម្រាប់តម្លៃខ្លួនរបស់ សៀង ចន្ធា ស្ថិតនៅចន្លោះពី ១០០០ ទៅ ១៥០០ ដុល្លារក្នុងមួយខែ ដែលជាតម្លៃមួយច្រើនគួរ សមជាងកីឡាករមួយចំនួន ដែលស្ថិតនៅលីកផ្សេងៗ ។ តែទោះជាយ៉ាងណាតម្លៃនេះ អាចជាតម្លៃដែលថោកជាងតម្លៃខ្លួន កីឡាករបរទេស ដែលក្លិបមួយៗទិញយកមកលេងនៅលីកកំពូលកម្ពុជា៕
