ភ្នំពេញ៖ ជនជាតិថៃចំនួន ៨នាក់ ដែលធ្វើដំណើរមកពីទីក្រុងបាងកក និងមកពីខេត្តឈុនបុរី ត្រូវបានកម្លាំងយោធាថៃ ក្នុងកងរយលេខ៥៤៦ឃាត់ខ្លួន ខណ:ដែលពួកគេបម្រុងឆ្លងដែន ចូលមកធ្វើការនៅក្នុងប្រទេសកម្ពុជា។ ការឃាត់ខ្លួននេះបានធ្វើឡើងនៅវេលាម៉ោង៨ និង៣០នាទីយប់ ថ្ងៃទី២៤ ខែកញ្ញា ឆ្នាំ២០២១ ត្រង់ចំណុចក្បែបន្ទាត់ព្រំដែន ក្នុងឃុំពោងណាំរ៉ន ស្រុកពោងណាំរ៉ន ខេត្តច័ន្ទបុរី។
ប្រភពពីកម្លាំងយោធាថៃបានឲ្យដឹងថា ក្រោយពីបានសាកសួររួចមក ស្ត្រីទាំងអស់ដែលជាជនជាតិថៃ បានសារភាពថា ពួកគេទាំងអស់ខ្លះមកពីខេត្តឈុនបុរី និងខ្លះទៀតមកពីទីក្រុងបាងកក ដោយមានបំណងឆ្លងដែនទៅធ្វើការ ក្នុងកាស៊ីណូអនឡាញ នាក្រុងប៉ោយប៉ែត ដោយនៅទីនោះឮថា បានប្រាក់ខែខ្ពស់ តែក៏ត្រូវចាប់ខ្លួនតែម្តង។
បច្ចុប្បន្នក្រោយពេល ក្រុមគ្រូពេទ្យ បានពិនិត្យសុខភាពរួចមក ពួកគេទាំងអស់ត្រូវបានបញ្ជូនទៅកាន់អធិការដ្ឋានតម្រួត ស្រុកពោងណាំរ៉ន ដើម្បីអនុវត្តតាមវិធានការច្បាប់៕