បើគ្មានការប្រែប្រួល! សម្ដេចតេជោ នឹងទទួលចាក់វ៉ាក់សាំងកូវីដ-១៩​ នៅមន្ទីរពេទ្យកាល់ម៉ែត្រ

0
3

ភ្នំពេញ​៖​ នាយករដ្ឋមន្ត្រី​នៃកម្ពុជា សម្ដេចតេជោ​ ហ៊ុន​ សែន​ បានថ្លែងថា​ ប្រសិនបើពុំមានការប្រែប្រួលទេ សម្ដេចនឹងទទួលចាក់វ៉ាក់សាំងកូវីដ-១៩​ នៅមន្ទីរពេទ្យកាល់ម៉ែត្រ ដោយមានការធ្វើសន្និសីទសារព័ត៌មានផងដែរ។

យោងតាមហ្វេសប៊ុក​របស់​ សម្ដេចតេជោ​ ហ៊ុន​ សែន​ នាថ្ងៃទី២៨​ ខែកុម្ភ:​នេះ​ បានឲ្យដឹងថា ក្រសួងសុខាភិបាល​ បានប្រកាសជូនដំណឹងរួចមកហើយថា កម្ពុជានឹងទទួលបានវ៉ាក់ សាំងឈ្មោះ អាស្រ្តាហ្សេនីកា(AstraZeneca) ដែលផលិតនៅឥណ្ឌាចំនួន ៣២៤,០០០ដូស ក្នុងចំណោម
១,១០៤,០០០ដូស ដែលកម្ពុជាត្រូវបានទទួលក្នុងឆមាសទី១ ឆ្នាំ២០២១ ដែលជាជំនួយបឋមផ្តល់ដោយមជ្ឈមណ្ឌលកូវ៉ាក់ (COVAX Facility)។

សម្ដេចតេជោ​បន្តថា ប្រសិនបើពុំមានការប្រែប្រួលទេ វ៉ាក់សាំងនេះនឹងមកដល់កម្ពុជានៅម៉ោង១៩:៥០ល្ងាច ថ្ងៃទី២ មីនា២០២១។ សម្ដចតេជោ​ ថា​ លោក ម៉ម ប៊ុនហេង រដ្ឋមន្ដ្រីក្រសួងសុខាភិបាល​ នឹងតំណាងឲ្យរាជរដ្ឋាភិបាលកម្ពុជាទទួលយកវ៉ាក់សាំងនេះពីតំណាងអង្គការសុខភាពពិភពលោក និងតំណាងអង្គការយូនីសេហ្វប្រចាំកម្ពុជានៅយប់ថ្ងៃទី២ មីនា២០២១ នៅព្រលានយន្តហោះអន្តរជាតិភ្នំពេញ។

សម្ដចតេជោ​ មានប្រសាសន៍បន្ថែមថា​ នេះជាផ្លែផ្កានៃកិច្ចសហការអន្តរជាតិដែលកម្ពុជាបានធ្វើជាមួយដៃគូពហុភាគីជាមួយអង្គការសហ ប្រជាជាតិ ជាពិសេសជាមួយអង្គការសុខភាពពិភពលោក និងអង្គការយូនីសេហ្វ។ តាមគម្រោងកូវ៉ាក់នឹងផ្តល់ឲ្យយើងចំនួន ២០ភាគរយ នៃចំនួនប្រជាជន១៦លាននាក់ ដែលស្មើនឹង៣លាន២សែននាក់ ឬស្មើនឹងវ៉ាក់សាំងចំនួន ៦លាន៤សែនដូស។

សម្ដចតេជោ​ បានបញ្ជាក់ថា​ “កម្ពុជាសូមអរគុណចំពោះប្រទេសនានា ក្រុមហ៊ុន និងសប្បុរសជននៅលើសកលលោកដែលបានផ្តល់ជំនួយដល់យើងតាមរយ:កូវ៉ាក់។ ខ្ញុំសូមជំរាបបន្ថែមថា ប្រសិនបើពុំមានការប្រែប្រួលទេ ខ្ញុំនឹងទទួលចាក់វ៉ាក់សាំងនៅម៉ោង៨និង៣០នាទីព្រឹកថ្ងៃទី ៤ មីនា ២០២១ នៅមន្ទីរពេទ្យកាល់ម៉ែត្រ ដោយមានការធ្វើសន្និសីទសារព័ត៌មានផងដែរ”៕

LEAVE A REPLY

Please enter your comment!
Please enter your name here