ពូជស្រូវប្រមាណ៦ពាន់តោននិងដំណាំរួមផ្សំជិត៥៦ម៉ឺនកញ្ចប់ត្រូវបានចែកជូនប្រជាកសិករក្រោយជំនន់ទឹកភ្លៀងស្រកទៅវិញ

0
5

ភ្នំពេញ៖ គ្រោះទឹកជំនន់នៅក្នុងឆ្នាំនេះបានធ្វើឱ្យប៉ះពាល់ស្រូវប្រជាពលរដ្ឋជាច្រើនហិកតាឆ្លើយតបបញ្ហានេះសម្តេចតេជោ ហ៊ុន សែន នាយករដ្ឋមន្ត្រីកម្ពុជា បានដាក់ចេញវិធានការបន្ទាន់ជំរុញការធ្វើស្រែ និងដាំដុះឡើងវិញរបស់ប្រជាពលរដ្ឋ ក្នុងបំណងជួយស្តារជីវភាពរបស់ពួកគាត់ និងចៀសវាងការខ្វះស្បៀងអាហារ។

យោងតាមគណៈកម្មាធិការជាតិគ្រប់គ្រងគ្រោះមហន្តរាយបានបញ្ជាក់ថាគិតត្រឹមថ្ងៃទី១៥ ខែវិច្ឆិកា កន្លងទៅនេះ ពូជស្រូវស្រាលមិនប្រកាន់រដូវប្រមាណ ៦ពាន់តោន និងដំណាំរួមផ្សំជិត ៥៦ម៉ឺនកញ្ចប់ ត្រូវបានចែកជូនប្រជាកសិករ ក្រោយពេលជំនន់ទឹកភ្លៀងបានស្រកទៅវិញ។ បន្ថែមពីលើនោះសម្តេចតេជោ ក៏បានបញ្ចេញគ្រឿងចក្រកសិកម្ម និងម៉ាស៊ីនព្រោះស្រូវជាដើម ជួយអន្តរាគមន៍លើការធ្វើស្រែឡើងវិញ។ បច្ចុប្បន្នប្រជាពលរដ្ឋ បាននិងកំពុងធ្វើសកម្មភាពយ៉ាងសកម្មក្នុងការដាំដុះឡើងវិញនេះ។

របាយការណ៍បានបង្ហាញថា ការងារធ្វើស្រែឡើងវិញ នៅក្នុងខេត្តបាត់ដំបង និងខេត្តបន្ទាយមានជ័យ សម្រេចបានលទ្ធផលប្រមាណជាង៥០%ភាគរយ, ខេត្តកំពង់ធំសម្រេចបានប្រមាណ ៨៥ភាគរយ និងខេត្តពោធិ៍សាត់ សម្រេចបានជាង ៣៤ភាគរយ។ ខេត្តបាត់ដំបង ធ្វើស្រែបាន ៥,៨៣១ហិកតា លើផ្ទៃដីដែលអាចស្តារឡើងវិញបានចំនួន ១០,៥០០ហិចតា, ខេត្តបន្ទាយមានជ័យ បាន ៥,១១៣ ហិកតាលើផ្ទៃដីអាចស្តារឡើងវិញ ចំនួន ១១,១៦៩ហិកតា, ខេត្តកំពង់ធំ ផ្ទៃដីដាំដុះឡើងវិញ បាន ៦,៣៩២ ហិកតា នៅសល់ ១,១៦៦ហិកតា និងខេត្តពោធិ៍សាត់ ដាំដុះឡើងវិញ បាន ១,១៧៦ហិកតា លើផ្ទៃដីដាំដុះឡើងវិញ ១៧,៨០៤ហិកតា។

ក្នុងឱកាសបន្តចុះពិនិត្យ វឌ្ឍនភាព នៃការងារបង្កបង្កេីនផលការ ស្តារស្រូវឡេីងវិញ និងជួបសំណេះសំណាល ជាមួយ បងប្អូន កសិករ ក្នុងខេត្តពោធិ៍សាត់ និងខេត្តកំពង់ធំ កាលពីថ្ងៃទី២២ ខែវិច្ឆិកា ឆ្នាំ២០២០ លោក ទេសរដ្ឋមន្ត្រី គន់ គីម អនុប្រធានទី១គណៈកម្មាធិការជាតិគ្រប់គ្រងគ្រោះមហន្តរាយបានថ្លែងថា ឈរលើស្មារតី និងឆន្ទៈដ៏មុតមាំនេះហើយ ទើបរាល់ពេលពលរដ្ឋមានទុក្ខ តែងមានវត្តមានរបស់សម្តេច ហើយវិធានការជាដំណោះស្រាយត្រូវបានដាក់ចេញបន្ទាន់បន្តបន្ទាប់ ដើម្បីជួយប្រជាពលរដ្ឋ។

ក្នុងឱកាសចុះពិនិត្យការបង្កបង្កើនផលឡើងវិញរបស់ប្រជាពលរដ្ឋនេះ លោកទេសរដ្ឋមន្ត្រី គន់ គីម ក៏បានក្រើនរំលឹកបន្ថែមដល់អាជ្ញាធរពាក់ព័ន្ធទាំងអស់ទាំងថ្នាក់ជាតិ ក្រោមជាតិ និងមូលដ្ឋាន ត្រូវយកចិត្តទុកដាក់ឱ្យមែនទែន លើការបង្កបង្កើនផលឡើងវិញរបស់ប្រជាពលរដ្ឋ។ លោកបានសង្កត់ធ្ងន់ថាត្រូវតែចុះពិនិត្យមើលឱ្យដល់វាលស្រែហើយដាក់ចេញវិធានការដោះស្រាយលើបញ្ហាប្រឈមទាំងឡាយ។សូមរំលឹកថាសម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា បានបញ្ជាឲ្យទិញពូជស្រូវមិនរើសរដូវបន្ថែម ចំនួន២០០០តោន ដើម្បីចែកជូនប្រជាកសិករដែលរងការខូចខាតស្រូវ ដោយសារជំនន់ទឹកភ្លៀង ដោយក្នុងមួយគ្រួសារទទួលបានពូជស្រូវចំនួន១០០គីឡូក្រាមដូចៗគ្នា៕

LEAVE A REPLY

Please enter your comment!
Please enter your name here