ជនបរទេសម្នាក់ ផ្ញើបំណែកថ្មប្រាសាទបាយ័នមកឱ្យកម្ពុជាវិញ

0
12

ភ្នំពេញ៖ ជនបរទេសម្នាក់បានផ្ញើបំណែកថ្មប្រាសាទមួយដុំពីចក្រភពអង់គ្លេស ដើម្បីប្រគល់មកឱ្យកម្ពុជាដែលជាម្ចាស់ដើមវិញ ក្រោយរូបគេបានយកចេញពីប្រាសាទ បាយ័ន កាលពីឆ្នាំ២០០៦ កន្លងទៅ។

លោក ជុក ជំនោរ ប្រធាននាយកដ្ឋានអភិវឌ្ឍន៍ផលិតផលទេសចរណ៍ និងជាសមាជិកក្រុមប្រឹក្សាភិបាលអាជ្ញាធរជាតិអប្សរា បានឱ្យដឹងថា ដំបូងឡើយ ជនបរទេសរូបនេះបានផ្ញើបំណែកថ្មប្រាសាទមួយដុំ ជាមួយ នឹងលិខិតមួយច្បាប់ផ្ញើជូនរដ្ឋមន្ត្រីក្រសួងទេសចរណ៍ លោក ថោង ខុន តាមរយៈក្រុមហ៊ុន DHL ពីចក្រភពអង់គ្លេស។

ក្រោយបំណែករតនវត្ថុនេះត្រូវបាននាំមកដល់ប្រទេសកម្ពុជា ក្រុមការងារក្រសួងទេសចរណ៍ដឹកនាំដោយលោក ជុក ជំនោរ ក៏បានទៅទទួលយកមក និងបានប្រគល់បន្តជូនទៅក្រសួងវប្បធម៌ និងវិចិត្រសិល្បៈ តាមរយៈនាយកដ្ឋានសារៈមន្ទីរ។

តាមការវាយតម្លៃបឋមរបស់អ្នកជំនាញរបស់នាយកដ្ឋានសារៈមន្ទីរ បំណែកថ្មនេះអាចជាចំណែកថ្មនៃសសរពេជ្រនៃប្រាសាទបាយ័ន។ ក្រុមការងារជំនាញនឹងបន្តការវិភាគ និងចុះបញ្ជីនៅនាយកដ្ឋានសារៈមន្ទីរ ឬបញ្ជូនបន្តទៅអាជ្ញាធរជាតិអប្សរាដើម្បីចាត់ចែងបន្ត៕

LEAVE A REPLY

Please enter your comment!
Please enter your name here