មណ្ឌលគិរី៖ កម្លាំងជំនាញការិយាល័យប្រឆាំងគ្រឿងញៀន សហការជាមួយកម្លាំង នៃអធិការដ្ឋាននគរបាលក្រុងសែនមនោរម្យ បានចុះបង្ក្រាបករណី ជួញដូររក្សាទុក និងប្រើប្រាស់ ដោយខុសច្បាប់នូវសារធាតុញៀន បានចំនួន១ករណី ឃាត់ខ្លួនជនសងស័យជាយុវជន៧នាក់។
ក្នុងប្រតិបត្តិការធ្វើឡើងនៅថ្ងៃទី២៤ ខែកញ្ញា ឆ្នាំ២០២១ វេលាម៉ោង១៣និង៤៤នាទី ចំណុចក្នុងហាងកាហ្វេ ស្ថិតនៅភូមិមានលាភ សង្កាត់សុខដុម ក្រុងសែនមនោរម្យ ខេត្តមណ្ឌលគិរី កម្លាំងបានធ្វើការឃាត់ខ្លួនជនសង្ស័យចំនួន៧នាក់ និងបានពិនិត្យយកសំណាកធ្វើតេស្តរកមេរោគកូវីដ-១៩ លទ្ធផលអវិជ្ជមាន ។
វត្ថុតាងដកហូតរួមមាន៖ ម្សៅក្រាមពណ៌សថ្លាសង្ស័យសារធាតុញៀនចំនួន១៨កញ្ចប់តូច , ទូរស័ព្ទចំនួន៤គ្រឿង, ម៉ូតូ៣គ្រឿង, ប្រអប់ដាក់ថ្នាំញៀនចំនួន១, ថង់វេចខ្ចប់ថ្នាំញៀនមួយចំនួន។
បច្ចុប្បន្នកម្លាំងការិយាល័យប្រឆាំងគ្រឿងញៀន និងអធិការដ្ឋាននគរបាលក្រុង កសាងសំណុំរឿងអនុវត្តបន្តតាមនីតិវិធី៕