កម្ពុជា-អាមេរិក បន្តកិច្ចសហប្រតិបត្តិការ ចូលរួមចំណែកដល់កំណើនសេដ្ឋកិច្ចកម្ពុជា និងបង្កើតការងារជូនកម្មករនិយោជិត ទោះជាជួបកូវីដ១៩

0
3

ភ្នំពេញ៖ កម្ពុជា-អាមេរិក បានសំដែងនូរការពេញចិត្តចំពោះកិច្ចសហប្រតិបត្តិការជាមួយគ្នាបន្តទៀត ដែលបានចូលរួមចំណែកដល់កំណើនសេដ្ឋកិច្ចកម្ពុជា និងការបង្កើតការងារជូនបងប្អូនកម្មករនិយោជិត ហើយបើទោះជាជំងឺកូវីដ ១៩ កំពុងបន្តការគំរាមកំហែងក៏ដោយ ក៏ការរនាំចេញផលិតផលពីកម្ពុជាទៅកាន់ទីផ្សារមិនមានការធ្លាក់ចុះទេ មានតែកើនឡើងបើប្រៀបជាមួយទីផ្សារប្រទេសផ្សេងទៀត។ នេះបើយោងតាមហ្វេសប៊ុកក្រសួងការងារ។

ការអះអាងបែបនេះធ្វើឡើងរវាង លោក អ៉ិត សំហេង រដ្ឋមន្ត្រីក្រសួងការងារ និងបណ្តុះបណ្តុះបណ្តាលវិជ្ជាជីវ: ជាមួយលោក W. Patrick Murphy ឯកអគ្គរដ្ឋទូតសហរដ្ឋអាមេរិក ប្រចាំនៅព្រះរាជាណាចក្រកម្ពុជា នាថ្ងៃទី២៣ ខែកុម្ភ: ឆ្នាំ២០២១ ដើម្បីពិភាក្សាការងារលើវឌ្ឍនភាពនៃកិច្ចសហប្រតិបត្តិការកន្លងមក ជាពិសេសកិច្ចសហប្រតិបត្តិការលើការអនុវត្តគោលនយោបាយផ្សាភ្ជាប់ពាណិជ្ជកម្មទៅនិងបទដ្ឋានការងារអន្តរជាតិ ដែលកម្ពុជាធ្លាប់បានអនុវត្តប្រកបដោយជោគជ័យជាមួយសហរដ្ឋអាមេរិក តាំងពីឆ្នាំ១៩៩៩ រហូតដល់បច្ចុប្បន្ន។

នាឱកាសនោះ លោករដ្ឋមន្ត្រី បានថ្លែងអំណរគុណចំពោះភាគីសហរដ្ឋអាមេរិក ដែលទទួលស្គាល់នូវវឌ្ឍនភាពនៃការអនុវត្តសិទ្ធសេរីភាព អង្គការវិជ្ជាជីវ: ការធានាបាននូវលក្ខខណ្ឌការងារ ស្របតាមបទដ្ឋានការងារអន្តរជាតិ ដែលជាកត្តាស្នូលសម្រាប់ភាគីសហរដ្ឋអាមេរិកបន្តផ្តល់ភាពអនុគ្រោះពាណិជ្ជកម្មដល់កម្ពុជារហូតមកទល់បច្ចុប្បន្ន។ តាមរយ: គម្រោងរោងចក្រកាន់តែប្រសើរឡើងនៅកម្ពុជា ដែលអនុវត្តដោយអង្គការអន្តរជាតិខាងការងារ (ILO) ជាគម្រោងវាយតំលៃប្រកបដោយតម្លាភាពនូវលក្ខខណ្ឌការងារ នៅក្នុងវិស័យកាត់ដេរ សំលៀកបំពាក់ និងផលិតស្បែកជើង ហើយដែលបច្ចុប្បន្នក្រសួងការងារ និងបណ្តុះបណ្តាលវិជ្ជាជីវ: និងក្រសួងពាណិជ្ជកម្ម កំពុងជំរុញការពង្រីកវិសាលភាពអនុវត្តដល់រោងចក្រផលិតផលិតផលធ្វើដំណើរ និងកាបូប (TGB)។

ក្រៅពីនេះ ភាគីទាំងពីរក៏បានពិភាក្សាក្នុងការបន្តពង្រឹងកិច្ចសហប្រតិបត្តិការលើការបន្តលុបបំបាត់ទម្រង់ធ្ងន់ធ្ងរនៃពលកម្មកុមារ ការពង្រឹងសមត្ថភាពអធិការការងារតាមរយ:ការទសន្សកិច្ចសិក្សានៅសហរដ្ឋអាមេរិកតាមរយ: កម្មវិធី International Visitors Leadership Program on Demand និងការបន្តអនុស្សរណ: នៃការយោគយល់គ្នារវាងក្រសួងការងារ និងបណ្តុះបណ្តាលវិជ្ជាជីវ: និងមជ្ឈមណ្ឌលអាមេរិកកាំងសម្រាប់សាមគ្គីភាពការងារអន្តរជាតិ (ACILS)។

កិច្ចសហប្រតិ្តរវាងក្រសួង និងមជ្ឈមណ្ឌលអាមេរិកកាំងសម្រាប់សាមគ្គីភាពការងារអន្តរជាតិ ក្នុងរយពេលកន្លងមកក៍ទទួលបានសមិទ្ធផលជាច្រើន ក្នុងការចូលរួមជួយឲ្យ ភាគីពាក់ព័ន្ធ ជាពិសេសអង្គការវិជ្ជាជីវ: កាន់តែមានភាពចាស់ទុំក្នុងការចូលរួមអនុវត្តច្បាប់ស្តីពីការងារ ច្បាប់ស្តីពីសហជីព ច្បាប់ស្តីពីប្រាក់ឈ្នួលអប្បបរមា ច្បាប់ស្តីពីរបបបេឡាជាតិសន្តិសុខសង្គម និងលិខិតបទដ្ឋាន គតិយុត្តិពាក់ព័ន្ធនឹងវិស័យការងារ ដែលទាំងនេះជាផ្នែកមួយដ៏សំខាន់ក្នុងការកាត់ បន្ថយនូវវិវាទការងារ ហើយឈានទៅបង្កើតឲ្យមានសុខដុមនីយកម្មនៃទំនាក់ទំនងវិជ្ជាជីវ:។

ទន្ទឹមនេះដែរ លោក ឯកអគ្គរដ្ឋទូត ក៏បានវាយតម្លៃខ្ពស់ចំពោះកិច្ចខិតខំប្រឹងប្រែងរបស់ ក្រសួងការងារ និងបណ្តុះបណ្តាលវិជ្ជាជីវ: ដែលអនុវត្តបានយ៉ាងល្អក្នុងការចូលរួមធានានូវនិរន្តភាពនៃដំណើរការអាជីវកម្ម ផលិតកម្ម និងពាណិជ្ជកម្ម តាមរយ:ការដាក់ចេញនូវវិធានការ សេចក្តីណែនាំ និងតាមដានត្រួតពិនិត្យមើលការអនុវត្តរបស់រោងចក្រ សហគ្រាស គ្រឹះស្ថាន ព្រមទាំងការចូលរួមដោះស្រាយរាល់បញ្ហានានាប្រកបដោយប្រសិទ្ធភាពខ្ពស់ ជាពិសេសការទូទាត់អត្ថប្រយោជន៍ និងប្រាក់ឧបត្ថម្ភជូនបងប្អូនកម្មករនិយោជិតពេលរោងចក្រព្យួរការងារ និងដោះស្រាយទូទាត់ប្រាក់អតីភាពការងារ និងអត្ថប្រយោជន៍ពេលរោងចក្របិទទ្វារលែងដំណើរការ ឬរោងចក្រក្ស័យធន ឬម្ចាស់រត់ចោល។

ភាគីទាំងពីរបានឯកភាពគ្នាក្នុងការបន្តពិនិត្យមើលលើចំណុចខ្លះៗនៃបទដ្ឋានគតិយុត្តិ ដែលត្រូវធ្វើបច្ចុប្បន្នភាព ដើម្បីការអនុវត្តកាន់តែទទួលបានប្រសិទ្ធភាពខ្ពស់ពីគ្រប់ភាគីពាក់ព័ន្ធ៕

LEAVE A REPLY

Please enter your comment!
Please enter your name here