កើតនិងរស់នៅលើដីខ្លួនឯងជាង៥០ឆ្នាំ បែរជាមានគេធ្វើប្លង់យកដីបាន និងគំរាមចាប់ដាក់គុកទៀត

0
2

ភ្នំពេញ៖ មានតែទឹកភ្នែកទេដែលអាចរៀបរាប់នូវភាពឈឺចាប់នេះបានសម្រាប់ស្រ្តីមេម៉ាយម្នាក់ឈ្មោះ មួង ធា អាយុ ៥១ឆ្នាំ ដែលបានយកលិខិតគោរពសុំអន្តរាគមន៍ សម្តេចតេជោ ហ៊ុន សែន នាយករដ្ឋមន្ត្រី មេត្តាជួយផ្តល់យុត្តិធម៌លើករណីវិវាទដីធ្លីរបស់គាត់ដែលមានភាគីម្ខាងទៀតបាននិងកំពុងឈូសឆាយយកដីគាត់។

លោក ដួង តារារដ្ឋលេខាធិការទីស្ដីការគណ:រដ្ឋមន្ត្រីនិងជា ជំនួយការផ្ទាល់សម្ដេចតេជោ ហ៊ុន សែនបានឲ្យដឹងតាមរយ:គេហទំព័រហ្វេសប៊ុកថា បងស្រី មួង ធា បានប្រាប់លោកថា គាត់មិនដែលស្គាល់ភ្នំពេញទេ គឺគាត់រស់នៅតែក្នុងព្រៃជនបទ។ក្រោយពីប្តីបានប្រើអំពើហឹង្សាវាយដំធ្វើបាបគាត់ហើយបានចាកចេញទៅមានប្រពន្ធថ្មីបងស្រីនៅជាមួយកូនស្រី២នាក់ខិតខំធ្វើស្រែចម្ការសន្សំលុយបញ្ជូនកូនឲ្យទៅរៀនក្រែងលោមានអនាគតល្អ។

ពេលនេះកូនស្រីគាត់ម្នាក់កំពុងធ្វើការនៅភោជនីយដ្ឋាមួយក្នុងខេត្តកំពង់ស្ពឺបានប្រាក់ខែ $50 ។
បងស្រីបានរៀបរាប់ថា គាត់ស្ទើរតែគាំងបេះដូងស្លាប់នៅពេលដែលឮថាដីដែលគាត់បានកើតនិងរស់នៅធំដឹងក្តីនៅទីនោះ បែរជាមានអ្នកផ្សេងមកធ្វើប័ណ្ណយកជាកម្មសិទ្ធគេទៅវិញ។ ដីនោះគឺស្ថិតនៅ ភូមិព្រៃជ្រៅ ឃុំក្បាលទឹក ស្រុកទឹកផុស ខេត្តកំពង់ឆ្នាំង ដែលមានទំហំ ៧ហិកតា ហើយមានលិខិតបញ្ជាក់ការកាន់កាប់ដីធ្លីទទួលស្គាល់ដោយ មេឃុំ ស៊ឹម រ៉ុន កាលពីថ្ងៃទី១៣ ខែ ៦ ឆ្នាំ ២០១៤។ ក្នុងនោះក៏មានប្រជាពលរដ្ឋចំនួន ២៧គ្រួសារបានផ្តិតមេដៃទទួលស្គាល់ថាបងស្រី មួង ធា ជាម្ចាស់ដីខាងលើពិតប្រាកដមែន។ ប៉ុន្តែក្រោយមក លោកមេឃុំក៏បានបដិសេធត្រា និងហត្ថលេខាគាត់វិញ (?) មិនទទួលស្គាល់ដីបងស្រី។

បងស្រី មួង ធា បានបញ្ជាក់ថា ពេលនេះភាគីម្ខាងទៀតសម្លុតគំរាមគាត់ឲ្យដកសំណាបចោលនិងរុះរើផ្ទះចេញជាបន្ទាន់ ដោយគំរាមថានឹងចាប់ដាក់គុក៦ខែ ហើយបង់ពិន័យជាប្រាក់២លានរៀលទៀតផង។ ករណីនេះគាត់ត្រូវបានភាគីម្ខាងនោះប្តឹងឡើងតុលាការ…បែបចាញ់គេហើយបានជាគេគំរាមឲ្យគាត់ចេញជាបន្ទាន់។ ប៉ុន្តែភាគីម្ចាស់ដីដែលមានព្រុំដីជាប់បងស្រី មួង ធា គឺដាច់ខាតមិនផ្តិតមេដៃសម្គាល់ព្រុំឲ្យទៅអ្នកដែលមកយកដីគាត់ឡើយ។

លោក ដួង តារា មិនទាន់ដឹងទេថា តើភាគីម្ខាងទៀតមានឯកសារអ្វីខ្លះទើបអាចយកទៅធ្វើប័ណ្ណរឹង… តាមការប្រាប់ពីបងស្រី មួង ធា។បងស្រី មួង ធា បានខ្ចីលុយគេធ្វើដំណើរពីរនាក់ម្តាយកូនមកជួបលោកនៅភ្នំពេញថ្ងៃនេះជាមួយទឹកភ្នែកនិងក្តីអស់សង្ឃឹមយ៉ាងខ្លាំង។ កាលពីថ្ងៃម៉ិញ ក្រោយពីបានស្តាប់សារបានរឿងដ៏សោកសៅនិងពិនិត្យឯកសារគាត់រួចហើយលោក ដួង តារាក៏បានបញ្ជូនសំណុំរឿងនេះទៅលោកប្រធានតុលាការខេត្តកំពង់ឆ្នាំងជួយពិនិត្យបន្ថែមដើម្បីផ្តល់យុត្តិធម៌ជូនគាត់។ លោក ដួងតារាក៏បានជូនថវិកាមួយចំនួនជួយចេញថ្លៃធ្វើដំណើររបស់គាត់និងកូនវិលទៅផ្ទះវិញនិងយកទៅសងគេផង។
លោក ដួង តារា នឹងស្វែងរកការពិតអំពីករណីនេះជូនបងស្រី មួង ធា៕

LEAVE A REPLY

Please enter your comment!
Please enter your name here