ភ្នំពេញ៖ ប៉ុន្មានថ្ងៃនេះប្រជាពលរដ្ឋកម្ពុជាទូទៅ សិស្ស និស្សិត បញ្ញវ័ន្ត អ្នកវិភាគ អ្នកនយោបាយ បានបញ្ចេញមតិជាបន្តបន្ទាប់ជុំវិញករណីថៃសង់ប្រាសាទនៅក្នុងវត្តមួយ នៃខេត្តបុរីរម្យ របស់ថៃ ដែលមានការសង្ស័យ ថាបានចម្លង តាមរចនាបថ ប្រាសាទ អង្គរវត្ត របស់កម្ពុជា។
ជុំវិញករណីនេះប្រជាពលរដ្ឋខ្មែរបានលើកយកទៅជជែកគ្នាយ៉ាងផុសផុលក្នុងបណ្ដាញសង្គមដោយបានអះអាងស្រដៀងៗគ្នាថាប្រាសាទអង្គរវត្តជារបស់ខ្មែរហើយមានតែមួយប៉ុណ្ណោះនៅលើពិភពលោក។ជាពិសេសប្រាសាទអង្គរវត្ត ត្រូវបានដាក់បញ្ចូលក្នុងបញ្ជីបេតិកភណ្ឌពិភពលោកកាលពីថ្ងៃទី ១៤ ខែ ធ្នូ ឆ្នាំ ១៩៩២ នោទីក្រុងសាន់តាហ្វេ សហរដ្ឋអាមេរិក។
ទាក់ទិនករណីនេះ លោក ឡុង ប៉ុណ្ណាស៊ីរីវត្ថ រដ្ឋលេខាធិការ និងជាអ្នកនាំពាក្យ ក្រសួងវប្បធម៌ និងវិចិត្រសិល្បៈ បានបញ្ជាក់ថា ជំហាន បឋម ក្រសួងវប្បធម៌ បានចាត់ចែង ឲ្យអាជ្ញាធរជាតិ អប្សរា និងស្ថានទូត កម្ពុជា ប្រចាំប្រទេសថៃ និងស្ថានកុងស៊ុលខ្មែរ ប្រចាំខេត្ត ស្រះកែវ របស់ថៃ ស្រាវជ្រាវ និងប្រមូលព័ត៌មាន ជាបន្ទាន់ ជាពិសេស ទៅលើលក្ខណៈ បច្ចេកទេស និងប្លង់គោលជាដើម។
សូមបញ្ជាក់ថា ច្បាប់អន្តរជាតិមាត្រា៦ស្ទួន មាត្រា១០ និងមាត្រា១០ស្ទួន នៃអនុសញ្ញាទីក្រុងប៉ារីស ស្តីពី កិច្ចការពារកម្មសិទ្ធិឧស្សាហកម្ម ចុះថ្ងៃទី២០ ខែមីនា ឆ្នាំ១៨៨៣ និងគោលការណ៍ផ្សេងៗទៀត ដែលទាក់ទងដល់ការរក្សាគុណតម្លៃនៃប្រាសាទបុរាណខ្មែរគឺមិនអាចអនុញ្ញាតឲ្យមានការសាងសង់ចម្លងតាមបែបនេះបានទេ៕
