អាជ្ញាធរជាតិអប្សរាផ្ដល់កូនឈើ១៥ប្រភេទ ជាង៨ពាន់ដើមដល់សាធារណជន ដើម្បីដាំស្ដារព្រៃឈើឡើងវិញ

0
5

ភ្នំពេញ៖ អាជ្ញាធរជាតិអប្សរាបានចែកកូនឈើជាង ៨ពាន់ដើមដល់សាធារណជន ដែលបានស្នើសុំជាបន្តបន្ទាប់ដើម្បីយកទៅដាំលើដីលំនៅឋាន ដីចម្ការ សាលារៀន វត្ដអារាម និងដីតំបន់ជុំវិញទៅតាមតម្រូវការជាក់ស្ដែង ដោយក្នុងនោះដើមឈើដែលបានផ្ដល់ជូនគឺមានចំនួន ១៥ប្រភេទសំខាន់ៗ រួមទាំងកូនឈើហូបផ្លែផងដែរ ។ ហើយទាំងនេះ គឺជាកត្តាមួយជំរុញដល់ការដាំស្ដារឡើងវិញនូវព្រៃឈើដែលបានបាត់បង់ដោយគ្រោះធម្មជាតិ និងការកាប់បំផ្លាញពីជនខិលខូចមួយចំនួនកាលពីគ្រាកន្លងមក។

តាមការឱ្យដឹងរបស់អាជ្ញាធរជាតិអប្សរា មានព្រះសង្ឃ ព្រមទាំងសាធារណជនបានដាក់ពាក្យស្នើសុំកូនឈើជាបន្តបន្ទាប់ មកកាន់អាជ្ញាធរជាតិអប្សរា ដើម្បីយកទៅដាំនៅលើដីលំនៅឋាន ដីចម្ការ សាលារៀន វត្តអារាម និងដីតំបន់ជុំវិញ ទៅតាមតម្រូវការជាក់ស្ដែង។
យោងតាមរបាយការណ៍នៅចុង ខែឧសភាកន្លងទៅនេះកូនឈើសរុប៨៧០០ដើម បានចែកជូនទៅសាធារណជនយកទៅដាំទាំងនោះរួមមាន៖

– ផ្តល់កូនឈើជូនតំណាងលោក នេត្រ ភក្រ្តា រដ្ឋលេខាធិការក្រសួងបរិស្ថាន ចំនួន៦០០ដើម ដើម្បីយកទៅដាំតាមបណ្តោយផ្លូវសំខាន់ៗក្នុងក្រុងសួង ខេត្តត្បូងឃ្មុំ។ កូនឈើទាំងនោះរួមមាន គ្រញូង៤០០ដើម និងធ្នង់២០០ដើម។

– ផ្តល់កូនថ្កូវជូនលោក ស៊ុន គង់ ប្រធានមន្ទីរបរិស្ថានខេត្តសៀមរាប ចំនួន២០០ដើម ដើម្បីយកទៅដាំក្នុងបរិវេណមជ្ឈមណ្ឌលស្រាវជ្រាវ និងអភិរក្សកេសរកូល សុខ អាន ភ្នំគូលែន។

– ផ្តល់កូនឈើជូនតំណាងក្រុមហ៊ុន គូឡារ៉ា វ៉ធើរ(KULARA Water Co.,Ltd.) ចំនួន១,១៥០ដើម ដើម្បីយកទៅដាំស្តារព្រៃឈើរិចរិលឡើងវិញតាមជើងភ្នំគូលែនខាងក្រោមព្រះអង្គជប់ ស្ថិតក្នុងភូមិត្បែងកើត ឃុំត្បែង ស្រុកបន្ទាយស្រី ខេត្តសៀមរាប ។ កូនឈើទាំងនោះរួមមាន គ្រញូង២០០ដើម ធ្នង់២០០ដើម បេង១០០ដើម ច្រេស២០០ដើម ឈើទាល១០០ដើម ផ្តៀក១០០ដើម គគីរ១៥០ដើម ត្រយឹង៥០ដើម និងកកោះ៥០ដើម។

– ផ្តល់កូនឈើជូនតំណាងឧត្តមសេនីយ៍ឯក ពៅ ហេង មេបញ្ជាការយោធភូមិភាគទី៤ ចំនួន៥,០០០ដើម ដើម្បីយកទៅដាំក្នុងបរិវេណទីបញ្ជាការដ្ឋានយោធភូមិភាគទី៤ ស្ថិតក្នុងភូមិស្ពានក្អែក ឃុំកណ្តែក ស្រុកប្រាសាទបាគង ខេត្តសៀមរាប ។ កូនឈើទាំងនោះរួមមាន គ្រញូង១,០០០ដើម ធ្នង់៣០០ដើម បេង២០០ដើម ច្រេស៥០០ដើម ឈើទាល១,០០០ដើម គគីរ១,០០០ដើម រំដួល៥០០ដើម និងលឿងរាជ៥០០ដើម។

– ផ្តល់កូនឈើជូនលោក គឹម រស្មី ចំនួន១២០ដើម ដើម្បីយកទៅដាំលើដីផ្ទាល់ខ្លួន។ កូនឈើទាំងនោះរួមមាន គ្រញូង៣០ដើម ធ្នង់៣០ដើម កកោះ៣០ដើម និងគគីរ៣០ដើម។

– ប្រគេនកូនឈើជូនព្រះអង្គ តាត មហាទី ព្រះគ្រូចៅអធិការវត្តព្រះឥន្ទកោសា ចំនួន១,១៣០ដើម ដើម្បីយកទៅដាំ និងចែកចាយនៅតាមសាលារៀន និងវត្តអារាមក្នុងខេត្តសៀមរាប។ កូនឈើទាំងនោះរួមមាន គ្រញូង២០០ដើម បេង២០០ដើម សិរមាន់២២០ដើម គុយ២០ដើម ផ្ញៀវ២២០ដើម និងរំដួល២៧០ដើម៕

LEAVE A REPLY

Please enter your comment!
Please enter your name here