ភ្នំពេញ៖ លោក ហង់ ជួនណារ៉ុន រដ្ឋមន្ត្រីក្រសួងអប់រំយុវជននិងកីឡាបានឲ្យដឹងថា អ្នកសិក្សា និងបុគ្គលិកអប់រំ ដែលមិនបានចាក់វ៉ាក់សាំងបង្ការជំងឺកូវីដ-១៩មិនគួរឲ្យចូល ក្នុងបរិវេណគ្រឹះស្ថានសិក្សា ឬ ការរៀនតាមបណ្តុំឡើយ។
យោងតាមសេចក្ដីណែនាំស្តីពីគោលការណ៍ប្រតិបត្តិស្តង់ដារសម្រាប់ការលើកកម្ពស់សុខភាព និងសុវត្ថិភាពសិក្សា ក្នុងការបង្រៀន និងរៀនតាមបណ្តុំ សម្រាប់គ្រឹះស្ថានសិក្សាសាធារណៈ និងឯកជនចុះថ្ងៃទី១៣កញ្ញាឆ្នាំ២០២១ លោក ហង់ ជួនណារ៉ុន ប្រសាសន៍ថា អ្នកសិក្សា និងបុគ្គលិកអប់រំត្រូវចាក់វ៉ាក់សាំងបង្ការជំងឺកូវីដ-១៩ ឱ្យបានគ្រប់ៗគ្នាហើយត្រូវបង្ហាញប័ណ្ណចាក់វ៉ាក់សាំងបង្ការជំងឺកូវីដ-១៩ មុនពេលចូលគ្រឹះស្ថានសិក្សា។
លោករដ្ឋមន្ត្រីបញ្ជាក់ថា” អ្នកសិក្សា និងបុគ្គលិកអប់រំ ដែលមិនបានចាក់វ៉ាក់សាំងបង្ការជំងឺកូវីដ-១៩. មិនគួរអនុញ្ញាតឱ្យចូល ក្នុងបរិវេណគ្រឹះស្ថានសិក្សា ឬ ការរៀនតាមបណ្តុំ ប៉ុន្តែត្រូវបង្រៀននិងរៀនតាមប្រព័ន្ធអនឡាញ ចំពោះអ្នកសិក្សា និងបុគ្គលិកអប់រំដែលមានជំងឺប្រចាំកាយ ឬអាយុច្រើន គួរអនុញ្ញាតឱ្យបង្រៀន និង រៀនតាមប្រព័ន្ធអនឡាញ”។
លោករដ្ឋមន្ត្រីបានណែនាំដល់គ្រឹះស្ថានសិក្សាសាធារណៈ និងឯកជនត្រូវរៀបចំផែនការធ្វើតេស្តរហ័សតាមបែបជម្រើសដោយចៃដន្យ ដែលមានលក្ខណៈជាវដ្ត និង សមស្របនឹងហានិភ័យស្ថាប័ន ឬ អង្គភាព និងប្រព្រឹត្តទៅជាប្រចាំលើអ្នកសិក្សា និងបុគ្គលិកអប់រំ ចំនួនយ៉ាងតិច ៥% ទៅ ១០% នៃបុគ្គលិកអប់រំក្នុងស្ថាប័ន ឬ អង្គភាព(ដោយក្នុងសំណាកនីមួយៗ ត្រូវមានបុគ្គលិកដែលមានទីតាំងលំនៅឋានក្នុងតំបន់ខុសៗគ្នា)។
លោករដ្ឋមន្ត្រីបានបន្តថា ផែនការនេះគួរធានាថា បុគ្គលិក អប់រំទាំងអស់ដែលមានវត្តមាននៅបរិវេណស្ថាប័ន ឬអង្គភាពទទួលបានការធ្វើតេស្តរហ័សជាប្រចាំ(យ៉ាងតិច១ដងក្នុងចន្លោះ ១ ទៅ២សប្ដាហ៍ កំណត់បុគ្គលិកដែលមានហានិភ័យខ្ពស់ដូចជាបុគ្គលិកដែលមានការប្រាស្រ័យទាក់ទងជាមួយបុគ្គលិកផ្សេងទៀតឬមនុស្សក្រៅស្ថាប័នឬអង្គភាពច្រើន រួចធ្វើតេស្តរហ័សឱ្យញឹកញាប់លើបុគ្គល ទាំងនោះ។
លោករដ្ឋមន្ត្រីបានបន្តទៀតថា ប្រសិនបើមានករណីវិជ្ជមាន ឬមានការផ្ទុះជំងឺកូវីដ-១៩ ត្រូវអនុវត្តតាមគោលការណ៍ណែនាំប្រតិបត្តិ ស្តីពីការប្រើប្រាស់តេស្ដរហ័សរកអង់ទីហ្សែនកូវីង-១៩។
ក្នុងករណីមានលទ្ធផលតស្ដរហ័សវិជ្ជមានលើបុគ្គល ដែលត្រូវបានចាត់ទុកថាជាបុគ្គលមានហានិ ភ័យ សា្ថប័ននោះត្រូវដាក់បុគ្គលនោះនៅដោយឡែកនិងស្នើឱ្យមានការធ្វើ តេស្តPCRបញ្ជាក់មុននឹងបញ្ជូនបុគ្គលនោះទៅព្យាបាលហើយ អាជ្ញាធរមានសមត្ថកិច្ច អាចផ្ដល់ការសម្របសម្រួលកិច្ចសហការនិងគាំទ្រ ទាំងធនធាន ឧបករណ៍សម្ភារនិងបច្ចេកទេស។
លោករដ្ឋមន្ត្រីបានបញ្ជាក់ទៀតថា ត្រូវវាស់ស្ទង់កម្ដៅអ្នកសិក្សា បុគ្គលិកអប់រំ និងអ្នកដទៃទៀតមុនអនុញ្ញាតឱ្យចូលបរិវេណគ្រឹះស្ថានសិក្សាហើយអ្នកសិក្សា និងបុគ្គលិកអប់រំត្រូវពាក់ម៉ាស់ឱ្យបានជាប្រចាំ ដែលអាចបង្ការការឆ្លង រាតត្បាតនៃជំងឺកូវីដ-១៩ ហើយត្រូវទុកដាក់ក្នុងធុងសំរាមឱ្យបានត្រឹមត្រូវបន្ទាប់ពីការប្រើប្រាស់រួចនិងរៀបចំឱ្យមានគម្លាតសុវត្ថិភាពនៅគ្រប់ទីតាំងរៀនតាមបណ្ដុំ ក្នុងគ្រឹះស្ថានសិក្សា រួមទាំងទីតាំងតុ កៅអី ក្នុងបន្ទប់រៀន យ៉ាងតិច ១ម៉ែត្រកន្លះពីគ្នា ដោយកំណត់រូបភាព ជាការរៀនតាមបណ្តុំ ដែល មានចំនួនតិចជាង ១៥ នាក់ ។
គួរបញ្ជាក់ថា ការចេញគោលការណ៍ប្រតិបត្តិស្តង់ដារសម្រាប់ការលើកកម្ពស់សុខភាព និងសុវត្ថិភាពសិក្សា ក្នុងការបង្រៀន និងរៀនតាមបណ្តុំ សម្រាប់គ្រឹះស្ថានសិក្សាសាធារណៈ និងឯកជននេះបានធ្វើឡើងបន្ទាប់ពីរាជធានីខេត្តចំនួនបានចាប់ផ្តើមបើកនិងត្រៀមបើកសាលារៀនឡើងវិញជាបន្តបន្ទាប់ដូចជាខេត្តព្រះសីហនុបានបើកនៅថ្ងៃទី១៣កញ្ញារាជធានីភ្នំពេញ ខេត្តកណ្តាល និងពោធិ៍សាត់ប្រកាសបើកដំណើរការនៅថ្ងៃទី១៥កញ្ញាខណៈខេត្តកំពង់ចាមបើកនៅថ្ងៃទី២០កញ្ញា។
ចំណែកខេត្តផ្សេងៗទៀតនៅមិនទាន់កំណត់ថ្ងៃបើកនៅឡើយទេដោយសារសាលាជាប់ធ្វើជាមណ្ឌលចត្តាឡីស័កនិងមណ្ឌលព្យាបាលជំងឺកូវីដ១៩៕
