ភ្នំពេញ៖ លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានលើកឡើងថា ទឹកជាសត្រូវរបស់ផ្លូវ ងាយបង្កឱ្យមានជង្ហុកសំបុកមាន់ ធ្វើឱ្យប្រជាពលរដ្ឋពិបាក ធ្វើចរាចរណ៍ឆ្លងកាត់ ។
ការលើកឡើងរបស់រដ្ឋមន្ត្រីក្រសួងសាធារណការ ធ្វើឡើងក្នុងឱកាសអញ្ជើញចុះពិនិត្យស្ថានភាព និងវឌ្ឍនភាពនៃការសាងសង់ផ្លូវលេខ ១៤៦បេ និងផ្លូវលេខ១៤៨ នៅក្នុងរដូវវស្សា ដើម្បីជំរុញឱ្យក្រុមហ៊ុនយកចិត្តទុកដាក់ លើការងារថែទាំផ្លូវ ជៀសវាងកុំឱ្យដាច់ជង្ហុកសំបុកមាន់ ធ្វើឱ្យប្រជាពលរដ្ឋពិបាកធ្វើដំណើរ ។
ទន្ទឹមគ្នានោះដែរ លោកទេសរដ្ឋមន្ត្រី បានណែនាំឱ្យក្រុមហ៊ុន ទទួលម៉ៅការសាងសង់ យកចិត្តទុកដាក់លើការងារសាងសង់ និងមានស្មារតីទទួលខុសត្រូវខ្ពស់ ក្នុងការសាងសង់នៅក្នុង រដូវកាលមានភ្លៀងធ្លាក់ ដោយហេតុថា ទឹកជាសត្រូវរបស់ផ្លូវ ងាយបង្កឱ្យមានជង្ហុកសំបុកមាន់ ធ្វើឱ្យប្រជាពលរដ្ឋពិបាក ធ្វើចរាចរណ៍ឆ្លងកាត់ ។
គួរកត់សម្គាល់ថា កំណាត់ផ្លូវនេះគឺជាផ្លូវវាងក្រុង ដ៏មានសក្ដានុពលសម្រាប់ បម្រើឱ្យការដឹកជញ្ជូន ទំនិញនាំចេញ-ចូលតាមនាវា កសិផល និងជលផលរបស់បងប្អូនប្រជាពលរដ្ឋ នៅស្រុកស្ទឹងហាវ ក៏ដូចជាបងប្អូនរស់នៅតំបន់ទំនប់រលកចាស់ នៃក្រុងព្រះសីហនុទៅកាន់ទីផ្សារ កាន់តែមានលក្ខណៈ ងាយស្រួល ឆាប់រហ័ស និងចំណាយតិច និងចូលរួមចំណែកដល់ការ កាត់បន្ថយការកកស្ទះចរាចរណ៍ យានយន្តដឹកជញ្ជូនទំនិញធុនធ្ងន់ តាមផ្លូវជាតិលេខ៤ផងដែរ ៕
