ភ្នំពេញ៖ ក្រសួងមហាផ្ទៃ បានបង្ហាញវីដេអូសកម្មភាពរបស់លោក ឆែម សាវុធ អគ្គនាយកដ្ឋានពន្ធនាគារ មុនពេលចូលរួមកិច្ចប្រជុំជាមួយ សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ កាលពីថ្ងៃទី២៤ ខែវិច្ឆិកា ឆ្នាំ២០២០។
យោងតាមគេហទំព័រហ្វេសប៊ុករបស់ ក្រសួងមហាផ្ទៃ កាលពីថ្ងៃទី៣ ខែធ្នូ ឆ្នាំ២០២០ បានឲ្យដឹងថា កាលពីថ្ងៃទី២៤ វិច្ឆិកា លោក ឆែម សាវុធ បានចូលរួមកិច្ចប្រជុំអន្តរក្រសួងពិនិត្យពិភាក្សាសេចក្ដីព្រាងព្រះរាជក្រឹត្យស្ដីពីការបន្ធូរបន្ថយទោស និងលើកលែងទោស ក្រោមអធិបតីភាព សម្ដេច ស ខេង ក្រោយពីកិច្ចប្រជុំរួច លោក ឆែម សាវុធ ត្រូវបានរកឃេីញមានវិរុសកូវីដ-១៩។
តាមរយៈវីដេអូនេះ បានបង្ហាញឱ្យឃើញថាទីស្តីការក្រសួងមហាផ្ទៃ លោក ឆែម សាវុធ បានគោរពយ៉ាងខ្ជាប់ខ្ជួននូវវិធានការណែនាំរបស់ក្រសួងសុខាភិបាលដើម្បីការពារការឆ្លង និងចម្លងជំងឺកូវីដ១៩ ដូចជា ឆ្លងកាត់ម៉ាស៊ីនបាញ់អាល់កុល ការលាងដៃដោយទឹកអាកុល និងការវាស់កំដៅ ដោយកាម៉េរ៉ាវាស់កំដៅស្វ័យប្រវត្តិ។
ខាងក្រោមនេះ ជាវីដេអូសកម្មភាពរបស់លោក ឆែម សាវុធ អគ្គនាយកដ្ឋានពន្ធនាគារ កាលពីថ្ងៃទី២៤ វិច្ឆិកា មុនពេលលោក ត្រូវបានពិនិត្យឃើញមានវិជ្ជមានកូវីដ១៩៕
