ភ្នំពេញ៖ស្រពពេលដែលតម្លៃស្រូវធ្លាក់ ចុះយ៉ាងគំហុក ដោយសារជំនន់ទឹកភ្លៀងរយៈពេលប៉ុន្មានថ្ងៃមកនេះ លោក សុង សារ៉ន ប្រធានសហព័ន្ធស្រូវអង្ករកម្ពុជា នៅថ្ងៃទី១៣ ខែតុលា ឆ្នាំ២០២០នេះ បានចេញមុខអំពាវនាវ ឱ្យសមាជិកខាងរោងម៉ាស៊ីនកិន ស្រូវទាំងអស់ ចូលរួមជួយប្រជាកសិករ តាមរយៈការទទួលទិញស្រូវសើម ដោយក្នុងតម្លៃសមរម្យ ។
តាមរយៈបណ្ដាញសង្គមហ្វេសប៊ុក របស់ប្រជាកសិកររស់នៅ ខេត្តបាត់ដំបងបានឱ្យដឹងថា ជាធម្មតា ស្រូវក្រអូបអាចលក់បាន១តោនក្នុងតម្លៃជាង១លានរៀល ប៉ុន្តែដោយសារបាតុភូតធម្មជាតិ បណ្ដាលឱ្យមានជំនន់ទឹកភ្លៀង ធ្វើអោយតម្លៃស្រូវរបស់ពួកគាត់ធ្លាក់ចុះយ៉ាងគំហុក ហើយក៏ពិបាកនៅក្នុងការរកឈ្មួញទិញផងដែរ។
ជាមួយគ្នានេះ ក្រុមប្រជាកសិករក្នុងខេត្តបាត់ដំបង ក៏បានអំពាវនាវអោយ រាជរដ្ឋាភិបាល ក៏ដូចជាភាគីពាក់ព័ន្ធទាំងអស់ ជួយប្រមូលទិញស្រូវរបស់ពួកគាត់ផង បើមិនដូច្នេះទេពួកគាត់នឹងប្រឈម ការបង់ខាតយ៉ាងធ្ងន់ធ្ងរ ដោយគ្មានលុយបង់ថ្លៃការប្រាក់អោយគ្រឹះស្ថានមីក្រូហិរញ្ញវត្ថុនានា ក៏ដូចជាថ្លៃ ជី និងថ្នាំសង្កូវផ្សេងៗផងដែរ។
ប្រធានសហព័ន្ធស្រូវអង្ករកម្ពុជារូបនេះ បានសរសេរនៅបណ្ដាញហ្វេសប៊ុកថា «ដោយស្ស្ថិតនៅក្នុងស្ថានភាពទឹកជំនន់បែបនេះ សូមសមាជិកខាងរោងម៉ាស៊ីនកិនស្រូវទាំងអស់ ចូលរួមជួយប្រជាកសិករតាមរយះទទួលទិញស្រូវសើម ដោយក្នុងតម្លៃសមរម្យ ព្រោះយើងដឹងថា បើច្រូតសើមពេក មិនមានថ្ងៃ សំរាប់បងប្អូនហាលស្រូវទេ ។ »
ជាមួយគ្នានេះលោកក៏សូមអគុណ និង សសើរដល់រោងម៉ាសុីន កិនស្រូវដែលបាន និងបន្តទិញស្រូវពីពូមីងបងប្អូនកសិករ ។
ក្នុង នោះបេីយោងតាមសេចក្ដីអំពាវនាវរបស់ សហព័ន្ធ ស្រូវ អង្ករ កម្ពុជា បានបញ្ជាក់ ឲ្យដឹងថា
ដោយស្ថានភាពនៃគ្រោះទឹកជំនន់នាពេលបច្ចុប្បន្នមានការកើនឡើងយ៉ាងគំហុកនៅតាមបណ្តាខេត្តមួយចំនួននៃតំបន់ទំនាបកណ្តាលនៃប្រទេសកម្ពុជា ដែលជាហេតុបង្ករឱ្យមានផលប៉ះពាល់ខ្លាំងទៅដល់ស្រូវដែលកំពុងនឹងត្រូវប្រមូលផលនាពេលខាងមុខ ហើយស្របពេលមានការផ្អាកចរាចរណ៍នៃរថយន្តធំៗសម្រាប់ដឹកទំនិញ រួមទាំងស្រូវផងដែរ។ អាស្រ័យដូចនេះ សហព័ន្ធស្រូវអង្ករកម្ពុជា សូមអំពាវនាវដល់សាមាជិក សមាជិកាដែលមានរោងមាស៊ីនកិនស្រូវដែលនៅជិតទីតាំងស្រែ សូមជួយធ្វើការទិញស្រូវសើមពីប្រជាកសិករក្នុងតម្លៃសមរម្យឱ្យអស់លទ្ធភាពតាមដែលអាចធ្វើទៅបាន។
សម្រាប់ប្រជាកសិករដែលកំពុងជួបបញ្ហាប្រឈមទាំងនេះសូមទំនាក់ទំនងមកកាន់លេខាធិការដ្ឋានសហព័ន្ធស្រូវអង្ករកម្ពុជា តាមរយៈលេខទូរស័ព្ទ ០១៧ ៧២៨ ៧២៨/០១២ ២២១ ២៥៤/ ០១០ ២២១ ២៥៤៕
