ភ្នំពេញ៖ សត្វផ្សោតទឹកសាប ជាប្រភេទសត្វរងគ្រោះថ្នាក់ជិតផុតពូជ ខណះក្នុងទន្លេមេគង្គប្រទេសកម្ពុជាមានវត្ដមានសត្វផ្សោតរស់នៅចំនួនប្រមាណ ៨៩ក្បាលតែប៉ុណ្ណោះ ។
យោងតាមការឱ្យដឹងរបស់ក្រសួងបរិស្ថាន សត្វផ្សោតទឹកសាបជាប្រភេទសត្វទទួលរងគ្រោះថ្នាក់ជិតផុតពូជបំផុត និងមានចំនួនតែប្រមាណ ៨៩ ក្បាលប៉ុណ្ណោះរស់នៅ ក្នុងទន្លេមេគង្គ នៃប្រទេសកម្ពុជា។
ក្រសួងបរិស្ថានបានសង្កត់ធ្ងន់ថា វត្តមានសត្វផ្សោតបញ្ជាក់ពីគុណភាពល្អនៃប្រព័ន្ធអេកូឡូស៊ី និងជីវៈចម្រុះសម្បូរបែបនៅតាមដងទន្លេមេគង្គដែលទ្រទ្រង់យ៉ាងសំខាន់ដល់ជីវិតមនុស្ស សត្វ រុក្ខជាតិ ព្រមទាំងផ្តល់ឱកាសសម្រាប់របរចិញ្ចឹមជីវិតដើម្បីគាំទ្រជីវភាពរបស់ប្រជាពលរដ្ឋ និងការអភិវឌ្ឍសេដ្ឋកិច្ច។
ក្រសួងបរិស្ថានបានអំពាវនាវ ក្នុងទិវាមួយម៉ោងសម្រាប់ភពផែនដីឆ្នាំនេះ សូមចូលរួមផ្តល់សំលេងដល់ធម្មជាតិ ហើយចែករំលែកព័ត៌មានបន្តអំពីការអភិរក្សសត្វផ្សោត និងធនធានជលផលទន្លេមេគង្គ៕
