សៀមរាប៖ យោងតាមអគ្គស្នងការនគបាលជាតិ បានឱ្យដឹងថា នៅថ្ងៃទី ១៧ ខែតុលា ឆ្នាំ២០២១ ជនសង្ស័យ ៣នាក់ ត្រូវបានកម្លាំងជំនាញប្រឆាំងគ្រឿងញៀន បញ្ជូន ទៅសាលាដំបូងខេត្តសៀមរាប ពីបទរក្សាទុក ជួញដូរ និងប្រើប្រាស់ដោយខុសច្បាប់នូវសារធាតុញៀន ដើម្បីអនុវត្តនីតិវិធី។
គួររំលឹកថា កាលពីថ្ងៃទី១៥ ខែតុលា ឆ្នាំ២០២១ វេលាម៉ោង ២៣:០០នាទី យោងតាមបទបញ្ជាលោកឧត្តមសេនីយ៍ត្រី តេង ច័ន្ទណាត ស្នងការនៃស្នងការដ្ឋាននគរបាលខេត្តសៀមរាប លោកឧត្តមសេនីយ៍ត្រី អ៊ុ អមរា ស្នងការរងទទួលដឹកនាំផែនការងារប្រឆាំងគ្រឿងញៀន បានបញ្ជាកម្លាំងការិយាល័យប្រឆាំងគ្រឿងញៀនបានចូលរួមសហការជាមួយកម្លាំងផ្នែកប្រឆាំងគ្រឿងញៀននៃអធិការដ្ឋាននគរបាលស្រុកពួក និងកម្លាំងប៉ុស្តិ៍នគរបាលឃុំពួក បានចុះបង្ក្រាប រក្សាទុក ជួញដូរ ចាត់ចែង និងប្រើប្រាស់ដោយខុសច្បាប់នូវសារធាតុញៀន នៅចំនុចលំនៅដ្ឋាននិងលើដងផ្លូវស្ថិតនៅភូមិគោកស្រុក និងភូមិគោកថ្មី ឃុំពួក ស្រុកពួក ខេត្តសៀមរាប ឃាត់ខ្លួនជនសង្ស័យចំនួន ០៣នាក់។
ជនសង្ស័យទាំង៣នាក់រួមមាន៖
១-ឈ្មោះ ទិត្យ សំណាង ហៅជ្រូក ភេទប្រុស ឆ្នាំកំណើត ២០០៤ ជនជាតិខ្មែរ មុខរបរ គ្មាន មានទីលំនៅភូមិគោកថ្មី ឃុំពួក ស្រុកពួក ខេត្តសៀមរាប។(រក្សាទុក ជួញដូរ និងប្រើប្រាស់) (មានសារធាតុញៀននៅក្នុងខ្លួន)
២-ឈ្មោះ ទន មករា ភេទប្រុស ឆ្នាំកំណើត ១៩៩៨ ជនជាតិខ្មែរ មុខរបរ ជាងឡាន មានទីលំនៅភូមិដូនទ្រ ឃុំល្វា ស្រុកពួក ខេត្តសៀមរាប។(ចាត់ចែង និងប្រើប្រាស់) (មានសារធាតុញៀននៅក្នុងខ្លួន)
៣-ឈ្មោះ សុខ បញ្ញា ភេទប្រុស ឆ្នាំកំណើត ២០០៤ ជនជាតិខ្មែរ មុខរបរ សិស្ស មានទីលំនៅភូមិដូនទ្រ ឃុំល្វា ស្រុកពួក ខេត្តសៀមរាប។(ចាត់ចែង និងប្រើប្រាស់) (មានសារធាតុញៀននៅក្នុងខ្លួន)
ក្នុងប្រតិបត្តិការចុះបង្ក្រាបបទល្មើសនេះ សមត្ថកិច្ចដកហូតវត្ថុតាងបានរួមមាន ៖ ម្សៅមេតំហ្វេតាមីនចំនួន០៤កញ្ចប់ ស្មើនឹងទម្ងន់ ០.៦៨ក្រាម(ទម្ងន់សុទ្ធ) ឧបករណ៍ប្រើប្រាស់គ្រឿងញៀនមួយចំនួន និងទូរស័ព្ទដៃចំនួន ០៣គ្រឿង។
បច្ចុប្បន្ន ជនសង្ស័យព្រមទាំងវត្ថុតាង ត្រូវបានការិយាល័យជំនាញបានបញ្ជូនទៅសាលាដំបូងខេត្តសៀមរាប ដើម្បីអនុវត្តនីតិវិធីច្បាប់បន្តរួចហើយ៕